Кадерле ир-ат укытучылар һәм укучы егетләр! Сезне чын күңелдән 23 февраль - Ватанны саклаучылар көне белән котлыйбыз! Сезгә ныклы сәламәтлек, озын гомер, эшегездә һәм укуыгызда уңышлар телибез!

23 февраль - Ватанны саклаучылар көне уңаеннан 10нчы сыйныф укучылары (кл. җитәкчесе Мөхммәтханова Г.М) кичә-концерт күрсәттеләр. Бию, җыр, уен, сораулар бирү бәйрәмгә ямь өстәде.

Егет булса, эшләр эше булсын,

Тормышының булсын мең яме.

Көч-куәте булсын йөрәгендә

Ә җанында - һәрчак ил гаме.

Мәктәп һәм мәдәният йорты белән берлектә үткәрелгән әлеге кичә гүзәл бер сәхифә булып калыр.

Бүген 5нче сыйныф укучылары класс җитәкчеләре Гильманова Р.Г белән һәйкәл-обелискка шефлык иттеләр. Үзләрен дә узып киткән кар көртләре белән балалар бар көчләрен куеп "көрәштеләр". Алардан соң һәйкәл чистарып, ямьләнеп калды. Айлык план нигезендә планлаштырылган венок салу өчен һәйкәл әзер булды. Бөек Ватан сугышында һәлак булучыларны онытырга ярамый!!!

        Укытучы Мөхәмәтханова Г.М.  21 февраль- Халыкара Туган тел көне уңаеннан кичә уздырды. Кичәдә туган телнең әһәмияте аңлатылды, укучылар иҗат иткән әкиятләр, шигырьләр яңгырады. Җырлар да бәйрәмгә ямь өстәде.

        Мәдәният йорты белән берлектә уздырылган кичә күмәк рәвештә "Туган тел" җырын башкару белән тәмамланды.

Бүген мәктәбебездә зур яңалык- мәктәп радиосы эшли башлады. Тәнәфесләр вакытында  укучылар атналык яңалыклар, ирешелгән уңышлар, укучыларның иҗат җимешләре белән таныштырып бару өчен радио эшләү бик уңай. Бүген "Туган тел" көне уңаеннан дикторларыбыз Минанхуҗин И., Зайнуллин Б. шагыйрьләребезнең туган тел турында шигырьләрен укыдылар, Г. Тукай сүзләренә иҗат ителгән "Туган тел" җырын башкардылар, туган тел турында әйтем һәм мәкальләр укып туган телгә булган ярату хисләрен белдерделәр . Бүгенге яңалыкны мәктәп коллективы уңай кабул итте. 

11 сыйныф укучысы Дәүләтова Альмира эзтабарларның яраткан вожатые.Альмира  "Иң шәп вожатый!" конкурсында катнашып район этабына чыкты.  Альмирага алдагы ярышларда уңышлар теләп калабыз.

Сәламәтлеккә зыян салучы факторлар турында даими сөйләшүләр оештырыла.Бүген укучылар өчен "Сагыз һәм аның сәламәтлеккә зыяны " дип аталган видеофильм күрсәтелде.Соңыннан укучылар белән фикер алышу оештырылды. Барыбыз да яратып чәйни торган күп төрле сагызларның кеше организмы өчен әйтеп бетергесез зыянын белү укучылар өчен яңалык булды. Алар моннан соң сагыз чәйнәү белән мавыкмаслар. 

Бөек Җиңүнең 70 еллык юбилее уңаеннан "Җиңүне якынайткан көннәр" дип аталган рәсемнәр конкурсы булып узды.Әлеге конкурска 1-8 нче сыйныф укучылары бик теләп катнаштылар.

Бүген мәктәп күләмендә китапханәче Гильманова А.Н. 1-8 сыйныф укучылары белән берлектә "Патриот шагыйрь" дип аталган кичә үткәрде. Кичә барышында укучылар кабат Муса Җәлилнең тормыш юлы һәм иҗаты белән таныштылар, шигырьләрен сәхнәштерделәр, презентация карадылар. Әлеге кичә укучыларга әхлак һәм патриотик тәрбия бирү юнәлешендә уңышлы булды. Рәхмәт сезгә!

Февраль ае укучыларга патриотик-гражданлык тәрбиясе бирү айлыгы. Шушы айлык кысаларында бүген мәктәп күләмендә "Әфганстан-йөрәк ярасы" дип аталган кичә оештырылды. ОБЖ укытучысы Ахметов А.Х. укучыларны Әфганстан сугышы тарихы белән таныштырды, авылыбыздан һәм районнан Әфганстан сугышында булган солдатлар турында презентация күрсәтелде. Кичә ахырында укучылар видеофильм карадылар.