28 нче апрель көнне Арча мәдәният йортында Бөек Җиңүнең 76 еллыгы уңаеннан  "Арский бал -2021" булып үтте. Безнең мәктәпнең укучылары да әлеге чарада катнашып  “Иң грациоз бию” номинациясендә җиңү яуладылар. Укучыларыбызны чын күңелдән әлеге җиңүләре белән котлыйбыз.

     2021 нче ел - Туган телләр һәм халыклар бердәмлеге елы уңаеннан, 7 нче сыйныф укучылары Мөхәммәт Мәһдиевнең “Без – кырык беренче ел балалары” повестеннән өзекләрне сәхнәләштереп күрсәттеләр. 

    2021 нче ел - Туган телләр һәм халыклар бердәмлеге елы уңаеннан, Габдулла Тукайның 135 еллыгына багашланган “Без - Тукай оныклары” дип исемләнгән “Тамчы-шоу” интеллектуаль уены булды. Чарада 6 нчы һәм 7 нче сыйныф укучыларыннан торган ике команда үзара көч сынашты. 7 турдан торган уен барышында укучылар Г.Тукайның тормыш юлына багышланган сорауларга җаваплар эзәделәр, аның иҗатын белүдә ярыштылар, бөек шагыйрь фоосурәтләре буенча игътибарлылыкта көч сынаштылар. Укучылар бөек шагыйребезнең тормыш юлы, иҗаты буенча белемнәренең ныклы булуын дәлилләделәр. Нәтиҗәдә, “Карлыгач” командасы җиңү яулады.  

Бар күңеллелек бөтен дөньяда,

Бар бер ямь бүген!

Нәрсәдән бу? Мин беләм:

Бәйрәм бүген, бәйрәм бүген!

Бүген без мәктәптә бөек шагыйребез Габдулла Тукай туган көнне билгеләп үттек. Шул уңайдан “Тукай яши безнең йөрәкләрдә” дигән әдәби-музыкаль кичә узды. Моннан 135 ел элек, 1886 нчы елның 26 нчы апрелендә дөньяга килеп, 108 ел элек, ягъни 1913 нче елның 3 нче апрель иртәсендә дөньядан китеп тә барган Тукай бүген дә безнең арабызда кебек. Аның иҗаты, аның геройлары безнең күңелләрдә, безнең җаныбызда. Кичәдә укучылар Тукай сүзләренә язылган җырлар башкардылар, аның шигырьләрен яттан сөйләделәр. Тукай иҗаты, аның тормыш юлы искә төшерелде. Бәйрәм чарасы “Туган тел” җырын күмәкләп башкару белән тәмамланды.

Татар театр сәнгатенең бай тарихы, матур традицияләре бар. Ул күп тармаклы зур дәрьяны хәтерләтә. Дәрья башы бик борынгы заманнарга барып тоташа.  Буген мәктәбебездә татар халкының матур традицияләре саклап, 6 нчы класс укучылары Эльмира Ибрагимованың “Никтудымнар авылында” исемле спектакленнән өзек күрсәттеләр.

     Бүген мәктәбебездә өмә үткәрелде. Мәктәп яннары тырмаланды, агач төпләре акшарланды, чүпләр җыелды.

   23 апрель -  1995 елда ЮНЕСКО резолюциясе нигезендә бөтендөнья китап һәм авторлык хокукы көне кабул ителде. Шул уңайдан мәктәбебездә бу  көн тарихы белән танышу уздырылды, укучылар яңа китаплар белән таныштылар. Китап - белем чишмәсе. Белем чишмәсе сулы булсын дисәк, китап укыйк!

   Шахмат уйнау – баланың акыл эшчәнлеген яхшырту өчен иң яхшы чара. Яшьтән шахмат белән шөгыльләнүче балаларның укуларында, бигрәк тә төгәл фәннәрдән алга китеш нык сизелә. Шахмат акыл көчен генә арттырып калмый, иҗади яктан да үстерә. Күп кенә балалар бик тынгысыз була, шахмат уены уйнап алар үзләрен тыныч тотарга, авыр мәсьәләләрне уйлап хәл итәргә өйрәнәләр. Мәктәбебездә шахмат зонасы ачылу укучылар өчен зур шатлык булды.  Балалар тәнәфес вакытларында да, дәресләрдән соң да бик теләп шахмат такталары артына утыра.

    Мәктәбебездә 1-3 нче сыйныф укучылары катнашында «Үткәнен оныткан халыкның киләчәге юк» дигән темага тәрбия сәгате  үткәрелде.  Укучылар татар халкының киемнәре, бизәнү әйберләре, гореф-гадәтләре белән таныштылар.

     Бүген бездә участок инспекторы Хисамиев Л.А. килеп укучыларга барлык кагыйдәләрне дә аңлатты.