27 нче ноябрьдә Лениногорск мәдәният сараенда «Аулак өй – көрәш» төбәкара проекты уздырылды. Ул  Бөтендөнья татар конгрессы, ТРның Мәдәният министрлыгы, ТР Мәгариф һәм фән министрлыгы, ТР журналистлар берлеге ярдәмендә оештырыла.

Әлеге проектның авторы – “Үз өем” журналы редакторы Сәрия Закирова. Аның максаты: татар халкының милли гореф-гадәтләре белән таныштыру, бу гореф - гадәтләргә, йолаларга ихтирам, милли җырлы - биюле уеннар, милли ризыклар аша туган телгә һәм әдәбиятка карата хөрмәт тәрбияләү.

Аулак өй-көрәш– ул элеккеге аулак өйләрдән бераз аерылып тора, монда җыр-биюдән тыш, әдәби ярышта да көндәшләрең белән көч сынашырга кирәк. Лениногорск мәдәният сараенда узган уенда катнашучылар җыр-бию, нәфис сүздә осталыклары  белән беррәттән татар әдәбияты классиклары, Муса Җәлилинең, әсәрләрен ни дәрәҗәдә белүләрен дә күрсәтте. Биремнәр шактый катлаулы иде.

Жюри һәр биремне җентекләп анализлады һәм нәтиҗәләр чыгарды.

“Аулак өй- көрәш”нең җиңүчесе – В.П.Чкалов исемендәге Шөгер  урта мәктәбе укучылар командасы -“Чишмәкәй” төркеме.  Алар алдагы этапта республикада катнашу хокукы алды.

Төркемдә катнашкан һәр укучыга, укучылар командасын әзерләүче татар теле укытучыларына дипломнар һәм истәлекле бүләкләр тапшырылды.

“Үз өем” электрон журналы мөхәррире Сәрия Закирова мәктәбебез укучыларына соклануын белдерде һәм уңышлар теләде.