29 һәм 30 нчы мартта укучыларның Н.И. Лобачевский исемендәге Идел буе фәнни конференциясе уздырылды. Безнең гимназиянең 11 укучысы төрле секцияләрдә фәнни эшләрен якладылар.
10 А сыйныф укучысы Фасахов Булат “Туфан Миңнуллинның сәхнә әсәрләрендә рус-европа алынмаларын үзгәртү нигезендә туган гади сөйләм лексикасы” исемле фәнни хезмәте өчен I дәрәҗәдәге диплом белән бүләкләнде. 8 А сыйныфы укучысы Йосыпова Гүзәл, “1552 нче елдан соң татар халкынынң язмышы. Яулап алуның нәтиҗәләре” темасына фәнни эш яклап, “Уңышлы чыгышы өчен” дипломына лаек булды. Укучыларны зур җиңүләре белән котлыйбыз. Иҗади уңышлар телибез!

Казан шәһәре Сәләтле балалар белән эшләү үзәге башлангыч сыйныф укучылары өчен “Уку тизлеге” олимпиадасы үткәрде. Безнең гимназия укучылары, әлеге олимпиадада катнашып, яхшы нәтиҗәләргә ирештеләр:
Шәхси беренчелек буенча җиңүче дипломнарына ия булучылар: Максимова Мария(4в), Кыямова Ралинә(4а), Фатыйхова Камилә (4а), Сәләхов Алмаз (4а), Мехоношина Екатерина (4б), Сөләйманова София (2б).
“Артист” номинациясе буенча җиңүче дипломнарына лаек булучылар: Максимова Мария(4в), Кыямова Ралинә(4а), Фатыйхова Камилә (4а), Әхмәтова Камилә (3а), Сөләйманова София (2б).
“Тизлеккә уку” номинациясе буенча җиңүче дипломнары белән бүләкләнүчеләр: Фатыйхова Камилә (4а), Сәләхов Алмаз (4а), Сөләйманова София (2б).
Аларны котлыйбыз! Алга таба да зур уңышларга ирешүләрен телибез!

21 нче март - көн белән төн тигезләшкән көн. Татарларның борынгы бабалары, башка төрки халыклар кебек, бу көнне бәйрәм иткәннәр. Тарихтан билгеле: Казан татарлары 18 нче гасырның азагында да Яңа елны көн белән төн тигезләшкән көнне үткәргәннәр. Бүген 1 нче гимназия укучылары татар, рус, инглиз теле дәресләрендә әлеге бәйрәмнең үзенчәлекләре турында сөйләштеләр.

Бүген, 20 нче мартта 3 нче сыйныф укучылары, укытучылары Исмәгыйлева М. А. һәм Зиһаншина Г.Х. җитәкчелегендә, әниләре һәм дәү әниләре өчен зур бәйрәм оештырдылар. Укучылар сөйләгән күңелгә үтеп керерлек мәгънәле шигырьләр, оста итеп башкарылган биюләр, матур итеп җырланган җырлар залда утыручы бер генә тамашачыны да битараф калдырмады.

2014нче елның 20нче мартында гимназиядә Юл хәрәкәте куркынычсызлыгы көне узды.
Мәктәбебезнең күп кенә укучылары башка районнарда яшиләр, шуңа күрә гимназиягә мәктәп автобусы белән һәм мөстәкыйль рәвештә киләләр. Укучылар юлда дөрес хәрәкәтләнергә, җир асты һәм җир өсте юлларын чыкканда, юнәлешне дөрес таба белергә дәресләрдә дә өйрәнәләр. Юлда йөргәндә, куркынычсызлыкны саклау көне кебек чаралар үткәрүгә дә гимназиядә аерым урын бирелә. Бүген ЮХИДИ хезмәткәрләре укучыларга юлда йөрү кагыйдәләре турында лекция үткәрделәр.

Сәламәтлек- зур байлык. Шул байлыкны саклау өчен, һәрьяктан да хәбәрдар булырга кирәк.
Гимназиядә “Туберкулез һәм аны булдырмау өчен, профилактика чаралары” дигән темага ункөнлек бара. Чара кысаларында сыйныф сәгатьләре, әңгәмәләр үтте, шәфкать туташы чыгышы тыңланды, укучылар тарафыннан рефератлар эшләнде. Бу куркыныч авыруны йоктырмас өчен, ниләр эшләргә кирәклеген һәр укучы аңлагандыр, дип уйлыйбыз.

Гимназиядә, яхшы укыр өчен, барлык шартлар да тудырылган. Шуларның берсе – уңайлы автобус. Районда иң беренчеләрдән булып, 2006 елдан бирле укучыларыбыз гимназиягә иркен, матур автобуста киләләр, ә 2011 елдан укучылар гимназиягә 2 автобуста йөриләр. 2014нче елның март аеннан тагын да зур шатлык: укучылар һәм аларның әти-әниләре өчен - бездә яңа автобус. Әти-әниләр шушы автобуста балаларының исән-имин гимназиягә барып җитүләренә, дәресләрдән соң өйләренә рәхәтләнеп кайтуларына бик сөенәләр.

1 нче татар гимназиясендә Зиннәтов Наил Шәйдуллович җитәкчелегендә дүртенче ел “Милли көрәш” түгәрәге эшли. Егетләребез 2 нче сыйныфтан башлап бу түгәрәккә бик теләп йөриләр, 8 нче “А” сыйныфы укучылары (алар 5 нче сыйныфтан шөгыльләнә) зур уңышларга да ирешә башлады. Бу уку елында алар Яр Чаллы, Кайбычта булган ярышлардан 3 нче, 4 нче урыннарга лаек булып кайттылар. 15 нче мартта 1998-1999 нче елгы егетләр арасында “Татарча көрәш” буенча Казан шәһәре беренчелегенә уздырылган ярышта Фәйзрахманов Рөстәм 3 нче, Кадыров Руслан 4 нче, Габидуллин Нур 5 нче урынны яулады. Егетләргә алдагы ярышларда уңышлар телибез, киләчәктә аларның милли көрәш батырлары булуына ышанабыз!

Кешелек нинди дәвердә яшәсә дә, җәмгыять күптөрле үсеш юлларының кайсын сайласа да, кешеләр арасындагы мөнәсәбәтләрне көйләүдә төп рольне әхлак нормалары үти. Укучыларны әхлаклы, зәвыклы итеп тәрбияләүдә музейларның да роле зур. 4В сыйныфы укучылары укытучылары Гөлнара Нурисламовна җитәкчелегендә татар халкының бөек композиторы С.Сәйдәшев музеенда булдылар. Татар сәнгате, С.Сәйдәшев иҗаты турында алган яңа мәгълүматлар укучыларның зәвыгын үстерүгә зур өлеш кертә.

Бүген, 7 нче мартта, 1 нче татар гимназиясе укучылары, укытучыларны, әниләрне Халыкара хатын-кызлар көне белән котлап, зур бәйрәм концерты куйдылар. Җыр, бию түгәрәкләрендә, “Фикердәш” театр студиясендә шөгыльләнүче балалар иҗаты һәркемне сокландырды. Татар теле һәм әдәбияты укытучысы Ләйсән Ибраһимовна, музыка укытучысы, җыр түгәрәге җитәкчесе Фәридә Шамилевна, өстәмә белем бирү педагогы Гөлчәчәк Нургалиевна, бию түгәрәге җитәкчесе Лилия Гаделшина тарафыннан әзерләнгән концерт күңелләрне күтәрде. Балаларга, бәйрәмне оештыручыларга зур рәхмәтебезне белдереп, барчагызны бәйрәм белән кайнар котлыйбыз.