Китапханә ул - мәктәп терәге.  Ә мәктәп – белем йорты. Мәктәп китапханәсе укучыларны белемле итүдә зур роль уйный. Белемнең күп өлешен кеше үзлегеннән китаплардан ала. Китапханәдә бик күп мәгълүмат, тарихи ядкарьләр, аң-белем, мәгърифәт тупланган. Китапханә - серләр дөньясы, рухи мирасыбызны буыннардан - буыннарга тапшыручы, акылның, изге олуг фикерләрнең чишмә башында торучы. Китапханә китап киштәләрендә тезелеп торучы китаплары, аларның меңләгән саны белән түгел, ә үзенең укучылары белән яши, шулар белән матур. Бала чакта китап укудан да күңелле нәрсә юктыр. Безнең мәктәбебезнең башлангыч сыйныф укучылары да китап укырга бик яраталар. Китапханәгә бик теләп йөриләр. 

10 нчы март көнне, Иске Кырлай төп мәктәбендә, педагог-организаторларның чираттагы семинар-киңәшмәсе булып узды. Семинарда 1-4 класс укучылары катнашында “Белем иленә сәяхәт” уен экскурсиясе, ”Ялкын” укучылар оешмасы утырышы, кусудама-корзин ясау буенча мастер-класс, Г.Тукай тууына 130 ел тулуга багышланган “Таныш булыйк,Шүрәле!” спектакле һәм “Кызлар-йолдызлар” кичәсе тәгъдим ителде.

     Cәрдәбаш башлангыч мәктәбе укучылары дәресләрдән соң төрле түгәрәкләрдә шөгыльләнәләр. “Яшь талантлар” түгәрәгендә үз тавышларына ия булырга өйрәнәләр. Сәхнә хәрәкәте дәресләре аеруча җанлы үтә. Гәүдә хәрәкәтенең яшь үзенчәлекләренә карап үзгәрүе  серләренә төшенү укучыларга  үз гәүдәләре белән идарә итәргә ,әсәрләрне сәхнәләштерү барышында образны ачарга  ярдәм итә.

4 март көнне Зеленодол муниципаль районының 10нчы номерлы гимназиясендә Яшьләрнең Каюм Насыйри исемендәге ХIV халыкара фәнни-тикшеренү конференциясе булды. Конференциядә мәктәбебезнең 8 нче класс укучылары Латыйпова Ч. һәм Романова А. катнашып уңышлы чыгыш ясадылар. Латыйпова Ч. II дәрәҗәле дипломга,  Романова А. лауреат дипломына лаек булдылар.

Хөрмәтле әниләребез, әбиләребез, хатын-кызларыбыз, сөйгән ярларыбыз, апа-сеңелләребез, кызларыбыз һәм оныкларыбыз. Бүгенге көндә сезнең хезмәтегез, бу дөньяда тоткан урыныгыз гаять зур! Ир-атларга сездән күп өлкәләрдә өйрәнергә дә өйрәнергә кирәк! Сезне шушы матур бәйрәмегез белән тәбрик итәм, сәламәтлек, шатлык-бәхет, уңышлар телим! Бу котлау сүзләрен укып чыгып кына калмагыз, якын кешеләрегезне, әбиләрегезне, әниләрегезне, сөеклеләрегезне, апа-сеңелләрегезне, кызларыгызны бәйрәм белән котлап чыгыгыз. Һәм бу хис-теләкләрегез елның башка көннәрендә дә сүнмәсен, сүрелмәсен!

Әни сүзе – иң бөек сүз,

Юк аңа һичбер алмаш.

Иң-иң әйбәт кешеләр дә

 Әни кебек булалмас

Тиздән 8 март халыкара  хатын – кызлар көне җитә. Безнең укучыларыбыз дәресләрдән соң   әниләргә   бүләкләр әзерлиләр.

5 март көнне 7 класс укучылары 8 март – Халыкара хатын-кызлар көне уңаеннан концерт куйдылар. Бәйрәм матур җырлар, дәртле биюләр, кызлар өчен бәйгеләр белән үрелеп барды. Бәйрәмгә җыелган әниләребез үзләренең балаларының чыгышларын зур кызыксыну белән карап утырды. Һәрберебезгә бәйрәм концерты күтәренке кәеф, җылы хисләр, якты истәлек бүләк итте.

Башлангыч класс укучылары технология дәресләрендә проект эшләрен бик зур кызыксыну белән башкаралар.

Мәктәптә “Яшь хәбәрче” түгәрәгенә йөрүче укучылар “Күңелле тәнәфес” исеме астында газета чыгаралар. Газетада укучыларның үзләре иҗат иткән шигырьләре, хикәяләре, әкиятләре урын ала, шулай ук мәктәп тормышын яктырткан мәкаләләр, бәйрәмнәр, туган көннәр белән котлаулар бастырыла.