Татар теле атналыгы дәвам итә. Халкыбызның матур йола уеннарын искә төшереп, 4 Б сыйныфы укучылары "Кичке уен" күрсәттеләр. Чара балаларны тәрбияләү рухында барды : беренчедән, алар халкыбызның гореф-гадәтләрен искә төшерсә, икенчедән, милләтара дус яшәү идеясен алга сөрде.

Татар теле һәм әдәбияты атналыгында 8 А һәм  8 Б сыйныфлары " Тапкырлар һәм зирәкләр" уенын, кыскасы, ТАТАРЧА КВН күрсәтте. Сыйныфлар ике командага  бүленеп,   татар теле һәм әдәбияты дәресеннән алган белемнәрен ныгытып, халык авыз иҗаты белән бәйле рәвештә, бик мәзәкчән, чын мәгънәсендә, тапкырлыкта һәм зирәклектә сыный торган уен күрсәттеләр. Очколарны "Тапкырлар" командасы бик тапкыр булып ,  "Зирәкләр" командасы  бик зирәк  булып , һәр биремдә бер-берсенән уздырып  ярышсалар  да, ахыр килеп, очколарның тигез булганлыгы ачыкланды. Шулай итеп, ДУСЛЫК җиңде! Афәрин !

Бездә инглиз теле атналыгы бара. Атна дәвамында гимназиянең актлар залында төрле мавыктыргыч чаралар уздырылып килә. Менә бүген дә шуның чираттагысы узды. 5нче сыйныфлар катнашындагы «Funny English» викторинасы һәр тамашачының күңеленә хуш килде. Викторина балаларның инглиз теле дәресендә алган белемнәрен актуальләштерүне, укучыларның иҗади сәләтләрен үстерүне, үзара ярдәмләшеп эшләргә өйрәтүне максат иткән. Һәр ике команда да «Solve the riddles» , «Some English proverbs», «My family», «Captain’s competition», «Artist’s competition» , «Who knows English better?» дип аталган 6 турны уңышлы узып , бермә –бер тигез очколарда барган ярыш дуслык хисабына төгәлләнде.

14 октябрь көнне 6 А һәм 6 Б сыйныфлары катнашында инглиз телендә брейн-ринг «Кызыклы фактлар» интеллектуаль уены үткәрелде. Алтышар укучыдан торган 2 команда инглиз телендә пассив юнәлешне куллану күнекмәләре буенча үзара көч сынашты. Уен барышында төрле категориядәге сораулар яңгырады: “ Уйлап табучылар һәм ачышлар”, “ Кайда нәрсә үстерәләр?” , “Китаплар һәм язучылар”, “Автомобильләр” , “Болар нәрсәдән ясалган?”. 

Совет чорының тагын бер матур мирасын, традициясен яңарту инде бу. Максатлары да игелекле: массакүләм спортны үстерү, физик сәламәтлекне ныгыту... Ирешкән казанышларына карап, һәр баскычта норма тапшыручылар “ГТО” дигән алтын яки көмеш значоклар белән бүләкләнәләр, тиешле нормаларны берничә ел рәттән үтәүчеләргә “Мактаулы ГТО значогы” тапшырыла. Гимназиядә шундый уңышка ирешкән укучыларны значоклар белән бүләкләү тантанасы булып узды:Габдрахманова Алсу 7а, Ахророва Зөлфия 7а ,Салбанова Айбикә 7б, Пасыева Рената 7б, Абросимова Лидия 9а, Абдрахманова Аида 9б, Головина Ксения 9б, Хисаметдинова Лейсан 9б,Файзуллина Динара 10 А. Иң кызыгы: араларында бер егет тә юк. Афәрин , кызлар! Котлыйбыз!

Сез юл йөрү кагыйдәләрен беләсезме? Бу сорауга мәктәп яшендәге балаларның  күпчелеге, һичшиксез, «Әйе» дип җавап бирәчәк. Әмма һәрбер мәктәптә диярлек бу кагыйдәләрне үзләре белеп кенә калмыйча, башкаларга да өйрәтүче балалар бар. Яшь инспекторлар алар. Әлеге фотодагы гимназия укучылары 13нче  октябрь көнне “Яшь инспекторлар” отрядына кабул ителделәр. 

Инглиз теле – Англиянең рәсми теле, АКШ халкының (31 штатта рәсми тел) туган теле; Ирландия, Канада, Мальта, Австралия, Яңа Зеландия дәүләтләрендә рәсми тел. Шулай ук, Азия дәүләтләрендә рәсми тел булып кулланыла . Википедия материалларына караганда, инглиз теле туган телләре булган кешеләрнең саны якынча 410 млн кеше, инглиз телендә сөйләшкәннәр саны, якынча, 1,8 млрд кеше булып , ул бүген төп халыкара аралашу теле ролен үти. Инглиз теле атналыгы уңаеннан, 7нче сыйныфлар арасында «English-Speaking Countries » темасына викторина булып узды. 

«Китап — бакча, андагы язулар — шул бакчаның гөлләре», — ди К. Насыйри. Кем укымый, шул бернәрсә турында да уйламый. Белем алуның иң яхшы юлы — уку. Тиеннәрдән сумнар җыелгандай, укылган бөртекләрдән белем туплана. Китап битләре, керфекләр кебек, күзне ачалар. Балаларда китапка , китап укуга мәхәббәт уяту, шул хисаптан, гимназия китапханәсе фондын фәнни-популяр, белешмә һәм матур әдәбият белән баету максатыннан, гимназиядә “Китапка гомер бүләк ит” акциясе дәвам итә. Акциядә әлегә 4 сыйныф актив катнаша. Алар арасында 40 китап тапшырып , 6 Б сыйныфы лидерлык итә. Афәрин! Сыйныфлар! Калышмагыз! Акциядә катнашып калырга ашыгыгыз.

11 нче октябрь көнне Вахитов һәм Идел буе районы мәктәпләреннән , мәктәпкәчә тәрбия оешмаларыннан, реабилитация үзәкләреннән һәм өстәмә белем бирүче уку йортларыннан  900ләп  укытучы гимназиядә аттестация тесты узды. Алар арасында фән укытучылары һәм тәрбиячеләр белән беррәттән , укытучы – логопед , укытучы – дефектолог, педагог – психолог, өстәмә белем бирүче педагог, армспорт буенча тренер кебек сирәгрәк һөнәр ияләре дә бар иде. 
 

Киләсе атнадан  гимназиядә   фән атналыклары старт алыр дип көтелә!