Хәрби-патриотик айлык кысаларында мәктәптә спорт ярышлары уздыру дәвам итә. Бүген 5-9 нчы класс егетләре арасында волейбол ярышы уздырылды. Нәтиҗәдә 9 нчы класс егетләре җиңү яулады.

Арча районы мәгариф хезмәткәрләренең профсоюз членнары арасында уздырылган чаңгы ярышында мәктәпнең физик тәрбия укытучысы Минһаҗев М.В. 3 урынны яулады. Чаңгы спорты буенча аның киләчәктә тагын да югарырак үрләр яулавын телибез.

17 нче февраль  көнне Урта Курса төп мәктәбендә  Арча муниципаль  районы гомуми белем мәктәпләренең башлангыч сыйныф укытучылары семинары узды. Ул “Дәресләрдә сингапур системасының структураларын куллану” дигән тема астында үтте. Семинарда Арча шәһәре мәгариф идарәсенең информацион-методик үзәк методисты Яхина Р.Г. катнашты. Башлангыч сыйныф укытучылары түбәндәге темаларга ачык дәресләр күрсәттеләр: “Табигать һәм без. Кешенең табигый байлыкларны куллануы” темасына 1 нче сыйныфта әйләнә-тирә дөнья белән танышу фәненнән (укытучы Насыйбуллина Ф.К.), “Үзәк һәм радиус” темасына 2 нче сыйныфта математикадан (укытучы Гыйбадуллина Н.Т.), “Эшең барып чыкмаса, гаепне үзеңнән эзлә” темасына 3 нче сыйныфта әдәби укудан (укытучы Мөхәмәдиева Н.З.), “Тәртип саннары” темасына 4 нче сыйныфта татар теленнән (укытучы – Минһаҗева Ч.М.). Укытучылар үз дәресләрендә сингапур системасының күп төрле структураларын кулландылар.

      Башлангыч сыйныф укытучылары семинарында сингапур системасының структураларын кулланып укытучылар татар теле (Гыйбадуллина Н.Т.), сынлы сәнгать (Мөхәмәдиева Н.З.),  музыка (Минһаҗева Ч.М.), физик культура (Насыйбуллина Ф.К.), технология (Солтанова И.А.) фәннәреннән мастер-класслар күрсәттеләр. 

        17 нче февраль  көнне мәктәптә Бөек Җиңүнең 70 еллыгы уңаеннан “Батырлар гомере мәңгелек!” исемле класстан тыш чара уздырылды. Укучылар үз чыгышларында сугыш чоры кешеләренең, солдатларның авыр язмышын чагылдырдылар. Кичә укучыларның сугышка нәфрәтләрен белдергән шигырьләре,  җырлары, биюләре белән үрелеп барды. Соңыннан укучылар татар, рус, инглиз телләрендә “Һәрвакыт булсын кояш!” җырын башкардылар.  

15 нче февраль – интернационалист сугышчыларны искә алу көне. Әфган сугышы күп югалтулар китерә. Саннар уйланырга мәҗбүр итә... Халкыбызга кайткан 15 меңгә якын кургаш табут, 36 мең яралы, 312 хәбәрсез югалган солдат язмышы һәркемне борчый. Шушы дата уңаеннан әфганчы якташларыбыз искә алынды, һәлак булган авылдышларыбыз хөрмәтенә венок салынды.

Бүген мәктәбебездән 8 укучы Арчаның 7 нче номерлы мәктәбендә уздырылган "Аҗаган" уенының зона ярышларында катнаштылар.Укучылар үзләрен күп яктан сынадылар: вакытка противогаз киделәр, миналар эзләделәр, граната ыргыттылар, яралыны бер урыннан икенче урынга күчерделәр, каршылыклар аша үттеләр, сорауларга җаваплар бирделәр. Команда составында түбәндәге укучылар катнашты һәм уңышлы чыгыш ясады: Нурисламов Р.-6 кл., Закирҗанов И.-6 кл., Сәләхов И.-7 кл., Хөснетдинов Р.-7 кл., Мингазова З.-7 кл., Гафуров А.-8 кл., Галимуллина И.-8 кл., Хөснетдинов Р.-8 кл. Аларны әлеге ярышка Сөнгатов Ш.Җ. һәм Мингазов М.В. әзерләде.

Хәрби-патриотик айлык барышында мәктәпнең "Туган якны өйрәнү музее" нда укучылар еш була. 4 нче класс укучылары экскурсия вакытында борынгы эш коралларын,  табылдыкларны, медальләрне,  сувенирларны җентекләп күзәттеләр,  үзләренә бик күп мәгълүмат тупладылар.

Укучылар технология дәресләрендә техник иҗат эше белән дә шөгыльләнәләр. 4 нче класс укучылары практикага кайткан Бикбаев Рафис Рәшит улы җитәкчелегендә кәгазьдән самолет моделе ясарга өйрәнделәр, аларны очыртып та карадылар.