1А класс укучылары  Абударова Арина, Измайлова Эльвира, Мансурова Алияна Бөтенроссия «Мөһим сөйләшү» конкурсында катнашып, җиңү яуладылар. Укытучылары Ания Хәсип кызы Мусина. Молодцы!

Районда мобилизованныйларга ярдәм уңаеннан "Шәм яктысы" акциясе игълан ителде. 17-18 нче гыйнвар көннәрендә зур консервный банкалар (ананас, абрикос, горошек, кукурузадан калганнар), шәмнәр җыялар. Янадан шулардан шәмнәр ясыйлар. Бу акциядә гимназиябез укучылары да актив катнаша.

"Ялкын" иҗтимагый балалар оешмасының Яшь ЯХИчеләре - "Светофор" отряды 3в сыйныфы укучылары, класс җитәкчесе Хөббетдинова Диләрә Дуглас кызы белән берлектә, педагог-оештыручылар Аграпова Миләүгә Рәдис кызы, Хафизова Алсу Мирзамөхәммәт кызы җитәкчелегендә "Тормышың үз кулыңда" исемле кичә уздырдылар. ЮХИДИ җитәкчесе Шәмсиев Ренат Радик улы һәм Юл хәрәкәте иминлеген пропагандалау бүлеге җитәкчесе Мөхәммәтова Ләйсән Рәдиф кызы очрашуда катнашып, киңәшләрен биреп, укучыларга төрле бүләкләр - кулланма әсбаплар тапшырдылар.

Гармунчы егетебез – 4Б сыйныф укучысы Лимар Шакиров үзенең уңышлары белән безне сөендерүен дәвам итә. III "Яңа ел йолдызы" республика балалар иҗаты конкурсында катнашып, “Музыка коралларында уйнау” номинациясендә I дәрәҗә лауреат булды ул. Җитәкчесе - Камалов Флүн Фәнил улы. Молодец, Лимар!

Йөзүче егетебез – 5А сыйныф укучысы Мансур Шәрипов та районыбызның “Дулкын” бассейнында әлеге спорт төре белән максатчан шөгыльләнә. Район ярышларында үз яшьтәшләре арасында беренчелек Мансурда! Яңа ел турнирларында да катнашып, Актаныш, Мөслим районнары йөзү ярышларында 1 урын яулады. Брасс техникасы белән йөзүдә дә сынатмады, Мөслимдә, үз яшьтәшләре арасында, 3 урын алды. Молодец, Мансур!

Гимназиябездә  һәр бала үзенчә талантлы. Аның сәләтен, мөмкинлекләрен ачу, үстерү һәм тормышта кулланырга өйрәтүдә һәр көнне кечкенә генә бер адым ясала!
Укучыларны фән олимпиадаларына әзерләүдә дә чагылыш таба ул.Республика олимпиада хәрәкәтендә гимназиябез – әйдәп баручы лидер!
Бөтенроссия фән олимпиадаларының республика этабына быел да зур әзерлек белән килдек. Олимпиадага әзерлек буенча КФУ галимнәре үткәргән
онлайн дәресләр дә укучыларыбызга бик ошый.
Фотода галимә Рәмилә Камил кызы Сәгъдиеваның онлайн дәресендә 5-10 сыйныф укучылары татар теле һәм әдәбияты укытучысы Чулпан Рәмзил кызы Шәрипова белән.

Гимназиябезнең рус теле һәм әдәбияте укытучысы Энҗе Фирдәвис кызы Шәгъзамова 7-10 сыйныф укучылары белән КФУның педагогика фәннәре кандидаты, доцент Елена Ильдар кызы Әюпованың онлайн дәресендә - рус теленнән олимпиадага әзерлек.

Гимназиябездә бүген тагын бер күңелле вакыйга - 2023-2024 уку елына 1 сыйныфка укырга керәчәк балаларның әзерлек курслары башланды.

10 сыйныф укучыларын һәм ата-аналарын котлыйбыз, сөенечләрен уртаклашабыз! "Тату сыйныф серләре" конкурсында районда 1 урын алып, Казан шәһәренә экскурсия белән бүләкләнде алар! Молодцы!

Гимназиябезнең 1Б сыйныф укучылары да физкультура дәресендә ачык һавада - сыйныф җитәкчесе Гөлназ Дильшат кызы Солтанова белән чаңгыда дөрес техника белән шуу күнекмәләренә өйрәнәләр.