Буген, дүшәмбе иртәсенең "Мөһим сөйләшүе"сөекле укытучыларга багышланган иде. Тиздән Укытучылар бәйрәме җитәчәк. Шушы уңайдан 7,8 сыйныф укучылары укытучы һөнәренә багышланган видеофильм,танылган артистларның чыгышларын карадылар, интерактив күнегүләр эшләделәр, киләчәктә булачак һөнәрләр белән таныштылар. Әңгәмә барышында үзләренең беренче укытучылары, яраткан фәннәре турында сөйләделәр.

23 сентябрь көнне район күләмендә уздырылган " Көзге кросс" ярышында катнашып Түбән Чыршылы мәктәбе  укучылары алдынгы нәтиҗәләр күрсәтте. 6-7 сыйныф укучылары арасында Камалтдинова Илсия 1 урын, Вильданова Алисә 3 урын, команда 2 урында. 8-9 сыйныф укучылары арасында Ганиева Екатерина 1 урын, команда 3 урында. Катнашучыларны барысында чын күңелдән котлыйбыз, алга таба да уңышлар телибез.

Буген Түбән Чыршылы мәктәбендә Сәламәтлек көне булды. Дәресләрдән соң барлык сыйныфлар урманга юл тотты. Нарат урманы үзенең көзге матурлыгы, хуш исе белән каршы алды. Түгәрәк табын корып сыйланып алгач, хәрәкәтле, туплы уеннар уйналды. Алан тирәсендә үскән гөмбәләрне күзәттеләр, көзге яфраклар җыйдылар. Бүген чыннан да бәйрәм көн булды: кояш та елмая, төрле төсләр күзне иркәли, нарат- чыршы исе тынны киңәйтә, дуслар белән күңелле. Бу көн һәркайсыбыз күңелендә озак сакланыр.

Атна саен уздырылучы "Мөһим сөйләшү" дәрестән тыш эшчәнлекнең темасы батыр комсомолка- Зоя Космодемьянскаяга багышланды. 7 сыйныф укучылары аның батырлыгы турында белделәр,аңа багышлап төшерелгән фильмнан видеофрагмент карадылар. Шунысы билгеле:Зоя Космодемьянская - беренчеләрдән булып Советлар Союзы герое исеменә лаек булган хатын-кыз. Шулай ук укучылар интерактив уен аша, герой кыз белән бәйле истәлекле урыннарның кайда урнашканын да белделәр. Бөгелмә шәһәрендә дә Зоя Космодемьянская урамы барлыгы ачыкланды. Һичшиксез, геройлар үлемсез, аларның күрсәткән батырлыклары үлемсез.

7 сентября прошла встреча с сотрудником отдельного поста с. Нижние Чершилы Альметьевского отряда противопожарной службы. Учащиеся получили дополнительные знания по правилам пожарной безопасности и поведения при пожарной эвакуации. Так же была проведена тренировочная эвакуация

6 сентябрь көнне Куакбаш мәдәният йортында күңелле очрашу булды. "Укытучы һәм остазлар" елы уңаеннан әзерләнгән бу очрашуда лаеклы ялда булган ветеран укытучылар һәм хәзерге вакытта эшләүче укытучыларыбыз да булды. Очрашуның инициаторы булган район Мәгариф бүлеге ветераннар советы рәисе Люция Владимировна ике мәктәп укытучы остазлар турында җылы мактау сүзләре җиткерде. Куакбаш мәдәният йорты, авыл китапханәсе, мәктәп укытучылары һәм укучылары тарафыннан куелган театр, концерт номерлары залда җыелган кунаклар күңеленә хуш килде. Остаз укытучы апалар сүз алып, ике мәктәп арасында булган хезмәттәшлек елларын, ачык дәресләргә, җыелышларга йөрүләрен искә төшереп, хатирәләрен яңарттылар. Чыршылы мәктәбе башлангыч сыйныф укытучысы Гүзәлия  Әхәт кызы барлык укытучы апаларны котлап моңлы җырын бүләк итте. Очрашуны оештырган, күңелле ял бүләк иткән артистларга, мәдәният йорты хезмәткәрләренә, Куакбаш мәктәбе укытучыларына олы рәхмәтебезне җиткерәсе килә.

Ашкынамын мәктәбемә
Әйтерсең, туган йортым.
Мәктәбемә илтер сукмак
Гел шулай нурлы булсын.
Буген, 1 сентябрь көнне, меңләгән укучылар, укытучылар белем йортына килде. Яңа планнар, үзгәрешләр, хыяллар, бәйгеләргә юл башлана. Түбән Чыршылы мәктәбендәге белем бәйрәмен 9 сыйныфлар башлап җибәрде. 6 укучы күңел түрендәге җылы хисләрен җиткереп шигырьләр, җырлар юлладылар. Беренче сыйныф укучылары да алардан калышмады, татар һәм рус телендә шигырь сөйләделәр, зур ускәнлекләрен, белем алырга әзер икәнлекләрен аңлатып бирделәр. Алар өчен шатланып утыручы әти- әниләр дә матур теләкләрен җиткерделәр. Бәйрәмгә ветеран укытучы апалар да килгән иде. Алар да үзләренең матур теләкләрен юлладылар. Мәктәп директоры Гөлия Камил кызы  җәйге чорда эшләнелгән ремонт эшләре, уку елында көтеләчәк яңалыклар турында сөйләде. Яңа уку елы һәркемгә шатлык - сөенечләр, яхшы билгеләр, яңа җиңүләр алып килсен.

Яңа уку елын, район август киңәшмәсе башлап җибәрә.Билгеле,аңа әзерлек каникул буена бара. Һәр мәктәп үзенә бирелгән теманы яктырта. Кемдер үз мәктәбен методик яктан, кемдер хезмәт тәрбиясен чагылдыра. Безнең Түбән Чыршылы мәктәбе бишенче хезмәт чирегендә устергән чәчәкләр күргәзмәсе белән катнашты. Һәр сыйныф укучысы укытучылар җитәкчелегендә бакча һәм мәктәп яны мәйданчыгында тырышты, су сипте, чүп утады. Җәйнең эссе торуы беркадәр авырлык тудырса да, сынатмадык, мул уңыш алынды. Ә инде күзне иркәләүче чәчәкләрнең нинди генә төрләре юк. Менә шул матурлыкны күрсәтү һәм яклау безнең бурыч булды. Комиссия алдында технология укытучысы Талига Шамил кызы бишенче хезмәт чиреге уңышлары турында кыскача аңлатма бирде. Күргәзмәбезне комиссия уңай бәяләде. Әлбәттә, бу һәр укытучы һәм укучы тырышлыгы белән башкарылган хезмәт. Август киңәшмәсендә яңа уку елында булачак яңалыклар, үзгәрешләр турында әйтелде."Мәгариф турында"гы федераль закондагы үзгәрешләр, педагог хезмәткәрләрнең аттестация узуында яңалыклар булу да көтелә. Яңа уку елы укытучыларга иҗади уңышлар, исәнлек, укучыларга зиһен ачкычлары, зур җиңүләр алып килсен.

42 ел эш стажы булган Түбән Чыршылы​ төп гомуми белем бирү мәктәбе физик культура укытучысы Багаутдинова Әнисә Бинәрис кызы сәламәт яшәү рәвеше формалаштыру буенча максатчан эшли, укучыларга үзләрен күрсәтергә мөмкинлек, мөстәкыйльлек бирә, ихтыяр көче тәрбияли, куйган максатка ирешү кирәклеген төшендерә. Быелгы август киңәшмәсендә шәһәр һәм район мәктәпләрендә профессиональ осталыклары белән зур уңышларга ирешкән укытучыларны дәүләт бүләге белән бүләкләделәр. Алар арасында безнең хезмәттәшебезнең булуы да бик куанычлы. Аңа да Татарстан Республикасының мәгариф өлкәсендәге уңышлары өчен күкрәк билгесе медале бирелде. Әнисә Бинарисовнаны уңышы белән котлыйбыз, яңа җиңүләр һәм сәламәтлек телибез.

Бүген Түбән Чыршылы төп гомуми белем бирүче мәктәбендә тантаналы бәйрәм. Ниһаять, 9 сыйныф укучыларының имтиханнары тәмамланды, сынаулар үтелде. Буген кабаттан әти-әниләр, чыгарылыш укучылары, укытучылар мәктәпкә "Аттестат тапшыру" чарасына җыелдылар. Шунысы куанычлы:барлык укучыларыбыз да дәүләт имтиханнарын уңышлы тапшырып чыктылар. Мәктәп җитәкчесе, Гөлия Камил кызы,  укучыларны түргә чакырып, жылы сүзләрен әйтеп, уңышлар теләп, өлгергәнлек таныклыгын тапшырды. Сыйныф җитәкчесе Ришат Салих улы да һәр укучысына аерым теләкләр җиткерде. Әти-әниләр дә шатлыклары белән уртаклаштылар. Соңыннан чәй табыны артында жылы сөйләшү дәвам итте.
Укучылар!  Бәйрәмегез котлы булсын! Киләчәктә тормыш юлыгызда тел ачкычы, тапкырлык, тәүфыйк юлдаш булып, туплаган гыйлемнәрегезнең файдасын күреп, иминлектә яшәргә, укырга язсын. Сынатмадыгыз, ышанычыбызны акладыгыз.