Мамадыш шәһәрендә үткәрелгән Россия IX Махсус Олимпиадасының республика этабы ярышларында 7 класс укучысы Латыйпова Айсылу армрестлинг буенча үз авырлыгында 2 урынга лаек булды. Айсылуны һәм укытучысы Хазиев Алмаз Сәяф улын әлеге җиңүләре белән котлыйбыз, алдагы ярышларда да сынатмыйча, яңа үрләр яулауларын телибез!

      Бүген мәктәбебезнең "Очкын" исемендәге җәйге ял һәм сәламәтләндерү лагерын ачу тантанасы булды. Тантаналы линейкада "Улыбка" һәм "Мушкетёры" командалары калганнарга үзләренең речёвка, девиз һәм җырларын тәкъдир итеп, әзерлекләрен күрсәттеләр. Отряд командирлары лагерь флагын күтәрделәр.Линейка вакытында мәктәп директоры  А.С.Хазиев үзенең котлау сүзеннән соң пионерлар лагеры турында сөйләп үтте һәм төп атрибутикаларыннан берсе булган пионер быргысын чакыру авазы буларак ничек яңгыравын күрсәтте.

     Бүген төшке аштан соң лагерьга йөрүче укучылар өчен Актаныш иҗат үзәгендә урнашкан бассейнга экскурсия оештырылды. Бассейнда эшләүчеләр безне бик җылы кабул иттеләр. Иң элек куркынычсызлык кагыйдәләре аңлатылды , бассейнга керер алдыннан сан-гигиена кагыйдәләре үтәү зарурлыгы кисәтелде һәм шуннан  йөзәргә рөхсәт бирелде.  Суда йөзгәндә вакыт сизелми дә үтте, тагын килергә сөйләшеп, мәктәбебезгә кайттык.

     Бүген лагерьга йөрүче укучылар белән Әҗмәт авылы янындагы Ташъелга  буена экскурсия оештырылды. Экскурсия вакытында төрле кызыклы уеннар белән бергә "Иң күп балык тотучы", "Иң зур балык тотучы" кебек конкурслар оештырылды. Галиева Виктория һәм Исмакаев Илназ "Иң күп балык тотучы" исеменә лаек булдылар.

    1 июнь-Халыкара балаларны яклау көнендә мәктәбебез базасында укучыларыбыз өчен оештырылган "Очкын" җәйге лагере үз ишекләрен ачты.  Укучылар лагерь программасы, кызыклы чараларның планы белән таныштылар. Бүген 2 отряд арасында "Күңелле эстафета" уен-ярышы үткәрелде.

     Бүген мәктәбебездә гомуми ата-аналар җыелышы уздырылды. Иң элек классларда фикер алышканнан соң, барлык укучылар һәм ата-аналар тантаналы линейкага җыелдылар. Мәктәп директоры А.С.Хазиев уку елы дәвамында уку алдынгылар булып танылган укучыларны, сәбәпсез дәрес калдырмаучы укучыларны, спорт-сәнгатьтә актив укучыларны, мәктәп бакчасында тырышып эшләүче укучыларны, мәктәп белән тыгыз элемтәдә торып үзара хезмәттәшлек иткән гаиләләрне  котлап,   иганәчеләр ярдәме белән алынган бүләкләрне тапшырды. Башлангыч класс укучыларын җәйге каникулга озатуны, 5-9 класс укучылары өчен алда мәктәптә лагерь оештырылуын, күңелле яллар көтүен хәбәр итте.

     Мәктәбебезнең чыгарылыш сыйныф укучылары авыл хуҗалыгы хезмәте һәм тегү хезмәте дәресләреннән имтихан тапшыралар. Бүген авыл хуҗалыгы хезмәте буенча  тәүге имтиханны барлык укучылар да уңышлы тапшырды. Укучыларыбызга алдагы имтиханнарны да ныклы әзерлек белән уңышлы тапшыруларын телибез.

    Бүген чыгарылыш класс укучылары өчен соңгы кыңгырау яңгырады. Әлеге истәлекле матур бәйрәмдә район пенсия фонды идарәсе җитәкчесе Д.Г.Әмирҗанов, Такталачык авыл җирлеге башлыгы К.М.Шәйхразиев, Такталачык урта мәктәбе директоры А.Ш.Рахманов , 9 класс укучыларының ата-аналары катнашып, укучыларга үзләренең изге теләкләрен җиткерделәр. Д.Г.Әмирҗанов мәктәп коллективына истәлек бүләге тапшырды.

     Мәктәп яшелчә бакчасында күмәк тырышлык белән бәрәңге утырту оештырылды. Дәрестән тыш вакытларда һәм хезмәт дәресләрендә башка төр яшелчәләр дә утыртылды. . Язгы тырыш хезмәтнең җимеше мул булсын иде, ди укучылар.