Быел дүртенче тапкыр «Илһам» бөтенроссия яшь язучылар, шагыйрьләр, драматурглар бәйгесе үткәрелде. Бәйгене Татарстан Республикасы мәгариф һәм фән министрлыгы Татарстан Республикасы язучылар берлеге, Казан (Идел буе) федераль университеты белән берлектә үткәрә. Быел Татарстанда һәм Россиянең төрле төбәкләрендә яшәүче яшь иҗат көчләре «Илһам» бәйгесенә 2800 эш тәкъдим иткән. Шуларның өч йөзе – җиңүчеләр һәм лауреатлар – 12 апрель көнне Пирамида мәдәни күңел ачу комплексында уздырылган бәйрәмдә катнашты. Алар арасында безнең гимназиянең 3 укучысы да бар иде.

12 апрель - Космонавтика көне уңаеннан, гимназиянең мөхтәрәм укытучысы, Ю.А. Гагаринның үзен күрү бәхетенә ирешкән, беренче космонавт белән кул биреп күрешкән шәхес, физик Н. Г. Гыймадиев укучыларга актлар залында “Галәмдә-кеше!” дип аталган лекция сөйләде. Лекциянең максаты - укучыларның космос турындагы күзаллауларын киңәйтү; логик фикерләүләрен, хәтер һәм дикъкатьләрен үстерү; космонавтика өлкәсендәге белгечләргә хөрмәт хисе тәрбияләү иде.

11нче апрель көнне безнең гимназиядә “Укыту-тәрбия барышында заманча технологияләрне куллану“ дигән темага Татарстанның Апас, Балтач һәм Питрәч районнары җирлегеннән килгән мәктәп директорлары өчен тәҗрибә уртаклашу семинары булып узды. Семинар - стажировка эшендә 6 директор катнашты. Гимназия кунакларны ишек төбеннән үк ачык йөз, тәмле сүз белән милли рухта каршы алды. Тәҗрибә уртаклашырга килгән кунаклар белән фикер алышу актлар залында дәвам итте. Эшлекле аралашуны гимназия директоры Г.Г. Шәмсиева ачып җибәрде.

7 апрель – Бөтендөнья сәламәтле ккөне уңаеннан, гимназиядә сыйныф сәгатьләре үткәрелде. Укучылар белән әңгәмәдә бу юлы сүз Шикәр авыруының (диабет) организмга йогынтысы турында барды. 

Гимназиядә “Тукай айлыгы” башланып китте. Сыйныф җитәкчеләре бик ныклап сыйныф сәгатьләрендә укучылар белән Тукайга багышланган әңгәмәләр, Тукай иҗатына багышланган чаралар уздыралар. Менә бүген дә 7 “А” сыйныфында Тукай шигырьләрен сәнгатьле итеп яттан сөйләү ярышы узды, шул рәвешле, иҗаттагы хис аша туган телебезнең аһәңен тою күнекмәләренә дә басым ясалды.

6нчы апрель көнне Халыклар Дуслыгы Йортында «Казан-Йорт» фестиваленең шәһәркүләм туры узды. Фестиваль ахырында район күләмендә уңышка ирешкән укучыларны бүләкләү тантанасы булды. Район күләмендә узган “ Казан-йорт” фестивалендә Хөснул Вәлиуллин көе , Рәшит Әхмәтҗанов сүзләренә иҗат ителгән “Акчарлаклар” җырын башкарып, II дәрәҗә Лауреат булган гимназиянең 8 “А” сыйныфы укучысы ( җитәкчесе - Ф. Ш. Мостафина) Д. Фаекова да диплом белән бүләкләнде. Афәрин! Укучыбызны һәм җитәкчесе Ф.Ш. Мостафинаны уңышлары белән котлыйбыз!

«Татарстан Республикасы халыкларының телләре турында Закон» ның утәлешен, туган телне, милли hәм рухи мәдәниятне үстерү максатыннан, апрель ае “ТУГАН ТЕЛ” айлыгы дип билгеләнде. Без дә апрель аен гимназиядә “ТУГАН ТЕЛ” айлыгы дип игълан иттек.

Казан шәһәренең Мәгариф идарәсе, А. Алиш исемендәге Балалар иҗат сарае һәм Г. Тукайның әдәби музее тарафыннан оештырылган «Илебездә, телебездә,күңелләрдә Г.Тукай мәңгелек» дип аталган бәйгенең йомгаклау нәтиҗәләре билгеле булды. Үз номинациясендә район күләмендә беренчелекне алган 8 “А” сыйныфы укучысы Д. Фаекова бу юлы да сынатмады. Шәһәр күләмендә узган бәйгедә «III дәрәҗә Лауреат» исеменә лаек булды ул. Диләне һәм аның җитәкчесе Э.Р. Хөснетдинованы уңышлары белән котлыйбыз!

Студентлар тормышының әлеге һәм башка кызыклы яклары белән гимназиябез укучыларын бүген Студентлар Лигасының урта махсус һәм югары белем бирүче уку йортларыннан җыелган актив студентлар командасы – “ Студент солянкасы” таныштырып китте.

Бүген гимназиябездә үзенчәлекле сыйныф сәгате үтте. Аны Казан шәһәре Ваһитов районының прокурор ярдәмчесе Рамил Фәритович Галиев уздыры. Ул югары сыйныф укучыларына "Наркотик матдәләрнең законсыз әйләнешенә каршы көрәш" темасына лекция укыды.