22 сентябрь көнне оештырылган велосәяхәтнең маршруты Иске Богады һәм Яңа Богады авыллары аша үтте. Форсаттан файдаланып велосәяхәтчеләр Иске Богады авылындагы Богады төп гомуми белем бирү мәктәбендә урнашкан туган якны өйрәнү музеенда булдылар. Велосәяхәттә катнашучыларны авыл башыннан ук мәктәп директоры Васил Максут улы Салихов сәламләп каршылады. Музей белән яшьләрне китапханәче һәм директорның урынбасарлары таныштырды. Музейда булып тарихи экспонатлар белән танышу укучы балалар өчен дә, велосәяхәттә катнашкан яшьләр өчен дә бик кызыклы һәм истә калырлык булды. Ахырда проект җитәкчесе мәктәп администрациясенә истәлек итеп рәхмәт хатлары тапшырды.

Яңа 2022-2023 уку елында мәктәптә һәр атнаның чәршәмбе көнендә Яңа Әлем авылының мөхтәрәм шәхесе - ветеран укытучы Тәхия апа Усманова укучылар белән тирән эчтәлекле әхлак дәресләре уздыра. Үсеп килүче яшь буын өчен бу дәресләрнең тәрбияви әһәмияте бик зур.

С 19 сентября по 24 октября в школах пройдут всероссийские проверочные работы (ВПР) для обучающихся 5-9 классов. Проведение ВПР было перенесено с весны 2022 года на начало нового учебного года.

20 сентябрь көнне юл хәрәкәте иминлеген пропагандалау бүлеге җитәкчесе Ләйсән Рәдиф кызы Мөхәммәтова белән башлангыч сыйныф укучыларының очрашуы булды. Укучылар юлларда имин йөрү өчен нинди кагыйдәләр белергә кирәклеген искә төшерделәр.  Очрашу бик кызыклы узды. Ахырда Ләйсән Мөхәммәтова укучыларга бүләкләр тапшырды. 

Бүген укучыларыбыз «Милләтләр кроссы»нда көчләрен сынады. Балалар һәм укытучылар сәламәт яшәү рәвешен пропагандалады, Яңа Әлем урамыннан йөгереп уздылар. Җиңүчеләр грамоталар белән бүләкләнде.

Бу атнада Яңа Әлем төп гомуми белем бирү мәктәбе укучылары ата-аналарының класс жыелышлары башланды. Көн тәртибендә: ата-аналар комитеты сайлау hәм һәр класста балаларның яшь үзенчәлекләрен исәпкә алып, тәрбияви темаларга чыгышлар ясау. Ата-аналар мәктәп эшчәнлеге, эчке тәртип кагыйдәләре, дәрестән тыш оештырылачак эшчәнлек белән дә танышалар. Җыелышларда барлык ата-аналарның да катнашуы, аларның да әйтер сүзләре бар, битараф түгеллекләрен күрсәтә. 

Кара миләшнең дәвалау һәм авыруларны булдырмау үзлеге борынгыдан ук билгеле булган. Кара миләш йодка бай. Беренче нәүбәттә ул калкансыман биз авыруларын булдырмаска ярдәм итә. Йөрәк һәм кан тамырлары авыруы күзәтелгәндә кара миләшнең суын эчәргә кирәк. 15 нче сентябрь көнне мәктәбебез укучылары да мәктәп яны участогыннан шушы дару чималын җыеп тапшырып, авыруларны дәвалауда узләреннән зур өлеш керттеләр. 

Икенче икмәгебез булган бәрәңге — барыбызның төп ризыгы булып санала. Мәктәбебездә, 5-9 класс укучылары, 14 нче сентябрь көнне бәрәңге уңышын җыюны төгәлләде. 

Карлыган мул уңыш бирсен дисәк, язны көтәргә кирәкми. Көзен күрелгән чаралар җимеш агачларының уңышына зур йогынты ясый. Кайбер бакчачылар куакларны бары тик язын гына эшкәртә. Бу алым чынлап та көзге уңышка нигез булып тора.  Ә көзге тәрбия куакларга җәй буе сарыф ителгән көчне тупларга, кышны имин үткәрергә ярдәм итә. Алдагы елларда да карлыганнан мул уңыш алу максатыннан мәктәп директоры Шарипов И.И. hәм бакча җитәкчесе Гыйльфанов Ф.Н. питомниктан 14 төп карлыган куагы алып кайттылар, шартын китереп утыртуны оештырдылар. 

8 нче сентябрь көнне мәктәбебезнең 7-9 нчы сыйныф укучылары һәм яшь укытучылары, дәресләрдән соң велосәяхәткә чыктылар. Велосәяхәткә киткәнче укучыларга юлда йөргәндә куркынычсызлык кагыйдәләрен үтәү буенча инструктаж үткәрелде һәм имзалар алынды. Һәрбер укучы махсус өс киемнәре һәм баш киемнәре белән тәэмин ителде. Сәяхәт Яңа Әлем авылыннан башланып, Иске Әлем, Чишмә, Меңнәр авыллары буенча булды. Велосәяхәтнең төп максаты – сәламәт тормыш рәвешен пропагандалау, укучыларны авылларның яшәеше, тарихы, күренекле шәхесләре белән таныштыру. Меңнәр авылындагы тукталышта, укучылар төрле кызыклы уеннар уйнадылар, тәмле ризыклар белән сыйланып чәй эчтеләр. Бу көн күңелләрдә озак сакланыр.