Мәктәп бакчасында төрле яшелчәләр үсә. Сарымсак, суган җыелып, саклауга куелды инде. Кабак, ташкабак уңышы да мулдан күренә. Укучылар белән су сибәбез, чүп утыйбыз, туфракларын йомшартабыз. Мәктәп бакчасында эш гөрли

 Ямьле җәй чәчәкләре белән матур. Мәктәбебез алды  аллы- гөлле чәчәкләргә күмелеп утыра. Бөтен җирдә хуш ис, чәчәкләр исе, бал исе.  Бер ел фасылы белән дә тиңләштереп булмый торган матурлык.

Бакчабызда җәй буе укучыларыбыз бик тырышып җиләк-җимеш, яшелчә үстерәләр. Суган, кишер, чөгендер, кәбестә, кыяр, помидор уңышы мулдан. Тырыш хезмәт нәтиҗәсе күренә.

Бүген уку елына әзерлекне тикшерү максатыннан, мәгариф бүлеге, янгын күзәтчелеге бүлеге һәм санэпидстанция белгечләреннән торган комиссия мәктәбебездә булды. Яңа уку елы башланыр алдыннан мәктәпләрнең әзерлеген тикшерүдә балаларның хәвефсезлеген тәэмин итү төп таләп итеп карала.  Комиссия мәктәбебезнең яңа уку елына әзерлеген тикшереп, яхшы бәя куйды.

Быел беренче тапкыр бөек Тукай яшәгән төбәктә, Яңа Кырлайда Татарстан Республикасы мәгариф һәм фән министрлыгы, Татарстан Республикасы мәгарифне үстерү институты, Арча район башкарма комитеты, район мәгариф идарәсе, Арча педагогика көллияте ярдәме белән татар теле юнәлешендә “Без Тукай оныклары” дигән төбәкара чатырлы җәйге ял аланы эшләде. Анда Татарстан Республикасының барлык шәһәр һәм районнарыннан, Мари Иле, Удмуртия, хәтта Казахстаннан 150 сәләтле бала ял итте. Безнең мәктәп укучылары да биредә рәхәтләнеп ял итеп, яңа белемнәр туплап, яңа дуслар табып кайттылар.

Мәктәп яны  тәҗрибә  участогында эш гөрли. Бакчада кура җиләге, карлыган өлгерде.  Балалар үз куллары белән кыш өчен тәмле һәм файдалы витамин әзерлиләр.

Тәҗрибә участогында эш план нигезендә алып барыла. Эш җәй буена тынып тормый. Балалар су сибәләр, чүп утыйлар, чәчәкләр, яшелчәләр үстерәләр. Мәктәбебездә орлык җитештерүгә зур игътибар бирелә. Бүген укучылар дежур укытучы Гыйззәтуллина Г.Х. җитәкчелегендә орлыклык кишерне бәйләделәр, түтәлләрен чүптән арындырдылар.