26 май көнне 2-4 класс укучылары Арча шәһәрендә эксурсиядә булып кайттылар. Башта алар Үзәк каитапханәдә тукталдылар. Китапханәче Рәхимбаева Алсу Галимҗановна аларны китапханә тарихы, анда эшләүчеләрнең хезмәте белән таныштырды. Үзенең дә ничек итеп бу хезмәткә килүе, аның күңелле дә, авыр да булуы турында әйтеп үтте. Укучылар төрле илләрдә урнашкан китапханәләр турында видео карады, үзләре дә китапханәче булып, китапханәгә килүчеләргә хезмәт күрсәтеп карадылар. Сәяхәт “Казан арты” тарих-этнография музеенда дәвам итте. Андагы экспонатлар белән танышып, Арчаның үткәне турында укучылар кызыксынып тыңладылар. Экскурсия бик күңелле үтте.

“Соңгы кыңгырау” бәйрәме – иң шатлыклы да, иң моңсу да бәйрәм. Түбән Мәтәскә урта мәктәбенең 11 нче сыйныфын бүген 3 укучы – 1 кыз һәм 2 егет - тәмамлый. Мәктәптә уку чоры – кеше тормышының иң күңелле мизгелләре. Алар һәрвакыт йөрәктә якты хатирә булып саклана. Алар өчен дә бу еллар иң күңеллесе, иң кадерлесе булыр. Кадерле укучылар! Бүгенге көн башка бер тапкыр да кабатланмаячак. Канат яргач, кошлар да оясыннан очып китә. Бүген сез дә шул кошлар хәлендә. Шул ук вакытта бу сезнең иң гүзәл чорыгыз да. Сезнең алда матур киләчәк, якты өметләр, төсле хыяллар. Инде алдагы тормышыгызда юлдаш булырлык һөнәр сайлагансыздыр. Үзегез теләгән белгечлеккә укырга язсын сезгә! Нинди генә һөнәр сайласагыз да, кеше булып калыгыз. Һәр адымыгызны үлчәп атлап, максатларыгызга юл ярыгыз, теләкләрегезгә ирешегез! Чәчәк тотып әле бүген генә Килгән кебек сиңа, мәктәбем. Инде менә сезгә барыгызга Сау булыгыз, диеп әйтәбез. Моңаймагыз әле, укытучылар, Сагынышып сезгә килербез. Озын юллар үтеп, онытмыйча, Сезнең хәлегезне белербез.

9 май – Җиңү көне Совет халкының тиңдәшсез батырлыгын гәүдәләндерә, кешелек тарихының иң куркыныч һәм канкойгыч сугышын искә төшерә, күпмилләтле илебезнең күпмилләтле халкының ныклыгын, рухының бөеклеген дәлилли. Бөек Җиңүнең 77 еллыгы уңаеннан Түбән Мәтәскә авылында куелган һәйкәл янында митинг булды. Мәктәп укучылары "Үлемсез полк" акциясендә катнаштылар.