Гимназия укучылары дәрестән тыш вакытларын күңелле һәм файдалы үткәрәләр. 7Б сыйныфы укучылары сыйныф җитәкчеләре Лилия Газинуровна белән Горки- Әмәт урман паркында пикник оештырдылар. Укучылар саф һавада рәхәтләнеп ял иттеләр, бер - берсе белән аралашудан күп тәэсирләр һәм шатлык алдылар.

21 нче сентябрь- Россия дәүләтчелеге барлыкка килү көне билгеләп үтелә. Шул уңайдан тәрбия эшләре буенча директор киңәшчесе Гөлчәчәк Әсхатовна һәм гимназия активистлары "Русиядән Россиягә кадәр" дип аталган интеллектуль уен оештырдылар. Уенның максатлары:
- туган ил тарихына кызыксыну уяту;
- патриотлык хисе тәрбияләү.
Әлеге истәлекле дата турында укучылар күп мәгълүмат белделәр һәм мөһим булган даталарны, шәхесләрне истә калдырдылар.

19 нчы сентябрь көнне үткәрелгән “Россия - минем горизонтларым” сыйныфтан тыш эшчәнлек курсы кысаларында укучылар белән "Үземне өйрәнәм" дигән темага сөйләшү алып барылды. Дәрес барышында укучылар презентация белән таныштылар, төрле биремнәр ярдәмендә үзләренең эчке потенциалларын һәм көчле якларын билгеләделәр.

Гимназиядә һөнәри юнәлеш буенча һәрдаим эш алып барыла, төрле белгечләр чакырыла.
7А сыйныфында кунакта КНИТУның информатика һәм гамәли математика кафедрасы мөгаллиме Галимянова Әнисә Исмәгыйлевна булды. Әлеге сыйныф сәгатендә укучылар “Социаль челтәрләрдә һәм интернетта иминлек кагыйдәләре” дигән темага фикер алыштылар. Төп сораулар:
- Интернетта нинди куркынычсызлык кагыйдәләрен үтәргә?
- Шәхси сайт яки битеңне ничек сакларга?
Әнисә Исмәгыйлевна укучыларга әлеге сорауларга җаваплар табарга булышты. Очрашу файдалы һәм кызыклы үтте.

3А сыйныфы укучылары сыйныф җитәкчеләре Гөлфия Рөстәмовна белән берлектә Планетарийда булып кайттылар. Балалар күк җисемнәре һәм планеталар турында бик күп мәгълүмат тупладылар.

18 нче сентябрь көнне гимназия активистлары педагог- организатор Фәния Наилевна җитәкчелегендә "Маҗаралар юлы буйлап" дип аталган иҗади- интеллектуаль уенда катнашып кайттылар. Укучылар үзләрен төрле юнәлешләр буенча сынадылар: театр, спорт, экология, журналистика, фәнни эшчәнлек, волонтерлык һәм хәйриячелек.

2Г сыйныфы укучылары сыйныф җитәкчеләре Алсу Габдрафиковна һәм әти- әниләр белән берлектә табигать кочагында ял итеп кайттылар. Балалар саф һавада рәхәтләнеп төрле уеннар уйнадылар, уңай эмоция һәм яхшы кәеф алдылар!

Гимназия укучылары татар һәм рус язучыларының гына түгел, шулай ук чит ил язучыларының иҗаты белән дә даими танышып торалар. 2А һәм 2В сыйныфы укучылары белән танылган "Бемби" китабының авторы Феликс Зальтен иҗаты буенча әдәби чара үткәрелде. Балалар язучының тормыш юлы, әсәрләре белән таныштылар, ахырдан викторина сорауларына җавап бирделәр.

16 нчы сентябрь көнне гимназиядә дүшәмбе иртәсе Рәсәй һәм Татарстан гимннарын башкарудан башланып китте. Гимн җырлаганнан соң "Мөһим сөйләшүләр" дәресләр циклы уздырылды. Укучылар белән "Россия юллары" дигән темага сөйләшү алып барылды. Дәреснең максатлары:
- укучыларда илнең транспорт системасы турында белемнәрен арттыру;
- Россия тимер юлларының ил үсешенә керткән өлеше һәм тимер юлчы һөнәрләренең күптөрлелеге турында күзаллау формалаштыру;
- гражданлык позициясе һәм илебезгә хөрмәт хисе тәрбияләү.

12 нче сентябрь көнне гимназиябездә Хәйрия ярминкәсе оештырылды. Сыйныфлар бик җитди әзерләнгәннәр, өстәлләрнең муллыгына исең китәрлек!
"Хәерле көн, хөрмәтле әти - әниләр, укучылар һәм коллегалар! Хәйрия ярминкәсендә катнашкан һәрбер балага, әти - әнигә һәм укытучыга зур рәхмәтемне белдерәсе килә! Көзге Хәйрия ярминкәсендә без 300592 сум акча җыйганбыз! Җыелган акчалар авыру балаларга барып ирешсен һәм ярдәме тисен иде дигән теләктә калам! Эшләгән яхшылыкларның игелеген тоеп, балаларыбызның шатлык-куанычларына сөенеп, сәламәт, бердәм булып яшәргә насыйп булсын!"- дип үзенең изге теләкләрен җиткерде гимназия директоры Гөлшат Әбүзәровна.

Видеога сылтама: https://vk.com/club216931602?z=video-216931602_456239305%2Ffdc658a5cef7059cc2%2Fpl_wall_-216931602