Укучыларыбызның җәй буе тырышып эшләүләренең нәтиҗәсе дә матур булды-мәктәп яны тәҗрибә участогыннан мул уңыш җыеп алынды. 14 сентябрь  көнне үзебез җитештергән продукция  белән Казан шәһәренең 35нче мәктәбе территориясендә узган ярминкәдә катнаштык. Ассортиментның бай һәм  товарларның сыйфатлы  булуы күп сатып алучыларны үзенә җәлеп итте.

10,11,12 сентябрь көннәрендә барлык классларда,  балалар һәм яшүсмерләр алкоголизмын кисәтү максатыннан,  Сәламәтлек сәгатьләре узды. Әңгәмә, рольле уен, экскурсия формасында узган класс сәгатьләрендә укучылар  үзеңдә начар гадәтләр булдырмаска, ә бәлки сәламәт яшәү рәвеше алып барып, тормыштан ямь табып, үзеңә һәм якыннарыңа борчу китермичә яшәргә кирәк икәненә тагын бер кат төшенделәр.

Күмәкләшеп яшелчә уңышы алдык. Көне дә бигрәк матур, кояшлы булды. Витаминлы ризыклар һәркемгә саулык һәм көч өстәсен! 

Бүген 5-11 сыйныф укучылары, укытучылар, хезмәткәрләр бердәм рәвештә мәктәп бәрәңгесен алуда катнаштылар. Вакытында мул уңыш җыеп алу һәркем өчен зур шатлык булды.

20нче августтан 20нче сентябрьгә кадәр узучы Балалар куркынычсызлыгы айлыгы кысаларында  эвакуация уздырылды. Барлык укучылар да, тиешле таләпләрне үтәп, мәктәп янына җыелдылар. Гомумән, эвакуация канәгатьләнерлек дип бәяләнде.

"Бурдан кала, уттан калмый" дигән татар халык мәкален һәркем белә. Ләкин бар кеше дә янгын куркынычсызлыгы кагыйдәләрен төгәл үтәми. Әлеге күнекмәләр кече яшьтән үк булдырылырга тиеш. Бүген Саба янгын күзәтчелеге бүлегенең өлкән инспекторы Габдрахманов Р.В., Икшермә янгын сүндерү бүлеге начальнигы Салахиев Ф.Ф. укучылар белән очраштылар. Викторина сорауларына җаваплар алганнан соң, алар укучыларны янгын куркынычсызлыгы кагыйдәләрен төгәл үтәргә чакырдылар.

ГТО нормаларына багышланган спорт ярышларында укытучылар һәм әти-әниләр дә бик теләп катнаштылар.

8-11 класс укучыларының ГТО нормалары буенча җиңел атлетика ярышлары узды. Кызлар 400 м га, егетләр  1000 м га йөгерде.

Бүген барлык классларда Бесланда булган фаҗигале вакыйганың 10 еллыгы уңаеннан  класс сәгатьләре узды. Укучыларга презентацияләр ярдәмендә  әлеге коточкыч вакыйга турында мәгълүмат бирелде. Террорчылык актларын кисәтү максатыннан ниләр эшләргә кирәклеге искә төшерелде.

ГТО нормаларын пропагандалау йөзеннән 1-4 сыйныфларда җиңел атлетика ярышлары узды. 1,2 класслар 30 м га. 3,4 класслар 60 м га йөгерде.