Бүген 2014-2015 нче уку елын тәмамлау буенча йомгаклау линейкасы булды. Линейкада укучылар тәҗрибә кишәрлегендәге   эш графигы, мәктәпнең җәйге каникулларга эш планы, инструктажлар белән  таныштылар. Район буенча конкурсларда җиңүчеләргә, активистларга Грамоталар тапшырылды. Күңелле, һәм файдалы яллар сезгә, укучылар. Яңа уку елында сау-сәламәт килеш күрешергә насыйп булсын!

4 нче сыйныфлар бүген үзләренең ата-аналары белән бергәләп башлангыч сыйныф белән хушлаштылар. Хушлашу кичәсе ике өлештән торды. Тантаналы өлештә мәктәп директоры Хәмидуллин И.И. ата-аналарны һәм укучыларны бу истәлекле көн белән котлап алга таба да зур уңышлар теләде.Кичәдә 4 сыйныфларның укытучысы Энҗе Рөстәм кызы адресына да бик күп җылы сүзләр яңгырады. Икенче өлеш табигать кочагында, түгәрәк табын артында дәвам итте.

9 ел кыңгыраулар чыңы

Чакыру булды һәрбер дәрескә.

Бүген алар чакыру һәм озату

Алда торган бөек зур эшкә.

Әйе, бүген мәктәбебездә Соңгы кыңгырау яңгырады. Бүген ул кемнәргәдер укулар тәмамлавын белдереп, кемнедер олы тормышка өндәп чыңлый. Мәктәбебез тагын бер сыйныф белән хушлашты. Укучыларыбызга саулык-сәламәтлек, озын гомер, имтиханнарын уңышлы бирүләрен телибез. Ак юллар, сезгә чыгарылышлылар!

Һава торышы салкын һәм яңгырлы булу сәбәпле күчерелгән Шатлык көне “Кече Сабантуй” формасында мәктәбебездә бүген бик матур булып узып китте. 3 дәрес укыганнан соң укучылар мәктәп бакчасына чыктылар. Алар чыккан вакытка физкультура укытучысы Гатауллин Динар уха пешереп торды. Уха ашаганнан соң укытучылар балаларны татар милли уеннары уйнаттылар. Пылау пешкән арада укучылар ял итте, спорт уеннары уйнадылар, ә соңыннан  рәхәтләнеп пылау ашадылар. Бәйрәм үткәрүдә акчалата ярдәм күрсәткән  “Азамат” оешмасы җитәкчесе Садыков Габделхак Хәевичка һәм барыбызны да тәмле уха һәм пылау белән сыйлаган укытучы Гатауллин Динарга укытучылар һәм укучылар исеменнән  олы рәхмәтебезне җиткерәбез.

Мәктәбебездә Бердәм ГТО декадасы бара

Экологик белемнәр Көненә багышланган  бердәм экологик дәрес мәктәбебездә 13 нче майда узды. Бу темага багышланган сыйныф сәгатьләреннән соң укучылар территория җыештырырга чыктылар. 

Май яллары без, бер төркем мәктәп укучылары өчен, бик көтеп алынган булды. Ник дигәндә, 5,6,8,9 сыйныф укучыларының иң активларын җыеп, физкультура укытучысы Гатауллин Динар абый Казанга алып барам, дип вәгъдә бирде. Күптән көтелгән көн килеп җитте, ниһаять, 10 сы без җыйнаулашып Казанга юл алдык.

Безнең юлыбыз “ACTION” пейнтбол үзәгенә иде. Бөтенебез дә 2 сәгать буе, “зәңгәрләр” һәм “сарылар” командасына бүленеп, мавыктыргыч пейнтбол уенында катнаштык. Вакытыбыз чыккач, яңа гына Казанда ачылган FUN24 күңел ачу үзәгенә киттек. Анда баргач боулинг, аэрохоккей уйнадык, роликларда,машиналарда йөрдек, 5D атракционында  булдык, «Зеркальный лабиринт»ка кердек. Кыскасы, рәхәтләнеп күңел ачтык! Тамак ялгап алгач, кайтырга чыктык.

Кайтканда да һәркемнең кәефе күтәренке, сөйләшер сүзләре күп иде. Көне буе ниләр белән шөгыльләнгәнебезне, ниләр ошаган-ошамавын, фикерләребез белән уртаклашып кайтканда ерак ара сизелмәде дә диярлек. Бу ялны озаккарак сузасы килде дә бит... Арысак та,безгә күңелле,рәхәт булды!

Безнең күңелләрне күргән, уңай кичерешләр,гомерлеккә истә калырлык очрашу  бүләк иткән өчен үзебезнең Динар абыебызга чиксез

 рәхмәтебезне белдерәбез! Азга гына булса да, без мәшәкатьләребездән арынып тордык, онытылмаслык хисләр кичердек. 

Без аңа сәламәтлек, яңадан-яңа җиңүләр, уңышлар телибез!

Казанга сәяхәткә барган барлык малайлар-кызлар исеменнән

Чулпан ГАРИФУЛЛИНА

8 майда мәктәп коллективы авыл җирлеге белән бергәләп Бөек Ватан сугышында җиңүнең 70 еллыгын билгеләп үттек. 1945 нче елның тарихи яз көннәрен вакыт бездән һаман ераклаштырса да, бу зур сугышта катнашучыларның бик күбесе безнең арабыздан мәңгелек йортка  күчсә дә, еллар узуга карап, бөтендөнья цивилизациясен кара көчләрдән коткарган, безнең киләчәгебез, балаларыбызның һәм оныкларыбызның киләчәге өчен кан койган Ватан сакчыларына олы рәхмәт хисләребез артканнан-арта гына бара. Бөек Җиңүгә  дан!

Мәктәбебезнең ЦВР "ЭКО" аркылы эшләүче "Көмеш каләм" берләшмәсе әгъзасы 9 нчы сыйныф укучысы Гарифуллина Чулпан чираттагы бәйгедә җиңү яулады.ТР Журналистлар берлеге, ТР "Прогресс" яшьләр үзәге, ТР Фән һәм мәгариф министрлыгы,  ТР Язучылар  берлеге, "Ярдәм" милли ислам хәйрия фонды оештырган I нче Республика "Җиңү җыры" әдәби конкурсында 17 яшькәчә булган катнашучылар арасында  "Мәкалә" номинациясендә 3 нче урынга лаек булды. Җитәкчесе Сайранова Р.Т. Рәхмәт хаты белән бүләкләнде. Афәрин! Бу җиңүегез соңгысы булмасын, алга таба да иҗади уңышлар телибез.