Башлангыч классларда "Сәламәт гаиләдә- сәламәт бала" темасына дәрес спорт залында үтте. Дәрес башында разминка ясаганнан соң, сәламәтлек шарты булган төп кагыйдәләр  искә төшерелде, бергәләп спорт белән шөгыльләнүче гаиләләр ачыкланды.  Аннан соң узган "Күңелле стартлар"да 2 команда үзара җитезлекләрен, тизлекләрен һәм көчләрен сынадылар. Нәтиҗәдә "Олимп" командасы җиңү яулады. Дәресне педагог-оештыручы Шафикова Г.Р. уздырды.

9-11 классларда "Сәламәт гаиләдә-сәламәт бала" темасына  дәрес  шушы темага видеоязма карау белән башланып китте. Дәрес вакытында укучылардан алынган анкета сорауларына анализ ясалды. Презентация  ярдәмендә сәламәтлекнең үз кулыбызда булуы, иң төп тәрбиянең  гаиләдә бирелүенә басым ясалды. Сәламәтлек формуласы тәкъдим ителде. Дәрес ахырында укучылар тест сорауларына җавап биреп, үз сәламәтлекләре торышы турында нәтиҗә ясадылар. Дәресне тәрбия эшләре буенча директор урынбасары Измайлова Г.М. уздырды.

Бүген барлык укучылар, укытучылар һәм хезмәткәрләр "Россия чаңгы юлы-2014" ярышларында катнашты. Кышкы матур аяз көн, ярышларда катнашкан  һәркемне тәмле коймак һәм кайнар чәй белән сыйлау бу чараны тагын да ямьләндерде. 

Бүген мәктәбебезнең педагог-оештыручысы Гүзәлия Рамилевна   Сатыш урта мәктәбендә узган "Иң яхшы педагог-оештыручы"  бәйгесенең финалында катнашты. Ул 6 класс укучылары  белән "Без беребез дә сәләтсез түгел" дигән темага оешма җыены уздырды.

Бүген мәгариф хезмәткәрләре арасындагы Спартакиаданың соңгы ярышлары узды. Идәннән этелү буенча китапханәче Башарова И.Р., турникта тартылу буенча технология укытучысы Вилданов Н.М., аркан тартуда мәктәп директоры Мухаметзянов Р.Р., физик тәрбия укытучысы Мубаракзянов Р.Р. ,технология укытучысы Вилданов Н.М., технология укытучысы Шакирова Л.Г., башлангыч класслар укытучысы Багманова Р.Н. көч сынаштылар. Дартс буенча Мубаракзянов Р.Р. 1нче, Шакирова Л.Г. 3нче урын яулады. Гомуми нәтиҗәләр буенча Олы Кибәче урта гомумбелем бирү мәктәбе командасы 7нче урында. Әлеге ярышларда катнашкан барлык укытучыларга рәхмәт белдерәбез, саулык-сәламәтлек һәм уңышлар телибез.

Бүген мәгариф хезмәткәрләре арасында узучы олимпиаданың шорт-трек ярышларында физика укытучысы Ибушев В.А., математика укытучысы Вилданова Ә.Г., шахмат ярышларында педагог-оештыручы Газизова Г.Р. һәм физик тәрбия укытучысы Мубаракзянов Р.Р. катнашты.

Бүген мәгариф хезмәткәрләре арасында кышкы Спартакиаданың  район этабы башланып китте. Безнең мәктәптән өстәл теннисы буенча китапханәче Башарова И.Р., физик тәрбия укытучысы  Мубаракзянов Р.Р. катнашты. Раил Рашитович ир-егетләр арасында 1 урын яулады. Чаңгы ярышларында математика укытучысы Вилданова Ә.Г., рус теле укытучысы Измайлова Г.М., физика укытучысы Ибушев В.А., инглиз теле укытучысы Камалов Р.В. катнашты.

28 январь көнне 9-11 классларда  Ленинград камалышы өзелүгә 70 ел тулу   уңаеннан Батырлык дәресе узды. Әлеге дәрестә югары класс укучыларына 900 дәһшәтле көн һәм төн эчендә совет халкының, Ленинград халкының күрсәткән батырлыгы, рух ныклыгы турында сөйләнде. Дәресне тарих укытучысы Каримова Л.Р. уздырды.

Бүген 1-4 классларда Ленинград камалышы өзелүнең  70 еллыгына багышланган Батырлык дәресе узды. Тарих укытучысы Каримова Л.Р. башлангыч класс укучыларына бу елларда өлкәннәр белән бергә балаларның да нинди зур сынау үтүләре турында сөйләде,  икмәкнең , тынычлыкның кадерен белергә чакырды.

23 январь көнне мәктәбебездә "Математик белем сыйфатын күтәрүдә интерактив технологияләр куллану" темасына математика укытучыларының район семинары узды. Вильданова Ә.Г. 8 класста "Квадрат тигезләмә төшенчәсе. Тулы булмаган квадрат тигезләмәләр" дигән темага дәрес уздырды. Габделхаева Р.Р. 9 класс укучыларын дәүләт йомгаклау аттестациясенә әзерләү, Ильясова Р.Г. 11 класс укучыларын бердәм дәүләт имтиханнарына әзерләү буенча мастер-класслар үткәрделәр. Дәресләрдән соң узган киңәшмәдә  Рәсимә Рафиковна "Математика укытучысының үз белемен күтәрү өстендә эшчәнлеге" дигән темага чыгыш ясады, Рәфинә Габдрашидовна укытучыларның белем күтәрү курсларында алган яңалыклары белән таныштырды.  Мәгариф идарәсе методисты Давлетшина Г. Ф.  тарафыннан Саба районы гомумбелем бирү учреждениеләрендә математика укытуның торышына анализ ясалды. Семинар эшлекле һәм файдалы узды.