Мәктәп туры олимпиадалары башланды. Бүген тарих фәне буенча  5-11 класс укучылары үзләренең белемнәрен сыный. Укучыларга уңышлар телибез!

Җәйге каникул вакытында 11 класс укучысы Исламов Дилүс  Зәйдән ДДТ командасы составында IV республикакүләм яшь геологларның ачык кыр олимпиадасында катнашты. Олимпиадада  38 команда үзара көч сынашкан. Районыбыз командасы - 17 нче урында. Командалар арасында Кырым, Казахстан һәм башка ерак илләрдән катнашучылар, ягъни командалар чыгыш ясаган. Афәрин, Дилүс!

Мәктәп территориясендә укучылар  көзге эшләр башкардылар: бакча чистарттылар, чөгендер, кишер алдылар, түтәлләр казыдылар, коелган яфраклар җыйдылар.

Проект эше укучыларның иҗади сәләтен ачарга ярдәм итә. Шул уңайдан "Фонтан" иҗади проектына бүген нигез салынды. Укытучылар һәм югары класс укучылары бу эшне башлап җибәрделәр.

Районыбызда “Көзге ярминкә” оештыру матур бер традиция булып кереп китте. Шул нигездә бу бәйрәм бүген дә уздырылды. Быел да көзге уңышыбыз күп булды. Аларны халыкка тәкъдим итүдә мәктәбебез хезмәткәрләре катнашты.

16 нчы сентябрь көнне Зәй районында мәктәп директорлары арасында республика күләмендә мини-футбол буенча зона ярышлары булып узды. 

Һәр мәктәптә дә музей почмаклары бар. “Туган якны өйрәнү” музее белән бүген 1 нче класс укучылары таныштылар. Музеебызда  экспонатлар күп. Кайсы гына әйберне кулга алмыйк, анда тарих чагыла, бизәнү әйбереме ул, сугыш чоры хатларымы, элеккеге йорт җиһазымы... Әйе, музей – хатирәләр почмагы.

Район күләмендә узачак ярминкәгә мәктәбебездән алып барырдай яшелчәләр бик күп. Аларны бары тиешенчә чистартырга, юарга гына кирәк. Бүген укучылар укытучылары белән бергә бакчада кайнаштылар.

Сентябрь - беренче класс укучыларының мәктәпкә җайлашу, ияләшү айлары. Әкренләп алар беренче укытучылары Рамилә Нәҗиповна белән язу-сызу һөнәрләренә төшенерләр, белем өлкәсендә тәүге тапкыр алган уңышлары белән якыннарын сөендерерләр. Уңышлар аларга!

"Милләтләр кроссы" күпмилләтле илебез халкын тагын да берләштерә. Ул гади спорт ярышы гына  түгел. Анда катнашып, үзеңне спортчы буларак күрсәтергә була. Яхшы нәтиҗәләргә ирешү спорт өлкәсендә һөнәри карьераның башлангычы булырга мөмкин. Димәк, “Милләтләр кроссы – 2017” – үзеңне сынап карау өчен өчен менә дигән ярыш ул.  Мәктәп укучылары да бүген әлеге чарада бик теләп катнаштылар.