Биек булып, ап-ак булып,

Урамга ак кар яуган.

Көне буе шау-гөр килеп

Шуабыз шул ак таудан.

Шундый якты, шундый нурлы -

Бөтен дөнья ак кына...

Ап - ак була белә шулай

Безнең туган як кына.

Су буенда, ком өстендә

Уйныйбыз төрле уен.

Уйнап туйгач, чүп-чарлардан

Чистартабыз яр буен.

Дулкыннар да чүпне судан

Күтәреп ярга ата.

Димәк, алар да, безнең күк,

Чисталыкны ярата.

Фокусчы фокус күрсәтә,

Карап тора бар кеше.

Ышанмастай эшләрне ул

Ышандырырлык эшли:

Юк нәрсәне бар итә ул,

Салкын суны ут итә.

Таяк белән бер селтәнсә,

Күгәрчен очып китә.

Авызыннан ут бөрки ул,

Аҗдаһа дип белерсең.

"Мин хәйләли белмим, - ди ул, -

Күрсәтәм, - ди , - дөресен..."

Сөенәбез, шатланабыз,

Күңелле үтә кышлар.

Чаңгы, чана, тимераяк -

Безнең иң якын дуслар.

Менә тагын бәйрәм килде

"Бәләкәч" бакчасына,

Сокланып карап туймаслык

Яңа ел чыршысына.

Урамнардагы җемелдәп янган төрле-төрле утлар, бизәлгән чыршылар, Кыш бабай һәм Кар кызы, әкият геройлары сыннары – болар һәммәсе дә күңелдә кабатланмас Яңа ел рухын тудыра. Быел да без бакчабызда тырышып, кар сыннары ясадык. Тырышлыгыбыз юкка түгел, безнең бакча менә ике ел рәттән инде кар сыннары ясау буенча беренче урынны яулады.  Бакчага килеп керү белән үзеңне әкият илендә кебек хис итәсең. 2013 елда республикабызда үтәчәк зур вакыйга –универсиадага багышланган сыннарны да күрергә мөмкин. Сыннар үзләренең матурлыгы һәм бизәлешләре белән җәлеп итеп торалар. Бу сыннар балаларның күңелләренә матурлык һәм соклану хисләре уяттылар.

Яңа еллар килсен бәхет алып,

Яңа еллар килсен елмаеп,

Күңелләрдә мәңге шатлык булсын,

Яшәмәгез дуслар моңаеп.

Кыш бабай, кыш бабай,

Безне бик ярата.

Ул безгә яңа ел,

Бүләге тарата.