Бүген класс җыелышлары, ә аннан соң гомуми ата-аналар җыелышы узды. Җыелышның көн тәртибе:

1.     “Балаларга хезмәт тәрбиясе бирү үзенчәлекләре”  темасына лекция (лектор- Сәйфиева Р.В.)

2.     “Балалар һәм яшүсмерләр арасында суицидларны кисәтү” темасына чыгыш (чыгыш ясаучы -Измайлова Г.М.)

3.     1нче яртыеллык нәтиҗәләре (  укыту эшләре буенча директор урынбасары Габделхаева Р.Р. чыгышы)

4.      Уку елының 1нче яртыеллыгын йомгаклау, алда торган бурычлар (мәктәп директоры Галияхметов Р.Р. чыгышы). Чыгышлардан соң мәктәп директоры Роберт Рашитович әти-әниләрне кызыксындырган сорауларга җавап бирде. Җыелышта 98% әти-әни катнашты.

Бүген  кышкы каникул тәмамланып, уку елының 3нче чиреге - 2нче яртыеллыгы башланып китте. Бу чирек иң озын һәм иң җаваплы чор дип санала. Иртәнге линейкада, укучыларны каникул чорындагы ярышларның нәтиҗәләре белән таныштырганнан соң, мәктәп директоры Роберт Рашитович   әнә шул турыда искәртте һәм һәркемгә саулык-сәламәтлек, уңышлар теләде.

Бадминтон- безнең укучыларыбыз өчен спортның яңа төре. Бу уку елында гына физик тәрбия укытучысы Раил Рашитович җитәкләгән түгәрәккә язылып, укучылар бадминтон белән яратып шөгыльләнә башлады. 14нче гыйнварда спортның әлеге төре буенча узган ярышларда 11 класс укучысы Шакиров Илсаф, 6 класс укучысы Ибатова Эльмира2 урынга лаек булдылар. Хадиев Ирекнең район күләмендә 4нче, Хасанова Гөлназның 5нче урын алуы да куанычлы. Бадминтон белән мавыгучы һәркемгә алга таба да уңышлар телибез.

Бүген 5, 6, 7 класслардан 12 укучы класс җитәкчеләре Резеда Вакифовна, Чулпан Рафиковна белән "җәйдә кунакта булдылар".  "Саба" бассейнына бару һәр балага онытылмас мизгелләр бүләк итте. Тышта ябалак кар явып торганда, классташларың белән бассейнда йөзү- үзе бер бәхет.

Бүген башлангыч класс укучылары өчен "Күңелле стартлар" оештырылды. Төрле ярышларда балалар үзләрен җитезлектә, бердәмлектә сынап карадылар. Уенны башлангыч класслар укытучысы Рәмзия Накиповна уздырды.

9 январь көнне 7 класс укучылары класс җитәкчеләре Сиринә Зәкиҗановна белән башкалабыз Казанда экскурсиядә булдылар. Сәяхәтләрен Бауман урамы буйлап йөрүдән башлап җибәрделәр. Аннан соң Татарстан Республикасы Милли музеенда булып бик кызыклы экспонатлар белән таныштылар, "Ел фасыллары" күргәзмәсен карадылар. Кәрим Тинчурин исемендәге драма һәм комедия театрында   Ш.Фәрхетдиновның "Мәхәббәт баскычы" комедиясен карадылар. Экскурсия бик мавыктыргыч булды,  укучылар әлеге сәяхәттән канәгать алдылар.

Каникул көннәре булуга карамастан, мәктәптән укучылар өзелми. Бүген 11 класста ЕГЭга, 9 класста ГИАга әзерлек буенча консультацияләр узды. "Күңелле сәхнә" түгәрәгенә йөрүчеләр җитәкчеләре Гөлсу Рафикҗановна белән әкият өйрәнүләрен дәвам иттеләр.

Мини-футбол ярышларының финалында катнашу хокукы яулаган командабыз бүген, 6 январь көнне, район буенча 4нче урынга чыкты. Афәрин, егетләр!

Күңелле  кышкы каникул дәвам итә. Бүген 6 класс укучылары класс җитәкчеләре Резеда Вакифовна белән "Нарат" боз сараенда булдылар.  Классташлар белән бозда шуу шундый рәхәт булган- 1 сәгать вакыт 1 минуттай узган да киткән.

Бүген Килдебәк урта мәктәбе базасында узган мини-футбол ярышларында безнең мәктәп командасы да катнашты. Командабыз, уңышлы уйнап, ярышның алдагы этабында катнашу хокукына лаек булды. Аларга 6 январь көнне булачак уенда да уңышлар телибез.