14 нче февраль көнне мәктәбебездә  февраль ахырында  Россия Махсус Олимпиадасы кысаларында уздырылачак  IX республикакүләм өстәл теннисы ярышларына әзерлек максатыннан теннис ярышы үткәрелде. Җиңүчеләр  8 нче класс укучысы Гарданов Дилфас-1 урын, Газизов Илнур-2 урын, 7 нче класс укучысы Нуретдинов Булат-3 урын, кызлар арасында 7 нче класс укучысы Латыйпова Айсылу-1 урын,  9 нчы класс укучысы Галиева Виктория-2 урын, 5 нче класс укучысы Рәхимова Ләйсән 3 нче урыннарны яулады. Укучыларыбызның зона ярышларында да уңышка ирешүләрен телибез.

             Бүген, РФ эчке эшләр  министрлыгының  Актаныш районы бүлеге  участок инспекторы, Такталачык махсус(коррекцион) интернат-мәктәбенең хокук бозуларны һәм күзәтүчесезлекне кисәтү советы члены  Ф.Ф.Саматов белән очрашу булды. Очрашуда укучыларга  хокук бозуларның нинди аяныч хәлләргә китерергә мөмкин булуы аңлатылды. Профилактик әңгәмә вакытында А.Ф.Саматов  укучыларны кызыксындырган   сорауларга җавап бирде.

     Спорт-сәламәтлек һәм хәрби патриотик айлык планы нигезендә үткәрелгән чараларның чираттагысы  патриотик җырлар конкурсы  укучыларның зур әзерлеге белән үтте. Конкурс вакытында укучылар жюрига  "Солдатта булган диләр", "Солдат буласым килә",  "Бөркетләр", "Салют, сиңа Муса Җәлил!" кебек җырларны тәкъдим иттеләр. Жюри катнашучыларның барысын да җиңүләре белән котлап рәхмәт белдерде, алдагы конкурсларның да зур әзерлек белән үтүен теләде.

    Бүген мәктәбебездә спорт-сәламәтлек һәм хәрби патриотик айлык планы нигезендә 5-9  класс укучылары арасында "Күңелле стартлар" бәйгесе үтте. Физкультура укытучысы А.С.Хазиев үткәргән әлеге чарада укучылар "Ак барс" һәм "Лачын" командаларына бүленеп көч сынаштылар. Саф һавада уздырылган әлеге ярышта  укытучы-тәрбиячеләр һәм башлангыч класс укучыларының  теләктәшлеге, командалар өчен җан атып торулары нәтиҗәсендә дуслык җиңде, ягъни, командалар арасында очколар саны тигез булды. Әлеге бәйге катнашучыларга да, җан атучыларга да бик ошады.

   Бүген  мәктәбебез педагоглары арасында уздырылган шашка турнирының 2 этабы үтте. Бар кешедә зур кызыксыну уяткан әлеге ярышларның финал өлеше  17нче февралькөненә билгеләнде.

    7 нче февраль көнне Такталачык урта мәктәбе базасында үткәрелгән "Йолдызлык-2014"  республикакүләм конкурсының зона этабында  мәктәбебез укучылары уңышлы чыгыш ясап,  жюри тарафыннан рәхмәт һәм "Афәрин" сүзләренә лаек булдылар.

      Спорт -сәламәтлек һәм хәрби-патриотик айлык  планы нигезендә бүген башлангыч класс укучылары  белән "Күңелле стартлар" бәйгесе үтте.  Дәртле  музыка астында кунеллле гимнастика белэн башланган чарада укучылар "Кыюлар" һәм "Җитезлэр"  командасына бүленеп  эстафета ярышларында, капитаннар ярышларында катнаштылар. Бәйгедә "Җитезләр" командасына тиңнәр булмады.

             Матур традициягә әйләнгән "Шәфкатьлелек акциясе" кысаларында  5нче һәм 6нчы   класс укучылары  мәктәбебезнең лаеклы ялдагы хезмәткәрләре Сафуанова Гөлкәй, Шәехова Лениза  апалар янында булып, хуҗалык эшләрендә, кар көрәүдә  булыштылар. Гөлкәй  һәм Лениза апалар укучыларга үзләренең зур рәхмәтләрен, изге теләкләрен җиткерделәр.

            Бүген мәктәбебездә  зур әзерлек белән "Йолдызлык-2014" республика конкурсының мәктәпкүләм этабы   үтте. Конкурста барлык укучылар да үзләренең җыр-биюгә, нәфис сүз сөйләүгә булган осталыкларын күрсәттеләр, сәхнәдә үз-үзеңне тоту күнекмәләрен ныгыттылар. Тамашачыларга концерт бик ошады. Мәктәп дирекциясе әлеге концертта чыгыш ясаучы барлык укучыларга һәм  аларны әзерләүче педагогларга рәхмәт белдерә, алдагы сынауларда да уңышлы чыгыш ясауларын тели.

"Татарстан Республикасы мәгариф учреждениеләренең иң яхшы медицина кабинетлары" республикакүләм конкурсында   мәктәбебезнең медицина кабинеты коррекцион мәктәпләр арасында иң яхшысы дип табылып, 1 нче   урынга ия  булды.