15 октябрь көнне иң зур дини бәйрәмнәрнең берсе булган Корбан гаетен билгеләп үттек. Ураза бәйрәменнән соң 70 көн узгач билгеләп үтелүче Корбан гаете көнне Аллаһы ризалыгы өчен корбан чалына. Бу көнне барлык мөселман халкы бәйрәм итә.

  Балалар да белгән догаларын матур итеп сөйләп күрсәттеләр.

Сабабызның беренче номерлы гимназиясенең ишек алдында урнаштырылган Советлар Союзы герое Гали Закиров бюсты янында балаларга аның тормышы, сугыштагы батырлыклары турында аңлатылды.

   Борын-борын заманнарда

   Саба җире туган, ди.

   Безнең әби-бабайлар

   Шушы җирдә торган, ди.

Ул бабайларның кулыннан

Һәр эшләр дә килгән, ди

Эшен алып, дөнья буйлап

Сәүдә дә иткәннәр, ди.

   Байлар Сабасының  2-нче номерлы “Әллүки” балалар бакчасында  мәктәпкә әзерлек төркеме тарафыннан әзерләнгән  “Минем авылым, минем илем” дигән  атналыкның йомгаклау эшчәнлеге “Туган авыл буйлап сәяхәт” дигән күңел ачу чарасы шушы шигырь белән  башланып китте. Балаларны  Байлар Сабасының үткәне, хәзерге көне белән таныштыру слайдлар күрсәтү, шигырьләр сөйләү, Саба турында җырлар җырлау белән үрелеп барды. Әби-бабаларыбыз уйнап үскән  “Чума үрдәк, чума каз”, “Кәрия-зәкәрия” дигән борынгы татар халык уеннарын балалар бик теләп уйнадылар.

8 – 15 октябрь көннәрендә, безнең районда , 5-17 яшькә кадәрле балалар арасында “Җырлы балачак” конкурсы башланды. Комиссия составы безнең балалар бакчасында булып китте. “Һаман бию кызык шул” дигән җырны балалар уен коралларында уйнап, җырлап-биеп күрсәттеләр:

Әйе шул, шулай шул,

Менә шулай кызык ул.

Такмак әйтеп кул чапканга

Һаман бию кызык шул.

Алдагы чыгышыбыз октябрь азагында-финалда булачак. Балаларга уңышлар теләп калабыз!

Без зурлар төркеме балалары белән  "Туган якны өйрәнү музее" тарафыннан оештырылган Байлар Сабасының күренекле урыннары буенча  экскурсиядә булдык. Чараның максаты: балаларга кече яшьтән патриотик тәрбия бирү, бистәбезнең тарихи, истәлекле урыннары, һәйкәлләре белән танышу. Бу атнада эшчәнлегебез дә "Минем авылым, минем илем" темасы буенча алып барылды.

Авылыбыз хәбәрчесе, язучысы Закир Юсуповка яшәгән йорка куелган мемориаль   такта янында булдык.

Бүген, 11 октябрь көнне безнең “Әллүки” балалар бакчасында “Икмәк – тормыш нигезе” дигән тема астында  атна буе өйрәнгәннәрне йомгаклау эшчәнлеге узды. Балалар атна буенча икмәкнең өстәлгә ничек килүе турында сөйләштеләр, мәкальләр, әйтемнәр, шигырьләр, җырлар өйрәнделәр. Балалар презентация аша икмәк турында видеоролик карадылар. Балаларда икмәккә карата сак караш, мәрхәмәтлелек, өлкәннәр хезмәтенә карата ихтирам хисе тәрбияләнде.