13 май көнне район мәдәният йортында “Карлыгач” бакчасы балалары һәм тәрбиячеләре “Бәхетле балачак” дип исемләнгән концерт куйдылар. Концерт югары оешканлык белән, күтәренке рухта, бик күңелле узды. Балаларның чыгышларын әти-әниләр һәм килгән кунаклар көчле алкышларга күмделәр.

Бакчабызда Г.Тукайның тууына 127 ел тулуга багышланган кичә булып узды. Кичәдә мәктәпкә әзерлек төркеме балалары туган тел турында шигырьләр сөйләделәр, җырлар җырладылар. Балалар Г.Тукай шигырьләрен өйрәнеп, бик матур итеп сөйләделәр, Тукай әкиятләренә сәяхәт ясадылар. Кичә бергәләшеп "Туган тел" җырын башкару белән тәмамланды.

23 апрель көнне район Мәдәният үзәгендә Г.Тукайның 127 еллыгына багышланган бәйрәм булып узды. Безнең балалар бакчасы бу бәйрәмдә "Тукай әкиятләренә сәяхәт" дигән театральләштерелгән чара күрсәтте. Бәйрәм бик күңелле, күтәренке рухта узды. Бәйрәмне оештыручыларга зур рәхмәтебезне белдерәбез.

20 апрель көнне коллектив белән бакча территориясен чистарту буенча шимбә өмәсендә катнаштык. Өмәдән соң бакчабыз тирә-яны чистарып, матурланып, ямьләнеп калды.

Апрель аенда бакчабызда Габдулла Тукай айлыгы игълан ителгән иде. Бу айлык кысаларында төркемнәрдә Тукай әсәрләре буенча рәсемнәр һәм кул эшләре күргәзмәләре, шулай ук Г.Тукай иҗаты буенча күргәзмәләр оештырылды. Әти-әниләр күргәзмәләр оештыруда бик теләп катнаштылар. Тукай айлыгында оештырылачак башка чараларда да шулай актив булуларын теләп калабыз.

Мәктәпкә әзерлек төркеме балалары Кадыров Мөхәммәт белән Кадырова Раилә "Хрустальное сердце мира" халыкара фестиваль-конкурсында вокал буенча катнашып, I дәрәҗәдәге диплом алып кайттылар. Киләчәктә аларга тагын да зуррак уңышлар юлдаш булсын!

Әлмәт курчак театры артистлары уртанчылар, зурлар, мәктәпкә әзерлек төркеме балаларына "Лесная сказка" дигән спектакль күрсәттеләр. Спектакль балаларга бик ошады.

Уртанчылар төркемендә әти-әниләр җыелышы узды. Җыелышта катнашкан район социаль яклау бүлеге психологлары әти-әниләргә тест уздырдылар, шулай ук балалар белән уздырган тест нәтиҗәләре белән таныштырдылар.