8 март бәйрәме алдыннан 1 нче класс укучыларының әниләре мәктәпкә килде. Алар кыз һәм улларының уку, язу, сөйләм осталыгын күзәтте. Укучылар әниләренә күп һөнәрләрен дә күрсәттеләр. Соңыннан әниләр белән бергәләп алар төрле уеннарда, конкурсларда катнаштылар. 

Бүген мәктәптә хезмәт һәм сәнгать атналыгы кысаларында “Караоке батл” бәйгесе булып узды. Бәйгедә катнашучылар тамашачыларны матур җырлары, сорауларга күңелле итеп җавап бирүләре, үзләренең тапкырлыклары һәм зирәклекләре белән сөендерделәр, хит җырларны караокега кушылып башкардылар. Бәйгене тамашачылар да бик җылы кабул итте.

27 нче февраль көнне Яңа Кенәр мәктәбендә 2001-2002 нче елгы кызлар командалары арасында Галиуллин Ришат Әсгат улы истәлегенә волейбол ярышы уздырылган иде. Мәктәбебезнең кызлар командасы әлеге уенда актив катнашты һәм 4 нче урынны яулады. Тренерлары - Гарифуллин Г.В. Афәрин, кызлар! Алдагы уеннарда сезгә зур җиңүләр насыйп булсын!

25 нче февраль көнне Арча укучылар сараенда Әтнә, Балтач, Арча районнары укучылары арасында региональ шахмат ярышы булып узды. Бу ярышта безнең мәктәп укучылары да катнашты. Шәхси беренчелектә 3 нче класс укучысы Шәфигуллин Камиль һәм 7 нче класс укучысы Солтанова Камилә икесе дә призлы 3 нче урынны алды. 6 нчы класс укучысы Хәмзин Ришат та уңышлы чыгыш ясады. (тренерлары - Лотфуллин М.Л.) Укучыларны әлеге җиңүләре белән котлыйбыз, алга таба да уңышлар телибез.

Мәктәбебездә патриотик айлык дәвам итә. Бүген башлангыч сыйныф укучылары катнашында  “Күңелле стартлар” үткәрелде. (Укытучылары - Гыйбадуллина Н.Т.) Ике командага бүленеп, төрле уен-ярышлар белән алар үзләренең көчләрен сынаштылар. Ике команда да сынатмады. Чын Ватанны саклаучылар булачакларын алар шушы ярышта күрсәттеләр.

Укучыларга хәрби-патриотик тәрбия бирүнең дәрәҗәсен күтәрү максатыннан тәрбия сәгатьләрендә һәм дәресләрдә Бөек Ватан сугышы, Ватанны саклау темасына багышланган мәгълүматлар даими бирелә. 2 һәм 3 нче сыйныф укучылары белән “Бар шундый профессия – Ватанны саклау” дип аталган класс сәгате үткәрелде. Укучылар Ватан сагында булган әтиләре һәм абыйлары турында сөйләделәр, язган иншаларын укыдылар, аларга котлау открыткалары әзерләделәр.

Хәрби-патриотик айлык кысаларында 5-9 нчы класс укучылары катнашында интеллектуаль уен-викторина узды. Укучылар өч командага бүленеп, төрле өлкәләр буенча белемнәрен сынадылар, авыр һәм кызыклы сорауларга җаваплар эзләделәр.

Бүген мәктәптә Ватанны саклаучылар көне уңаеннан "Аҗаган" уены уздырылды. Укучылар өч командага бүленеп ярышның төрле этапларында катнаштылар. Хәрби җыр конкурсында, мина эзләү, граната ыргыту, яралы иптәшеңә ярдәм күрсәтү, пневматик мылтыктан ату,  төрле өлкәдә белемнәрне тикшерү, карта белән эшләү һ.б. уеннарда укучылар теләп катнашты. Барлык очколарны санаганнан соң "Торнадо" командасы җиңүче булды. Ярышка укучыларны Минһаҗев М.В. һәм Шәфигуллин Н.Ф. әзерләде.

21 февраль – “Халыкара Туган тел көне”нә багышлап 5-6 нчы сыйныф укучылары арасында “Туган телләр була бер генә – Туган телнең кадерен бел генә” дип исемләнгән КВН үткәрелде.Әлеге кичә туган телгә, туган илгә карата кызыксынучанлыкны үстерү,мәхәббәт тәрбияләү, туган телебезнең бай, аһәңле, матур икәнлеген күрсәтү максатыннан оештырылды. КВНда зирәкләр, тапкырлар, эшкә оста, сүзгә кыска булган укучылар катнашты. Алар үзләрен төрле бәйгеләрдә сынап карадылар. Матур итеп туган тел турында шигырьләр сөйләделәр; мәкальләр, табышмаклар әйтештеләр; укытучылар тарафыннан  бирелгән сорауларга тиз арада җаваплар таптылар.“Дуслык” һәм “Татарлар” командалары арасында барган бәйгедә “Дуслык” командасы җиңү яулады.

20 нче февраль көнне Арча шәһәре стадионында оста чаңгычы Ф.Гәрәфиев истәлегенә һәм "Металл" ширкәте призына чаңгы ярышы узды.  Команда составында түбәндәге укучылар катнашты: Закирҗанов Ә. (5 кл.), Бакирова Д. (5 кл.), Яруллин Д, (5 кл.),  Закирҗанов И (7 кл.), Минһаҗева И.(7 кл.), Минһаҗева З.(8 кл.), Сәләхов И.(8 кл.), Галимуллина И. (9 кл.) Тренерлары - Минһаҗев М.В. Мәктәбебез командасы әлеге укучылар көче белән 2 нче урынны яулады һәм кубок белән бүләкләнде. Барлык катнашкан укучыларны җиңүләре белән котлыйбыз һәм алдагы ярышларда да җиңүләр телибез!