Бүген мәктәбебездә "Туган телгә  һәм туган якка мәхәббәт тәрбияләүдә мәктәп китапханәсенең роле" темасына  мәктәп китапханәчеләренең район семинары узды.. Китаханәчеләргә "Туган телем-иркә гөлем, киңдер сиңа  күңел түрем"  дип исемләнгән библио-уен тәкъдим ителде. Уенда 5-6 класслардан "Туган тел" һәм "Дуслык" командалары катнашып, үзләренең татар телен, халык авыз иҗатын ни дәрәҗәдә белүләрен сынадылар, китап укуга кагылышла төп кагыйдәләрне искә төшерделәр. Китапханәчеләр дә "Парыңны тап" уенында үзләренең матур әдәбиятны яхшы белүләрен дәлилләделәр.  Авылдашыбыз Люция  Шәрәфиева иҗат иткән  "Эчәр суым синдә, Кибәчем" китабына күзәтү барышында  8,10 класс укучылары бу китапның төп бүлекләре белән таныштырдылар. Сугыш чоры баласы Әлфинур апаның Кибәче авылы халкын авыр сугыш елларында ачлыктан коткарган кап сугу һөнәре белән таныштыруы, тарих укытучысы Ләйсән Рафиловнаның мәктәп тарихын чагылдырган бүлекне тәкъдим итүе, авыл китапханәчесе Гөлүсә Рамазановнаның әлеге китап һәм аның авторына бгышлап язылган шигыре кичәне тагын да тулыландырды. Әлеге чара  укучыларыбызның үз туган ягыбыз белән горурлану хисләрен чагылдырган "Шушы яктан, шушы туфрактан" без җыры белән тәмамланды. Мәктәптә оештырылган курчак театрының премьерасы-"Аю һәм Мәрьям" әкиятен дә кунаклар яратып кабул иттеләр. Соңыннан  китапханәчеләр үз эшчәнлекләренә анализ ясап, алга таба бурычлар билгеләделәр. Семинар нәтиҗәле узды.

Кыш буе мәктәп тирәсендә эленгән җимлекләрдән  безнең якта кышлаучы кошлар өзелмәде. Укучылар кошларны күзәттеләр, аларга ярдәм итү үзләренә дә бик ошады. Бүгенге көндә сыерчыкларны каршыларга әзерләнәбез. Технология укытучысы  Наил Миннеязович җитәкчелегендә 5-7 класс егетләре сыерчык оялары ясадылар, бу оялардан күргәзмә оештырылды. Тиздән  үзебез ясаган ояларга килгән сыерчык тавышыннан мәктәп тирәбез ямьләнер.

        Укучыларыбыз Газизова Илүзә һәм Гафиятова Илзия(укытучылары Гафиятова Ә.Ф.) Васил Заһит улы Гарифуллин исемендәге "Серле каләм" иҗат бәйгесенең бүләкләү тантанасында катнаштылар. Г.Илүзә  "Наркотикларга каршы көрәш" , Г.Илзия "Иҗади эшләр" номинацияләрендә II дәрәҗәдәге Дипломнар белән бүләкләнделәр.Мәктәпнең "Ай нурлары " газетасы иҗат коллективы шулай ук II дәрәҗәдәге Дипломга лаек булды.

8 март Халыкара хатын-кызлар  көненә багышлап уздырылган "Ягез әле, кызлар!" бәйгесендә укучы кызлардан "Black Star", "ФИФ" командалары, укытучылардан "Лучшие" командасы катнашты. Командалар төрле күңелле эстафеталарда көч сынаштылар, армрестлинг, аркан тарту кебек ярышларда үзләрен сынадылар, сорауларга җавап бирделәр. Егетләр  башкарган дәртле биюләр, матур җырлар кызларга көч өстәде, җиңүгә омтылдырды. Укуытучылар командасының да көндәшләр арасында булуы ярыш рухын тагын да кискенләштерде. Нәтиҗәдә " Black Star" командасы җиңү яулады, "ФИФ" һәм "Лучшие" командалары 2нче урынга лаек булды. Бәйрәмне оештыручы ир-ат укытучыларга зур рәхмәт!

 5 сыйныфта "Безнең гаилә иң яхшысы" дип исемләнгән Гаилә бәйрәме класс җитәкчесе Ильясова Рәфинә  Габдрәшидовнаның  "Гаилә-җәмгыятьнең нигезе" темасына чыгышы белән башланып китте. Балалар һәм әти-әниләр ике командага бүленеп төрле өлкәләрдә сынаулар үттеләр.Әтиләр һәм кызлар кухня серләрен өйрәнделәр, гаиләләрнең  логик  фикерләү сәләтләре дә, әниләрнең ризык әзерләүдә , гаиләләрнең каләм тибрәтүдә дә  осталыклары сыналды.Чәй табыны артында укучыларның һәм әти-әниләрнең чыгышы белән үрелеп барган бәйрәм һәркемнең күңеленә хуш килде.

4 мартта 10 класста "Яратып кавышканнар" дип исемләнгән Гаилә бәйрәме узды. Бәйрәм класс җитәкчесе Резеда Вакифовна башкаруында    "Серле мәхәббәт мизгеле"  җыры белән башланып китте. Яшьләргә үрнәк булырлык 5 гаилә балаларына тату гаилә серләрен җиткерделәр, үзләренең мәхәббәт тарихлары турында сөйләделәр. Әтиләр кечкенә бала үстергән вакытларын искә төшереп бала төрделәр, бишек җыры җырладылар. Һәр гаилә үзенең талантлы икәнлеген күрсәтте, алар әзерләгән чыгышлар шуны раслады. Концерт номерлары  һәм төрле уеннар белән чиратлашкан бәйрәм әти-әниләргә дә, укучыларның үзләренә дә бик ошады.

          Каримова Л.Р. 6 нчы сыйныфта тарих  фәне буенча "XIV гасырның икенче яртысында рус җирләрен туплау" темасына ачык дәрес үткәрде.ФГОС таләпләренә туры килгән дәрес барышында төрле эш алымнары кулланылды. Белемнәрне актуальләштерү, яңа теманы ныгыту барышында укучыларның системалы эш нәтиҗәләре күренде.

29 февраль-3 март көннәрендә узган  физик тәрбия буенча республика олимпиадасында  мәктәбебездән 2 укучы катнашты һәм Давлиев Ильяс призер исеменә  лаек булды. Ә Каримова Руфинә нибары 1,5 балл белән призерлар исемлегенә кертелмәде. Бу укучыларыбызга , аларның җитәкчеләре Мубаракзянов Р.Р.  алга таба да уңышлар телибез.

 Мәктәбебезнең "Күңелле сәхнә" түгәрәге членнары (җитәкчесе Шафикова Г.Р.)  "Сәхнә көзгесе" X  ТӨБӘКАРА  БАЛАЛАР МИЛЛИ ТЕАТР ФЕСТИВАЛЕндә катнашып, II дәрәҗәдәге Дипломга лаек булдылар. Котлыйбыз! Алда иҗади уңышлар теләп калабыз.

Кызларыбыз, волейбол буенча зона ярышында катнашып, III урын алып кайттылар.Афәрин.кызлар! Алга таба тагы да зуррак уңышларга ирешеүгезне  телибез.