Кайвакыт акча өчен түгел, ә йөрәк кушуы буенча файдалы нәрсә эшләргә телисең. Мондый мотивацияле кешеләрне волонтерлар дип атыйлар. Безнең мәктәптә дә волонтерлар бик күп. Бу атнада мәктәбебез волонтерлары мобилизацияләнгән авылдашыбызның әнисенә ярдәм иттеләр.

16 декабрь көнне Яңа Әлем төп гомуми белем бирү мәктәбенең "Үсеш ноктасы" үзәгендә 5-9 сыйныф укучылары өчен "Тормыш өчен болыт сервислары. Саклау һәм эшкәртү" темасына цифр дәресе уздырылды. Дәресне физика һәм информатика укытучысы Шәрипов Илназ Илшат улы үткәрде. Бу дәрестә укучылар челтәрнең нәрсә икәнен, болыт технологияләре төшенчәсенә нәрсәләр керүен һәм аларның ничек эшләвен, Интернет барлыкка килүне, ничек үсеш алганын, болыт тылсымының нәрсә икәнен һәм җыелган мәгълүматны ничек сакларга икәнен белделәр. Бу технологияләр белән эшләүче кешеләрнең һөнәрләре белән таныштылар. Шулай ук, 2022 елда Актаныш районында беренчеләрдән булып Яңа Әлем авылында ВОЛС каналы буенча югары тизлекле Интернет барлыкка килүе турында да белделәр.

Ата-аналар белән эшчәнлекне көчәйтү максатыннан, 13 нче декабрь көнне 3 нче сыйныфта "Ачык ишекләр" көне үткәрелде. Монда әти-әниләр ачык дәресләр карадылар. Үз балаларының белемнәрен бәяләделәр. Дәресләрдән соң сыйныф җитәкчесе Нургалиева Лениза Зәки кызы ата-аналар белән әңгәмә уздырды. Аларны кызыксындырган сорауларга җавап бирде. Дәрес-җыелыш бик уңышлы үтте.

Әгәр дә син бу дөньяда бөтен кешенең дә бәхетле булуын теләсәң, әйләнә-тирәңә әйләнеп кара да, кимендә бер кешегә булса да, яхшылык эшлә. Бу вакытта Җир шарында бөтен кеше дә бәхетле булачак. "Актаныш технология техникумы"нда мобилизацияләнгән райондашларыбызга һәм аларның гаиләләренә ярдәм җыю ноктасы ачылды. Безнең мәктәптән укучылар, әти-әниләр, укытучылар актив катнашып, үзләреннән өлеш керттеләр. Үз изгелекләрегез үзегезгә меңе белән әйләнеп кайтсын! Дөньяларыбыз тыныч, илләребез имин булсын!

13 нче декабрьдә, Казанда Бәшир Рәмиев исемендәге ИТ-паркта «Яңа мәсьәләләр - цифрлы икътисад өчен кадрлар әзерләү» Бөтенроссия форумы уздырылды. Форум эшендә Татарстан Республикасы Премьер-министры урынбасарлары Ләйлә Фазлыева һәм Роман Шәйхетдинов, Татарстан Республикасы мәгариф һәм фән министры Илсур Һадиуллин, Татарстан Республикасы дәүләт идарәсенең, мәгълүмат технологияләренең һәм элемтәсенең цифрлы үсеш министры Айрат Хәйруллин, Россия Федерациясе Мәгариф министрлыгының Мәгариф инициативалары үзәге директоры урынбасары Роман Ершов, мәктәп, көллиятләр һәм югары уку йортлары, эре эш бирүчеләр, дәүләт корпорацияләре вәкилләре һәм башкалар катнашты.

12 декабрь - Россия Федерациясе Конституциясе көне. Класс сәгатьләрендә шул турыда сөйләштеләр.

10 нчы декабрь көнне Бердәм хокук дәресләре узды. Укучылар сорауларга җавап бирделәр, әңгәмә кордылар.

9 декабрь көнне мәктәбебездә "Каз өмәсе" бәйрәме үткәрелде. 2 нче сыйныф укучылары сыйныф җитәкчесе Марданова Фәния Дөфәк кызы җитәкчелегендә авылларда кыш башында үткәрелә торган күңелле йоланы сәхнәләштереп, укучыларга, ата-аналарга тәкъдим иттеләр. Чара бар тамашачының күңеленә хуш килде.

Бүген мәктәптә, инвалидлар ункөнлеге кысаларында, яхшылык, изгелек, ярдәм итү хакында аралашу сәгатьләрендә укучылар фикер алыштылар. Рөстәм Нәбиевнең тормышына багышланган видео карап, сорауларга җавап бирделәр.

Бүген мәктәптә, инвалидлар ункөнлеге кысаларында, "Хәйрия ярминкәсе" узды. Ярминкә авылыбызда яшәүче инвалид балаларга азмы-күпме ярдәм күрсәтү максатыннан оештырылган иде. Биредә укучыларның кул эшләре, әниләре белән бергә пешергән ризыклар шактый иде.