Быел беренче тапкыр  Арча сәнгать мәктәбендә "Дус сыйныф серләре"  дип исемләнгән әти-әниләр комитетлары арасында бәйгенең район туры үткәрелде. Безнең мәктәбебездән 9 сыйныф укучылары, сыйныф җитәкчесе һәм әти-әниләр комитеты әлеге бәйгедә актив катнаштылар. 

1 апрель -  Халыкара кошлар көне!

Бүген район буенча мәктәпләрдә беренче өмәләр уздырылды. Без дә-  укытучылар, укучылар, техник хезмәткәрләр өмәдән читтә калмадык, карлар тараттык, тирә - якны чистарттык.

2017 ел Россия Федерациясе президенты Указы нигезендә аеруча саклана торган табигый территорияләр елы дип игълан ителде. 2017 елда тыюлыкларга 100 ел тула, шул уңайдан мәктәбебездә  Бөтенроссия Тыюлык дәресе үткәрелде. География укытучысы Гилязиев Х.Р. укучыларны Идел-Кама Дәүләт тыюлыгы белән таныштырды. 

Бүген мәктәбебездә чираттагы әти-әниләр җыелышы үткәрелде.

Җыелышның көн тәртибе:

1.  3 нче чирек нәтиҗәләре, 4 чиреккә максат һәм бурычлар белән танышу. (УТЭБДУ - Мостафина Г.Г.)

2. Доклад: "Компьютерга һәм интернетка бәйлелек". (Педагог-оештыручы Әхмәтҗанова Г.Х.)

3. Ашханәдә туклану буенча фикер алышу. (Директор - Гилязиев Х.Р.)

4. Укучыларның өлгереше һәм тәртибе белән танышу. ( Класс җитәкчеләре чыгышы)

Бүген 1 класс укучылары өчен Әлифба бәйрәме үткәрелде. Кунакка укучыларның әниләре дә килде.  Укучылар матур итеп шигырьләр сөйләделәр, җырлар башкардылар. Класс җитәкчесе Фазлиева И.В. укучыларга  изге теләкләр теләде, тырышып укыган укучыларга грамоталар тапшырды. 

Мәктәбебездә табигать фәннәре атналыгы бара. 2017 ел - Экология елы буларак игълан ителде. Россия Федерациясенең бөтен регионында "Сделаем вместе" дигән тема астында зур масштаблы дәресләр үтәчәк. Биология укытучысы Гилязиева Г.Р., яшь буында экологик тәрбияне үстерү, саклау максатыннан, "Безнең белән уртаклаш" ("Разделяй с нами") темасы астында экологик дәрес үткәрде. Дәрестә укучыларга җир шарын чүп-чар калдыкларыннан арындыру, аны дөрес итеп бүлү һәм эшкәртү ысуллары аңлатылды.

"Ана! Бөек исем! 

Нәрсә җитә ана булуга!

Хатын-кызның бөтен гүзәллеге, 

Бөтен күрке - ана булуда!  дип язган Такташ. Әйе, әниләребезгә атап бик күп шигырьләр, әдәби әсәрләр иҗат ителгән. Әмма аларга булган рәхмәт хисләребезне без никадәрле тырышсак та, әйтеп бетерә алмаячакбыз. Бүген гадәти булмаган дәрестә 5-6 класс укучылары да үзләренең әниләренә рәхмәт хисләрен җиткерделәр. "Мәрхәмәтле безнең Әниләр!" исемле кичәне Гилязиева Гөлчәчәк Рифгатовна һәм Хисмәтуллина Венера Бариевна әзерләделәр. Үзеңнең әниең белән бер партада утырып, укытучы сорауларына җавап бирү, аның никадәрле якын, газиз булуы турында әниеңнең күзләренә карап әйтү онытылмаслык мизгелләр ул. Балаларының кечкенә чаклары, тәүге адымнары турында сөйләгәндә әниләрнең күңелләре тулды. Бишек җырын да көйләделәр, үзләре яратып пешерә торган ризыкларны әзерләү серләре белән дә бүлештеләр. Укучылар әниләргә үз куллары белән әзерләгән бүләкләрен бирделәр, бәйрәм белән котладылар. Ахырдан бергәләшеп чәй эчү дә бәйрәм рухы өстәде. Кызыклы мизгелләрне фотога төшереп, мәктәп елларының, балачакның бер дәресе, бер көне, бер бәйрәме үтеп китте. Әмма һәркемнең күңелендә әниләргә карата рәхмәт хисләре, матур уй-теләкләре артты.

    Бүген Язның беренче бәйрәме - 8 Март бәйрәме уңаеннан 5-8 нче класс кызлары  “Яз гөлләре” исемле уенда катнаштылар. Кызларыбыз матур итеп үзләре белән таныштырдылар, җыр-биюдә осталыкларын күрсәттеләр. Шигырьләр сөйләүдә дә югалып калмадылар, күңелгә үтеп керерлек итеп бишек җырлары да башкардылар. Кызларыбыз уңганлыкта, чибәрлектә, тапкырлыкта сыналып, “Иң чибәр кызлар” һәм “Иң уңган кызлар” исеменә лаек дип табылдылар.

Әзәк башлангыч мәктәбендә 8 март бәйрәме уңаеннан "Могҗизалар кыры" уены үткәрелде. Әти-әниләр һәм балалар үзара көч сынаштылар. Бәйрәм җыр-биюләр, шигырьләр белән үрелеп барды. Бәйрәм күңелле үтте, әти-әниләр дә , балалар да уеннан канәгать калдылар.