Бүген Казанда, Президент Резиденциясендә, Халыкара укытучылар көне уңаеннан тантаналы чара  узды. Әлеге чарада Татарстан   Республикасының иң мәртәбәле мөгаллимнәрен бүләкләделәр. Бу чара гимназия өчен аеруча истәлекле булып, аның тарихына уелып калды.

Гимназиябездә бик күп еллар хезмәт куючы инглиз теле  укытучысы Чулпан Мөбиновна Татарстан Республикасы Президенты указы нигезендә “Татарстанның атказанган укытучысы” исеменә лаек булды.

Хөрмәтле Чулпан Мөбиновна! Сезне чын күңелебездән әлеге шатлыклы вакыйга – мактаулы исем алу белән тәбрик итәбез. Сезгә алга таба да иҗади, фәнни уңышлар, гаилә бәхете, матур тормыш телибез. Киләчәктә дә  куйган максат-хыялларыгызга ирешеп яшәгез!

Һәр атнаның дүшәмбесендә укучылар өчен махсус сыйныф сәгатьләре уздырыла. “Мөһим сөйләшү” дигән сыйныф сәгатьләрендә сүз җәмгыять һәм шул җәмгыятьне тәшкил итүче кешеләр тормышы турында бара.

Бу атнада укучылар “Укытучыга хас сыйфатлар” дигән темага фикер алыштылар.

Гимназиябездә традицияләр бик күп. Менә инде күп еллар мәктәп радиосы эшләп килә. Һәр атна дүшәмбе төрле сыйныф укучылары безне үткән атна яңалыклары һәм киләсе атнада булачак чаралар, истәлекле көннәр һәм сыйныфлар рейтингы белән таныштыралар.

Бу атнада гимназия радиосында 8а сыйныфы укучылары чыгыш ясадылар.

Гимназиядә октябрь аенда узачак чараларга әзерлек эшләре башланып китте. Үзидарә членнары җыелышта үз фикерләре белән уртаклаштылар. Вазыйфаларны бүлешеп, номерлар турында сөйләштеләр.

Ел саен 1 октябрьдә бөтен илебез Халыкара өлкәннәр көнен билгеләп үтә. Бу көнне барлык өлкәннәргә - сугышта катнашкан каһарманнарыбызга, аннан соңгы авыр елларда илебезне торгызуда фидакарьләрчә хезмәт куйган, имин елларда ил куәтен арттыруга лаеклы өлеш керткән ветераннарыбызга ихтирам белдерү һәм кайгыртучанлык күрсәтү матур традициягә әйләнде.

Шул уңайдан гимназиябездә Өлкәннәр көненә багышланган радиоэфир үтте. Укучылар матур җырлар җырладылар, шигырьләр сөйләделәр.

Бүген сыйныфларда, Цифрлаштыру елы кысаларында , “Пилотсыз технологияләр” темасына “Урок цифры” дәресләре узды. Укучылар пилотсыз технологияләр, аларның үсеше, төрле аппаратлар, аларны куллану даирәсе турында мәгълүматлар белделәр. 

Гимназиябездә, традиция буларак, күп еллар электрон газета чыгарыла. “Гимназия хәбәрләре”ндә яңалыклар, узган чаралар, файдалы киңәшләр, гимназия йолдызлары турында укый аласыз. Газетаның сентябрь санын сылтамага басып укый аласыз: https://gazeta.tgim1.ru/96

“Экстремизмга – Юк!” айлыгы кысаларында барлык сыйныфларда тәрбия дәресләре үтте. Экстремизм күренешләре,  “терроризм”, “экстремизм” төшенчәләре аңлатылды. Яшьләр арасында төрле формаль булмаган оешмалар турында, алдагы елларда булган терактлар, фаҗигале вакыйгалар, аларның чишелешләре турында сөйләп үтелде. 

Югары сыйныфта иң борчыган сорауларның берсе – ул һөнәр сайлау. Нинди һөнәрне мин яратып башкарырмын? Фикерем үзгәрмәсме? Киләчәктә кайсы һөнәр ияләре кирәкле булыр? Әлеге сорауларны барлык 9-11 сыйныф укучылары үзләренә бирәләрдер.

Укучыларга әлеге мәсьәләдә ярдәм итү өчен, гимназиядә төрле чаралар оештырыла.

Бүген исә Вахитов районы мәшгүльлек үзәге хезмәткәре Кувшина Л.С. тарафыннан әлеге темага лекция укылды. 8-9 сыйныф укучылары бик күп яңа мәгълүматлар белән таныштылар.

Күп еллар гимназиябездә “Туган якны өйрәнү” музее эшләп килә. Һәр ел 1 нче сыйныф укучылары анда кунак булалар.

Бүген исә 1 нче “А” сыйныфы укучылары музейга сәяхәт кылдылар. Алар мамонт сөякләре, тарихи мәгълүматлар белән таныштылар, яңа бистә, гимназия тарихы белән бәйле экспонатларны карадылар.