Бүген авыл мәдәният йорты каршында Бөек Җиңүнең 69 еллыгына багышланган митинг булды. Әлеге чарада  Такталачык урта мәктәбе  һәм мәктәбебез укучылары мәдәният йорты хезмәткәрләре белән берлектә Бөек Ватан сугышына озату,  тылдагы хезмәт һәм яудан каршылау  күренешләрен  авыл халкына сәхнәләштереп күрсәттеләр, һәйкәлгә венок салдылар.

      Мәктәбебез укучылары авыл хуҗалыгы хезмәте дәресләрендә һәм дәрестән тыш вакытларда язгы бакча эшләрендә актив катнашалар: мәктәп яны тәҗрибә участогын һәм яшелчә, җиләк җимеш бакчаларын чистарталар, җимеш агачларын агарталар, яшелчәләр утыртыр өчен түтәлләр әзерлиләр.

   21 нче апрельдән 27 нче апрельгә кадәр мәктәбебездә Туган тел атналыгы узды. Быел ул Г.Тукай иҗатын өйрәнүгә багышланды.Бу уңайдан стенгазета чыгарылды. Анда Г.Тукайның тормыш юлы һәм иҗаты яктыртылды. Укучылар Г.Тукай иҗаты буенча сорауларга җаваплар эзләделәр. Ә 26 апрель көнне Г.Тукайга 128 ел тулу уңаеннан бәйрәм иртәсе узды.Укучылар Тукай әсәрләрен сәхнәләштереп күрсәттеләр, шигырьләрен яттан сөйләделәр. Бәйрәм Тукай сүзләренә язылган җырлар белән үрелеп барып, күтәренке рухта, күңелле үтте. Әлеге чараларны татар теле укытучысы З.М.Гибадуллина әзерләп үткәрде.

    Түбән Кама шәһәрендә уздырылган столяр хезмәте һәм тегү хезмәте буенча "Лучший по професии-2014" конкурсында мәктәбебез укучылары И.Газизов һәм В.Галиева (җитәкчеләре Р.Ш.Шаймарданов, Г.З.Мусина) уңышлы чыгыш ясадылар. Укучыларыбызны һәм укытучыларны әлеге уңышлары белән котлыйбыз, дәресләрдә алган белемнәрне тормышта уңышлы куллана белүләрен телибез.

     Бүген мәктәбебездә Россия Махсус Олимпиадасының армрестлинг буенча зона ярышлары  үтте. Мәктәбебез командасы әлеге ярышта бу уку елында да сынатмыйча I урынны яулады. Әлеге җиңүләре белән укучыларыбызны һәм тренерлары А.С.Хазиевны, Н.А.Сибгатуллинны ихлас күңелдән котлыйбыз һәм республика этабы ярышларында да җиңү яулауларын телибез.

17 нче апрельдә 1-2 классларда укытучы Набиева Әлфия Гапдерәвеф кызы алдынгы тәҗрибә тарату максатыннан,  сөйләм телен үстерү фәне буенча  ачык дәрес күрсәтте. Укучыларның  дәрестә  “Йорт хайваннары һәм кыргый җәнлекләр”  темасы буенча  алган белемнәрен гомумиләштерү өчен интерактив такта ярдәм итте. Сөйләм  телен коррекцияләү буенча күп төрле күнегүләр эшләнде,уен элементлары укучыларның психофизик үзенчәлекләрен исәпкә алып, урынлы кулланылды.

15 енче апрельдә башлангыч  класс  укытучысы  Ильясова  Кәүсәрия  Зөфәр кызы мәктәбебез мөгаллимнәренә   4 класста математикадан  ачык  дәрес  тәкъдим  итте. Дәрес  күтәренке рухта, бер сулышта үтте. Укытучы  индивидуаль, дифференциал  алымнар  кулланып,укучылар эшчәнлеге белән оста идарә итте. Дәрестә катнашучы барлык мөгаллимнәр дә Каүсәрия Зөфәр кызына, тәҗрибә уртаклашуы өчен зур рәхмәтләрен белдерде.

     Укытучы Р.Ш.Әхмәтова яшь буынны тәрбияләүдә керткән зур өлеше, җәмәгать тормышында актив эшчәнлеге өчен КПРФ Үзәк Комитетының  "Ленин комсомолына 95 ел" истәлек медале белән бүләкләнде. Бүләкне КПРФның Татарстан рескомы беренче секретаре Хафиз Миргалимов тапшырды.

14 енче  апрельдә “Башлангыч  класс  укытучыларының методик атнасы “ кысаларында  3 класста  хезмәттән  “Оригами. “Йорт хайваннары” темасына ачык дәрес күрсәтелде. Башлангыч сыйныф укытучысы  Шаехова Инсия Имамагзамовна оригами белән эшләү тәртибен аңлатты. Дәрестә укучыларда  хезмәткә мәхәббәт тәрбияләде,үз эшләренең нәтиҗәсен күрә белергә өйрәтте.

      Инде өченче ел билгеләп үтелүче "Шаян-шоу" кичәсе бу уку елында да бик кызыклы, күңелле кичә булып үтте. Классларга һәм группаларга бирелгән биремнәргә һәркем җаваплы карап әзерләнгән. Укучылар сәхнәдә үзләрен чын артистларча тотты- тамашачыларны ихлас уеннары белән җәлеп итте.