"Мияу - мияу", - ди песи,

Гел йоклап кына ятмый.

Йорт - кураны, келәтне

Күсе - тычканнан саклый,

Эт ишегалдында көн - төн

Ул кизүдә, ул - сакта

"Һау - һау" дип өреп куя,

Шыгырдап алса капка.

   Бәйрәмнәр кешеләрнең тормышында мөһим бер вакыйга булып тора. Ислам динендә дини бәйрәмнәр бик күп. Шуларның иң олысы Корбан гаетедер. Безнең Мишабаш "Тюльпан" балалар бакчасында да Корбан гаете бәйрәме үткәрелде. Балаларга вәгазь, динебезне олылаучы сүрәләр сөйләргә Гафиятова Надия апаны кунакка чакырдык. Ул балаларга бик тә кирәкле булган әдәп кагыйдәләрен, Бөек Коръән китабы турында сөйләде. Корбан гаете , балигъ булган балаларга намаз укырга кирәклеге турында тәфсилләп аңлатты. Надия апа һәрбер балага үзенең күчтәнәчләрен өләште. Без бакча коллективы, балалар исеменнән Надия апага бик зур рәхмәтләр җиткердек.

Көзге табын - бай табын,

Кыяр, карбыз һәм кавын

Телем - телем теленгән,

Өем - өем өелгән.

Алмалары ал төсле,

Балкып торган таң төсле.

Капсаң эри авызда,

Һәр кисәге бал төсле.

Быел да районыбызда кабак бәйрәме гөрләп узды. Бу бәйрәм дә безнең бакчабызда бик теләп катнашты. Бәйрәмдә хезмәткәрләр һәм әти - әниләр көче белән ясалган бик күп төрле әкият геройлары, чәчәкләр, вазалар һәм тәм - томнар бар иде.

“Хәрәкәттә – бәрәкәт “  диләр, балалар белән көзге йөгерү марафонында катнаштык  һәм катнашкан һәрбер балага истәлекле бүләкләр тапшырылды.

Көз килде. Үләннәр

Саргайды, шиңде

Сап - сары яфраклар

Җиргә сибелде.

Чыныкканны корыч белән

Дөрес тиңлиләр.

"Таза тәндә - таза  рух " - дип ,

Дөрес  сөйлиләр.

Табигатебезне яшеллеккә күмү максатыннан уен мәйданчыгына агач үсентеләре утырттык. Саф һавага чыккан саен без аларны күзәтеп, тәрбияләп торабыз.

Безнең "Тюльпан” балалар бакчасында 2012 – 2013 уку елында район мәгариф бүлегенең август конференциясендә күргәзмә – материаллар әзерләү буенча III урынга лаек булды. Бакчада эшләүче һәр хезмәткәр бу эштә үзенең барлык хезмәтен,тырышлыгын һәм сәләтен күрсәтте.Мин бакча мөдире буларак аларга чиксез рзхмәтемне белдерәм, эшләрендә һәм гаиләләрендә зур уңышлар телим. Безнең коллектив һәрчак дус һәм тату. Бакча тормышында нинди генә эшләр башкарылмасын барысынада уртак тырышлык куела. Киләсе уку елында да бердәм дус коллектив булып эшләргә язсын.Барыгызгада уңышлар телим!

Универсиада тиздән,

Була безнең Казанда.

Нык көчлеләр, сәламәтләр,

Катнашалар ,ди, анда...