27 гыйнвар көнне интернатта 7 сыйныф кызлары тәрбиячеләре Латыйпова Ләйсән Рафис кызы җитәкчелегендә төчегә пончик-кабартма һәм кыстыбый пешерделәр. Тәмле ризыкны пешерү дә, авыз итү дә балаларга бик ошады.

"Сәламәт тәндә - сәламәт акыл" девизы астында интернатыбызда спорт ярышы - җомга чарасы узды. Тәрбияче Зөлфия Зает кызы Исламова үткәргән чарада балалар бик теләп катнашты.

Бөтенроссия олимпиадасының төбәк этабында химиядән гимназиябезнең 8В сыйныфы укучысы Румил Хаҗиев призер булды. Укытучысы Рузилә Илдар кызы Гарипова. Котлыйбыз!

Бөтенроссия олимпиадасының төбәк этабында рус теленнән 7А сыйныфы укучысы Авзалова Амелия (укытучысы Гыйльфанова Изалия Изаиловна), 8А сыйныфы укучысы Шакирова Лиана (укытучысы Шәгъзамова Энҗе Фирдависовна) призер булдылар. Котлыйбыз!

Бүген – 30 гыйнвар көнне, гимназиябездә «Разговоры о важном – Мөһим темага сөйләшү» сыйныф дәресләре «Беренчеләр хәрәкәте» Россия балалар һәм яшьләр хәрәкәтенә багышланды.
2022 елда Россия Президенты Владимир Путин фәрманы белән яңа бөтенроссия балалар һәм яшьләр хәрәкәте барлыкка килде. Ул илдәге яшьләрне берләштерәчәк. Хәрәкәт булдыру турындагы закон проекты Дәүләт Думасына В. И. Ленин исемендәге Бөтенсоюз пионер оешмасының 100 еллыгы көнендә кертелгән. Оешмага балаларны алты яшьтән кабул итәчәкләр, һәм аның сафында мәктәп яки көллиятне тәмамланганчы булырга мөмкин булачак.
Хәзерге вакытта ил буенча «Беренчеләр хәрәкәте» бүлекләре ачыла. Татарстанда «Беренчеләр хәрәкәте» Россия балалар һәм яшьләр хәрәкәтенең республика бүлеге җитәкчесе Тимур Сөләйманов.
Әлеге фотода 4Б сыйныфы укучылары класс җитәкчесе Зөлфирә Фазлетдин кызы Кашапова белән дәрес вакытында.

Бүген Яр Чаллы дәүләт педагогика университеты вәкилләре 11 сыйныфы укучылары, әти-әниләре, укытучылар белән онлайн-очрашу үткәрде. Математика һәм информатика факультеты деканы, педагогик фәннәр кандидаты Елена Леонидовна Краснова югары уку йортына керү мөмкинлекләре һәм тәртибе белән таныштырды. Укучылар шулай ук НГПУДА уку бүлекләре һәм юнәлешләре белән таныштылар.

Атналык дүшәмбе линейкасы бүген дә дәүләт флагларын кертүдән башланды. Гимназиябезнең “Ялкын” балалар оешмасы президенты – 10 сыйныф укучысы Айнур Гилаев, гадәттәгечә, линейканы гимназиянең сөрәне белән башлап җибәрде.
Директорның тәрбия эшләре буенча урынбасары Ленар Зөфәк улы Шәвәлиев узган атнага йомгак ясап, атна дәвамында эшләнәсе эшләргә, чараларга тукталды. Шуларның берсе, ел да көтеп алынганы – Студентлар очрашуы. Хөрмәтле студентларыбыз, яшьлек сулышы, яңа идея, фикерләр, күтәренке кәеф, сөенечле яңалыкларыгыз белән көтеп калабыз сезне!
Узган атнада 5А сыйныфы кизү торды. Атна дәвамында мәктәптәге тәртипне саклады алар, үз-үзләрен тотышлары белән дә үрнәк күрсәттеләр. Кизү торуга хисапны да бик җентекле ясады алар. Бу атнада гимназиябездә 10 сыйныф укучылары дежур тора.
Бөтенроссия фән олимпиадаларының ресрублика этабында укучыларыбыз катнашып, узган атнада да җиңүләр күп булды! Аларны да тантаналы линейкада хөрмәтләдек.
“Тату сыйныф серләре” республика бәйгесенең зона этабында җиңү шатлыгын да бергәләп уртаклаштык.

Егет кешегә җитмеш төрле һөнәр дә аз, диләр! Безнең егетләр барысын да булдыра. Интернатыбызның 10 класс егетләре һәр эшкә дә оста. Тәмледән тәмле кыстыбый, пицца пешерү серләрен дә беләләр. Тәрбиячеләре Миләүшә Хаҗиева белән һәрвакыт тәмледән-тәмле камыр ашлары пешерә алар.

Гимназиябезнең методик һәм инновацион эшчәнлек буенча директор урынбасары Юлия Валентин кызы Әмирҗанова, башлангыч сыйныфлар укытучысы Илиза Энгель кызы Ахунова, төрек һәм инглиз теле укытучысы Румия Данис кызы Темел бүген "Адымнар-Алабуга" полилингваль белем бирү комплексында узучы семинарда катнаша.Телләрне өйрәнүдә дәрестән тыш эшчәнлек буенча тәҗрибә уртаклашалар, методик эшчәнлек буенча яңалыклар белән танышалар.

Актаныш районының 2022 ел йомгакларына багышланган алдынгылар слетында һәр тармакның алдынгылары, үз хезмәтенең осталары бүләкләнде. Тагын бер сөенечебез – гимназиябез директоры Венера Хәмәтнәсыйх кызы Хәева-Хәмәтҗанова "Ел җитәкчесе" номинациясендә җиңү яулады. Актаныш районы башлыгы Ленар Рафак улы Зарипов Венера Хәмәтнәсыйх кызына рәхмәт белдереп, "Үз һөнәренең остасы" билгесен һәм акчалата бүләк тапшырды.

Венера Хәмәтнәсыйховна, Сезне чын күңелдән тәбрик итәбез! Киләчәктә дә күркәм эшчәнлек һәм уңышлар телибез!