Бәйрәм белән!

Бүген мәктәбебездә "Уңыш бәйрәме" үткәрелде. "Табигать могҗизалары + фантазия" күргәзмәсе оештырылды. Бәйрәмгә әти - әниләр, алдынгы хезмәт ияләре чакырылды. Кичә тәрбияви һәм тирән эчтәлекле булды.  

 "Табигать могҗизалары + фантазия" күргәзмәсе

Бездә өмә көн. Мәктәп тирәсен коелган яфраклардан һәм чүп - чардан арындыруда барыбыз да актив катнаштык.

Мәктәбебездә 27 октябрь көнне 5-7нче сыйныфлар өчен «Көзге бал» кичәсе булды. Аның максаты- укучыларда табигатькә , кешеләр хезмәтенә хөрмәт һәм мәхәббәт тәрбияләү, укучыларның ялын файдалы һәм күңелле итеп оештыру иде.  Бәйрәмдә көз кызы Сөмбелә дә, үзенең мул уңышны чагылдырган , күпереп пешкән икмәге белән,матур теләкләре белән катнашты.

Уеннар командаларның визиткаларыннан башланды. Укучылар, алдан бирелгән өй эше буенча, үзләре әзерләп алып килгән панноларын тәкъдим иттеләр,  командалар иҗади сәләтләрен күрсәтеп, уеннарда актив катнаштылар, сорауларга җавап бирделәр, шигырьләр яздылар, мәкальләр әйттеләр, җитезлектә сыналдылар.

Командалар биремнәргә әзерләнгән арада, җанатарлар белән уеннар үткәрелде.

Бәйрәмне тәрбия эшләре буенча директор урынбасары Гарифуллин Р.Г, педагог- оештыручы Павлова Г.Г әзерләде һәм алып бардылар. Ә укыту эшләре буенча директор урынбасары Габитова С.И, укытучылар Фаязов Ә.Ф, Фәезова Э.М. уеннарны игътибар белән күзәтеп, командаларга урыннар билгеләделәр. Катнашу, уен нәтиҗәләре буенча 1 урын- 6 нчы сыйныфларга булды. 2 урында 5 нче сыйныф, 3 урынны 7 нче сыйныфлар бүлеште. Бәйрәм бик күңелле һәм тәрбияви яктан файдалы үтте.

Бүген башлангыч сыйныф укучыларының "Көзге бал" кичәсе булды. Алар рәхәтләнеп биеделәр, җырладылар, уйнадылар, күңелле итеп ял иттеләр. Көзге муллыкка, табигатьнең матурлыгына багышланган шигырьләрен сәнгатьле итеп сөйләделәр. Ярышларда  зирәклектә, тапкырлыкта, җитезлектә көч сынаштылар.

Бөек Ватан сугышында яу кырында ятып калган авылдашлар хөрмәтенә салынган һәйкәл янын  7 нче сыйныф укучылары  агачлардан коелган яфраклардан чистартты.

Мәктәбебез кызлары 1995 һәм аннан яшьрәк кызлар командалары  арасында район беренчелегенә спорт залда үткәрелгән футбол ярышында III урынны яуладылар.

         Мәктәбебездә 19 октябрь көнне 8-11нче сыйныфлар өчен «Көзге бал» кичәсе булды. Аның максаты- укучыларда табигатькә , кешеләр хезмәтенә хөрмәт һәм мәхәббәт тәрбияләү, укучыларның ялын файдалы һәм күңелле итеп оештыру иде.

         Уеннар командаларның визиткаларыннан башланды. Укучылар, алдан бирелгән өй эше буенча, үзләре әзерләп алып килгән икебаналарны тәкъдим иттеләр, аларны якладылар, бар булган иҗади сәләтләрен күрсәтеп, уеннарда актив катнаштылар, сорауларга җавап бирделәр, шигырьләр яздылар, мәкальләр әйттеләр. Бәйрәмдә көз кызы Сөмбелә дә, үзенең мул уңышны чагылдырган , күпереп пешкән икмәге белән, матур теләкләре белән катнашты.

        19 октябрьдә 2 укучы- Гильмуллина А, Федорова Г. һәм яшь укытучы Загидуллина И.К. Сосна мәктәбендә узган дебатлар буенча турнирда катнашты. Анда ике тема кузгатылды. Беренче « Катырак җәзалар җинаять дәрәҗәсен киметә» темасын безнең команда яхшы әзерлек белән раслады. Ә икенче «Армиядә барлык теләүче дә контракт нигезендә хезмәт итәргә тиеш» темасы буенча оппозиция, ягъни каршы килү туры килде. Команда турнирда актив катнашып үз фикерен яклады һәм сораулар бирде.