Башлангыч классларда "Сөмбелә" бәйрәме узды."Көзге фантазия" исеме астында күргәзмә оештырылды. Укучылар җырладылар, биеделәр, табышмакларга җавап таптылар. Бәйрәмне 3 нче сыйныф укытучысы Лениза Зәки кызы Нургалиева оештырды һәм алып барды.

Психологик атналык кысаларында мәктәптә класс сәгатьләре узды.

Укучыларыбыз "Чиста яр" акциясендә катнаштылар.

21 нче октябрь көнне, 1 нче сыйныф ата-аналары исеменнән, Басырова Ильбина ризыкның сыйфатын һәм менюга туры килүен, укучыларның туклануын барлау максатыннан ашханәдә булды. Шикаять һәм тәкъдимнәр дәфтәренә үз фикерен язды.
 

20 нче октябрь көнне мәктәбебездә "Туган телне укыту методикасында яңа алым һәм методлар" исеме астында татар теле һәм әдәбияты укытучыларының төбәкара семинары узды. Семинарда районның татар теле һәм әдәбияты укытучылары, Илеш районының Ябалак авылы укытучылары, Мөслим гимназиясенең татар теле һәм әдәбияты, башлангыч класслар укытучылары,  Әлмәт районы Тайсуган мәктәбеннән укытучылар катнашты.

Яңа Әлем мәктәбе "Иң яхшы мәктәп ашханәсе" республика конкурсының район этабында катнаша. Бүген жюри әгъзалары мәктәп ашханәсендә булып, туклану эшчәнлеге белән, ашханәдә булган пешерү җиһазлары, көнлек меню һәм пешерелгән ризыкның сыйфаты, ашханә документациясе белән таныштылар.

1997 елдагы чыгарылыш сыйныф укучылары, быел очрашуга килгәч "Үз мәктәбеңә ярдәм ит!" республикакүләм акция кысаларында, мәктәпкә ярдәм йөзеннән 5000 сумлык сертификат бүләк иткәннәр иде. Әлеге сертификат яңа СанПиНга туры китереп мәктәп ашханәсенә нержавейка кәстрүлләр алганда бик урынлы булды. Мәктәп коллективы, пешекчеләр, укучылар һәм ата-аналар комитеты исеменнән аларга рәхмәтләребезне юллыйбыз!

«Ярдәм янәшә» хәйрия проекты кысаларында, Актаныштагы балалар иҗат үзәгендә мобилизацияләнгән райондашларыбызга һәм аларның гаиләләренә ярдәм җыю ноктасы ачылды. Бүген бу акциягә Яңа Әлем мәктәбе дә кушылды. Әлеге изге эштә катнашып, кирәк-яракларны җыярга булышкан, үз өлешен керткән барлык ата-аналарга, укучыларга, укытучыларга рәхмәтебезне җиткерәбез. Илләребез имин, дөньяларыбыз тыныч булсын!

Дүшәмбе көн Россия Федерациясы, Татарстан Республикасы гимннарын тыңлау һәм Дәүләт флагларын күтәрү тантанасы белән башланды. Линейкадан соң укучылар «Музыка көне»нә багышланган «Мөһим әйберләр турында сөйләшү» циклының чираттагы класс сәгатьләренә юнәлделәр. Бүгенге класс сәгатьләренең максаты: укучыларда музыкага кызыксыну уяту, төрле музыка әсәрләре вакытында тыңлау һәм фантазияләү теләген уятуга багышланган. Дәресләр видеофрагментлар һәм мультимедиа презентацияләр ярдәмендә уздырылды.

Һәр дүшәмбе, Россия мәгариф министрлыгы проектын тормышка ашыру йөзеннән, "Иң мөһим мәсьәләләр турында сөйләшүләр" исемле класс сәгатьләре уза. Темаларны слайдлар, презентацияләр, видеоязмалар белән бергә Россия мәгариф министрлыгы тәкъдим итә. Бу атнада класс сәгатьләре "Әтиләр көне"нә багышланды. Һәр класста шушы тема астында класс сәгатьләре үтте.