Бүген Бөек Җиңүнең  70 еллыгы кысаларында "Сезнең тормыш - үзе батырлык"  кичәсе үткәрелде. Кичәгә Иске Кырлай авылы җирлегендә гомер итүче Бөек Ватан сугышы ветераны Камалов Әнвәр Галәветдин улы һәм тыл батырлары чакырылды.  Иске Кырлай авылы җирлеге башлыгы Сираҗетдинов Фәргать Гарәфетдин улы ветераннарга Бөек Җиңүнең 70 еллыгы медальләрен тапшырды, бүләкләр өләште. Ветераннар үзләренең истәлекләре белән уртаклаштылар, Камалов Әнвәр абый сугыш вакытында җырлаган җырларын башкарды. Чынлап та бит, тыл каһарманнары көнне төнгә , төнне көнгә ялгап хезмәткә җигелгәннәр.  Алар сынып та, сыгылып та төшмәгәнәр. Тизрәк Җиңү килсен дигән теләк белән тагын да тырышыбрак эшләгәннәр.  Барысы өчен дә зур рәхмәт сезгә!

Җиңү бит ул җиңел бирелмәде.

Аны бит сез якынайттыгыз....

Арча стадионында узган чаңгы сезонын ябуга багышланган  эстафетада  Шарафиев Илназ, Саттарова Наилә, Сайфуллина Динә, Ситдиков Эльвирлар составында команда 1 урын, Мукаева Ландыш, Хусаинов Илнар, Шакиров Илназ, Хәбиева Ландыш составындагы  команда 2 урын алды.  Марафонда  15 яшькә кадәрге  кызлар арасында Сайфуллина Динә  5 км арага йөгереп 2 урын, Мукаева Ландыш 3 урын,  егетләр арасында Шарафиев Илназ 10 км арада 2 урын, Шакиров Илназ 3 урын, 18 яшькә кадәрге кызлар арасында Саттарова Наилә 10 км арада 2 урыннарны яуладылар. Чаңгычыларны җиңүләре белән котлыйбыз!

 Бөек Җиңүнең 70 еллыгы кысаларында  Бөек Ватан сугышында катнашкан ветеран укытучылар турында мәгълүматләр туплана.  Иске Кырлай  башлангыч мәктәбе укытучысы Сөнгатуллин Хәсән Сөнгатулла улы әлеге сугышта катнашкан кеше. Ул 1920 елда Арча районы Мөрәле авылында туа. 1941 елда сугышка алына. Сугыш тәмамлангач, район мәктәпләрендә башлангыч сыйныфлар укытучысы булып эшли. 1960 -1980 елларда Иске Кырлай авылы балаларына белем бирә. Бүгенгесе көндә ветаран безнең  арада инде юк. Ләкин алар турындагы истәлекләрне берәүнең дә онытырга хакы юк.  Ветеран укытучы Хәсән ага Сөнгатулла улы истәлекләрен җыю әле дәвам итә.

Бүген  бездә 1 класс  укучыларының  "Сау бул, Әлифбам!"   бәйрәме үткәрелде. 1 класста 3 егет белем ала. Әлеге бәйрәмгә алар бик тырышып әзерләнделәр. Бәйрәмгә килгән "Азбука", "Математика", "Татар теле" дәреслекләре укучыларның  белемнәрен тикшерделәр. "Әлифба" дәреслеге егетләргә укуларында зур уңышлар теләп алар белән саубуллашты. Бәйрәмгә әти-әниләр дә чакырулы иде. 

Мәктәбебездә "70 еллыкка - 70 оя" акциясе дәвам итә. Укучылар зур горурлык белән әлеге акциядә катнашырга алындылар. Сыерчыклар килгәнче безнең ояларыбыз әзер булыр. Әлеге акциядә иң беренчеләрдә булып 7 класс укучылары сыерчык ояларын ясап бетерделәр.

Бүген мәктәбебезгә Арча район больницасыннан Кузнецова А.А. җитәкчелегендә бер төркем врачлар укучыларга медосмотр уздырырга килделәр. Укучыларның сәламәтлекләрен тикшереп, киңәшләр бирделәр. 

      Кадерле кызлар, хөрмәтле укытучылар! Сезнең барыгызны да язның беренче бәйрәме 8 Март -Халыкара хатын-кызлар көне белән котлыйбыз! Сезгнең барыгызга да нык сәламәтлек, озын гомер, тыныч, матур тормыш, бәхетле, шатлыклы көннәр телибез.   Бәйрәмнең  кайсы да  тәнгә  җиңеллек,  рәхәтлек,  җанга  ял  алып  килә.  Шушы  бәйрәм  көне,  елмаеп  балкыган  кояш  матурлыгын,  табигатьнең  самимилеген  өстәп,  күңелләрегезгә  шатлык,  тәнегезгә  сихәтлек,  өегезгә  иминлек  алып  килсен.

6  нчы март көнне мәктәбебезнең 9 нчы класс укучылары район буенча уздырылган пробный имтиханда үзләренең көчләрен сынап карадылар.

Мәктәбебездә  8 Март- Халыкара хатын-кызлар көне уңаеннан "Яз гөлләре сез, туташлар!"  кичәсе үткәрелде.  Кичәдә 5-9 класс  кызлары катнаштылар. Кызлар "Саф хисләр"  һәм  "Девчата"  командаларына бүленеп үзара көч сынаштылар. Кызларыбыз аш-суда уңганлыкларын, җыр-биюдә осталыкларын, тормышчан вакыйгаларны чишүдә тапкырлыкларын күрсәттеләр. Кызларның чыгышлары егетләрнең котлаулары белән чиратлашып барды.  Кызларыбыз сынатмадылар, барлык биремнәрне дә үтәп чыктылар. Кичә  чәй өстәле артында дәвам итте.