Дәшә серле юллар,
Башта төрле уйлар,
Яшь йөрәктә чыңлый мең сорау.
Якты юллар теләп,
Матурлыкка өндәп
Саубуллаша көмеш кыңгырау..
24 нче май көнне гимназиябездә 11 нче сыйныф укучылары өчен соңгы кыңгырау чыңлады. Бәйрәм белән укучыларны директорыбыз Гөлшат Әбүзәровна, Вахитов һәм Идел буе районнары буенча укыту - методик сектор мөдире Миләүшә Василовна, директор урынбасарлары, 1 нче сыйныф укучылары, әти - әниләр һәм яраткан укытучылары котлады.
Тантанада күңелле һәм моңсу мизгелләр күп булды. Әйе, вакыт сиздерми генә үтеп киткән. Кызыклы дәресләр, шау - шулы тәнәфесләр, төрле сәяхәтләр артта калды. Алда беренче сынаулар көтә...
Кадерле чыгарылыш сыйныф укучылары! Сезгә күңел күтәренкелеге, оптимизм, үз - үзегезгә ышаныч, якты киләчәк һәм уңышлар гына телибез! Ак юллар сезгә, укучылар!!!

Видеога сылтама: https://vk.com/club216931602?z=video-216931602_456239288%2F1c7e45561706dc22f0%2Fpl_wall_-216931602

Гимназия китапханәсендә 5А сыйныфы укучылары белән "Китапханә серләре" дип исемләнгән әдәби дәрес үткәрелде. Укучылар китап дөньясына мавыктыргыч сәяхәт ясадылар. Беренче китапханәләр ни сәбәпле, ничек, кайда, кайчан барлыкка килгән дигән сорауларга җаваплар таптылар.

Гимназиябез укучылары "Россия - минем тарих" паркында 8 - 11 нче сыйныфлар арасында үткәрелгән "Своя игра" дип аталган интеллектуаль бәйгедә I урынны яуладылар. Укучыларыбызны һәм җитәкчеләре Эльмира Расыховнаны чын күңелдән котлыйбыз!!!

23 нче май көнне гимназиядә 2023 - 2024 нче уку елы нәтиҗәләре буенча тантаналы рәвештә линейкалар үткәрелде. Линейка барышында төрле бәйгеләрдә, олимпиадаларда, гимназия тормышында актив катнашкан укучыларыбыз бүләкләнделәр!
Гимназия директоры Гөлшат Әбүзәровна җәйге каникул вакытында үз - үзеңне тоту кагыйдәләре белән таныштырды, укучыларга күңелле һәм файдалы яллар теләде!

2А сыйныфы укучылары "Союзмультпарк"та сәяхәттә булып кайттылар. "Балалар әлеге могҗизалы урыннан бик канәгать калдылар. Шундый рәхәт ял оештырган өчен сыйныфның әти - әниләренә зур рәхмәт!" - дип теләкләре белән уртаклашты сыйныф җитәкчесе Гөлфия Рөстәмовна.

2Б сыйныфы укучылары "Живопись шерстью" дигән мастер - класста катнаштылар, эшләү техникасы белән таныштылар, вакытларын кызыклы һәм файдалы үткәрделәр!

Гимназиябез активистлары тәрбия эшләре буенча директор киңәшчесе Гөлчәчәк Әсхатовна һәм ЮХИДИ идарәсенең профилактика бүлегенең әйдәп баручы белгече Сәгдия Салиховна җитәкчелегендә "Солнечный" реабилитация үзәгендә булып кайттылар. Сәгдия Салиховна балаларга юлда куркынычсызлык кагыйдәләре турында сөйләде, укучыларыбыз үзләренең музыкаль чыгышларын тәкъдим иттеләр.

20 нче май көнне үткәрелгән "Мөһим сөйләшүләр" "Һәрвакыт әзер бул! Балалар иҗтимагый оешмалары көне" дип аталды. Укучылар белән балалар иҗтимагый оешмаларының тарихы, пионерия турында әңгәмә алып барылды. Дәрес барышында видеоөзекләр каралды, биремнәр эшләнелде.

19 май - Рәсәйдә балалар иҗтимагый оешмалары көне. Совет чорында ул Пионерия көне дип атала иде. Хәзерге вакытта "Алдынгылар хәрәкәте" зур тизлек белән үсеп килә. Тәрбия эшләре буенча директор киңәшчесе Гөлчәчәк Әсхатовна укучыларга пионер хәрәкәте тарихы, традицияләре һәм атрибутикалары турында сөйләде. Балалар презентация белән таныштылар, фикер алыштылар.

Бүген гимназиядә Хәйрия ярминкәсе оештырылды. Сыйныфлар бик җитди әзерләнгәннәр, өстәлләрнең муллыгына исең китәрлек!
"Хәерле көн, хөрмәтле әти - әниләр, укучылар һәм коллегалар! Гимназиябездә зур чара - Хәйрия ярминкәсе уздырылды. Әлеге акциядә катнашкан һәрбер балага, әти - әнигә һәм укытучыга зур рәхмәтемне белдерәсем килә! Язгы Хәйрия ярминкәсендә без 247 001 сум акча җыйганбыз!!! Җыйган акча авыру балаларга барып ирешсен һәм ярдәме тисен дигән теләктә калам!!! Эшләгән яхшылыкларның рәхәтен тоеп, балаларыбызның шатлык - куанычларына сөенеп, сәламәт, бердәм булып яшәргә язсын!  Барыгызга да бик зур рәхмәт!" - дип үзенең изге теләкләрен җиткерде гимназия директоры Гөлшат Әбүзәровна.

Репортаж: https://vk.com/club216931602?z=video-216931602_456239286%2Fc410cdff362a09abe3%2Fpl_wall_-216931602