Көзге муллык, көзге байлык!

Бакчада - каз өмәсе!

Яше-карты, бала-чага - 

Шау-гөр килә һәммәсе!

Каз - кешеләр тарафыннан кулга ияләштерелгән иң борынгы кошларның берсе. Әби-бабайларыбыз бу кошны бик теләп асраганнар, мамыгыннан мендәр, түшәк, ястыклар ясаганнар. Беренче кар төшеп, көннәр суытуга гөрләтеп каз өмәләре үткәргәннәр. Каз өмәсе ул эш кенә түгел, матур итеп аралашу, күңел ачу чарасы да булган.

Бакчабыз балалары мондый йола-бәйрәмнәр белән даими танышып торалар, бик теләп катнашалар. 

Районда "Бию мәйдан" биючеләр фестиваль-конкурсы гөрли. Бу чарадан бакчабыз балалары да читтә калмады - сәхнәләрне дер селкетеп уңышлы чыгыш ясадылар.

26нчы ноябрь көнне Казан шәһәренең 10нчы гимназия базасында "Бүгенге көн педагогика фәненең актуаль проблемары" дип аталган IV халыкара фәнни конференция булып үтте. Казан федераль университеты һәм Казахстан республикасы Милли мәгариф акдемиясе оештырган бу гамәли чарада бакчабыз тәрбиячеләре Хисматуллина Лилия Фәрит кызы, Шарапова Фәрсия Фәһим кызы, Марданова Айгөл Дамир кызы, Мазнавиева Миләүшә Роберт кызы катнашып уңышлы чыгыш ясадылар. Республикабыз районнарында ФДББС кысаларында балалар бакчасында тәрбия һәм белем бирүнең торышы турында түгәрәк өстәл артында фикер алыштылар. Африка илләрендә, Казахстанда белем бирү системасы белән танышып, бай мәгълумат туплап кайттылар.

Әниләр көне уңаеннан атна буе бакчабызда күңелле бәйрәм чаралары оештырылды. Балалар әниләрне котлап бәйрәм иртәләре әзерләде - җырлар өйрәнделәр, шигырьләр ятладылар. Аларның чыгышларын әниләр бик җылы кабул иттеләр. Ә әниләрне иң сөендергәне - балаларның үз куллары белән ясаган истәлек бүләкләре булгандыр, мөгаен.

Бүген бакчабызда әлеге тема астында рус теле тәрбиячеләренең методик берләшмә утырышы булып узды. Рус теле тәрбиячесе Сабирова Эльвира Рафис кызы зурлар төркемендә рус теленә өйрәтү эшчәнлеге, Шарапова Фәрсия Фәһим кызы мәктәпкә әзерлек төркемендә сөйләм үсеше эшчәнлеге, музыка җитәкчесе Халилова Айназ Айдаш кызы белән Эльвира Рафисовна "Кошкин дом" әкияте буенча мюзикл күрсәттеләр.  Белем бирү эшчәнлекләрен һәм күңел ачу иртәсен тәрбиячеләр уңай яктан бәяләделәр, үзләренең тәкъдимнәрен җиткерделәр.

11 ноябрь көнне Казан шәәрендә республикакүләм "Кояшлы балачак" бәйгесенә нәтиҗә ясалды һәм "Тылсымлы куллар" журналының 5 яшьлек юбилее булып узды. Әлеге чарада бакчабыз тәрбиячесе Шарапова Фәрсия Фәһим кызы канашты. Аның эше "Ачык дәрес" номинациясендә җиңү яулады. Аңа киләчәктә дә иҗади уңышлар теләп калабыз!

Балаларның спорт уеннары белән кызыксынуларын арттыру, хәрәкәт активлыкларын үстерү максатыннан бакчабызда "Минем күңелле тубым" бәйге-ярышы үтте. Физик тәрбия инструкторы Зөлфия Зәет кызы ике командага тупланган балаларга туп белән нинди генә уеннар уйнатмады да, ничек кенә сынап карамады.  Балалар тупны тәгәрәтеп тә, идәнгә бәреп тә, тез арасына кыстырып та, баш очыннан йөртеп тә ярыштылар. 

Инде көзнең соңгы аена да аяк бастык, әкеренләп кышка якынлашабыз. Табигать тә кышкы йокыга әзерләнә, кышлаучы кошлар язга кадәр туган якларын калдырып, ерак сәфәргә, җылы якка юл алалар. Бүген уртанчылар В төркеме балалары хәерле юллар тели-тели "кошларны озатып" калдылар. Бакчабыз балалары аларның кайтуын сагынып көтеп алырлар. Ә үзебездә кышлаучы кошларга кышкы салыннарда азык табарга ярдәм итәргә сүз бирделәр.

Мәктәпкәчә чорда баланың кызыксынуы көчле була. Ул үзен чолгап алган тирә-юньдәге бар предметлар, күренешләр белән кызыксына, күп сору бирә. Күргәннәрен, өйрәнгәннәрен хәтеренә сала, туплый бара. Бу чорда кызыксынып үзләштергән мәгълумат тиз генә онытылмый. Шуңа күрә чит тел өйрәнүне нәкъ менә шушы чорда башларга киңәш итәләр. Бакчабызда инглиз теленә өйрәтү түгәрәге эшләп килә. Уен формасында оештырылган һәр эшчәнлектә балалар бик кызыксынып катнашалар, теләп өйрәнәләр. Бүген бакчабызда инглиз телендә Funny English күңел ачу иртәсе үтте. Балаларыбыз уйный-уйный инглиз телендә аралаштылар. Мондый чараларда киләчәктә әти-әниләрне дә көтеп калабыз.

Иртән торсам кар яуган,
Җир ак юрган ябынган.
Көз яттым – кыш уяндым,
Сулар һава сафланган.

Беренче кар яуган... Кичә генә елап торган күк йөзеннән кышның беренче хәбәрчеләре - шук кар бөртекләре салкын һавада уйный-уйный тиз арада көзге коры сары үләнне ак юрган белән каплаган… Балалар бу аклыкны, бу матурлыкны кызыксынып күзәтәләр. Тиздән, бик тиздән кыш килеп җитүгә ихлас шатланалар...