23 нче февраль - Ватанны саклаучылар көне.  Икенче кечкенәләр төркеме бу матур бәйрәмгә бик җаваплы караганнар. Кечкенә генә булсалар да, шигырьләрен, җырларын, биюләрен чын ихлас  күңелдән яраткан әтиләренә, бабайларына җиткерделәр, Балалар әтиләре белән уенда бик теләп катнаштылар. Күзләрендәге шатлык нурлары барлык йөзләргә дә таралды. Әтиләр уллары, кызлары  белән горурланып  утырдылар.Шатлык таратучы кечкенә дусларыбызга рәхмәт.

Уртанчылар төркеме балалары "үсеп кенә җитим әле, солдат булам үзем дә"  дип җырлап бәйрәмне башлап җибәрделәр. Безнең киләчәгебез алар кулында. Әтиләреннән үрнәк алып, ныгып, сәламәт булып үсеп җитсеннәр дә, безне, илебезне сакласыннар. Әтиләре янында аларның җылысын тоеп, кыю, батыр булып үссеннәр. Без аларга ышанабыз.Бүгенге бәйрәмдә алар үзләрен солдатларча тоттылар. Бәйрәм бик мавыктыргыч, эчтәлекле булды. Рәхмәт сезгә балалар.

23 нче февраль - Ватанны саклаучылар көненә багышланган бәйрәм кичәсендә мәктәпкә хәзерлек төркеме балалары әтиләренә рәхмәтләрен шигырьләр, җырлар, биюләр аша җиткерделәр. Үз куллары белән эшләгән җилкәнле көймәне әтиләренә бүләк иттеләр. Әтиләре белән бергәләп ярыштылар. Йөзләрендә шатлык нурлары балкыса, күңелләрендә горурлык хисе уянды балаларның. Бәйрәм хатирәләре күңелләрдә озак сакланыр.

Беренче кечкенәләр төркеме балалары әтиләрен бәйрәм белән котладылар. Шигырьләр сөйләделәр, җырладылар, биеделәр, әтиләре белән уеннар уйнадылар. Бәләкәй куллары белән ясаган рәсемнәрен әтиләренә бүләк иттеләр. Бәйрәм бик күңелле булды. 

Зурлар төркеме балалары иң кадерле кешеләре-әтиләрен Ватанны саклаучылар көне белән тәбрик иттеләр. Әтиләргә багышлап шигырьләр сөйләделәр, җырладылар, биеделәр. Үз куллары белән ясаган бүләкләрен әтиләренә бүләк иттеләр. Әтиләр белән оештырылган ярышлар балаларның күңелен тагы да күтәреп җибәрде. Иң оста төймә тагучы әтиләр, бабайлар белән кем генә горурланмас икән.Бәйрәмдә туган җылы хисләр күңелләрдә озак сакланыр.

Төркемнәрдә янгын куркынычсызлыгы буенча әңгәмәләр үтте.  Янгынның бик куркыныч нәрсә булуын, кечкенә генә бер шырпының бик зур халәкәткә китерүен төрле мисаллар өстендә аңлаттылар. Балаларның янгын куркынычсызлыгы кагыйдәләрен белүләре күзәтелде. Без балаларыбызның  аңлап эш итүләрен теләп калабыз. Янгын берәүгә дә зыян салмасын. 

Зурлар төркеме балалары курчак театрларын, әкиятләрне яратып карыйлар. Тәрбиячеләре  ясаган әкияти  өй һәм әкият геройлары аларны гел үзенә тартып тора. Үзләре дә рольгә кереп уйнарга ярата. Зурлар төркеме балалары әкият геройлары аланын бик ярата. Үзләре теләгән рольне башкарып актерлык сәләтләрен сынап карыйлар. Монда аларга тәрбиячеләре Лилия Фәритовна ярдәм итә.

Җир йөзендә сугышлар башка кабатланмасын. Яшь егетләрнең гомере вакытсыз өзелмәсен, ата-аналар кайгы яше түкмәсен иде. Кеше бу дөньяга иҗат итү, җирне  ямьләү өчен яратылган. Без – тынычлык яклы!

Рәсем белем бирү эшчәнлегендә балалар рәсем ясау серләренә төшенәләр. Нинди генә алымнар кулланып ясамый алар. Кечкенә генә булсалар да, нинди зур тырышлык һәм җаваплылык  белән ясыйлар алар. Бакчабызның иң кечкенә рәссамнары алар.

Татар халык җырларын балалар бик яратып өйрәнәләр. Җырлы уеннарны бик теләп башкаралар.Икенче кечкенәләр төркеме балалары  "Кәрия-Зәкәрия " татар халык җырын җырлап бииләр. Халкыбызның үткәне белән кызыксынып яши торган яшьләр тәрбияләү безнең зур максатыбыз.