Бүген чыгарылыш сыйныф укучылары өчен Соңгы кыңгырау чыңлады.

 Соңгы тапкыр чыңлый бу кыңгырау,

Соңгы тапкыр дәшә дәрескә.

Укытучым, синен алда бүген

Сынау тотам соңгы дәрестә.

Ел да шулай очар кошлар кебек

Озатып кала мәктәп - изге йорт.

Сабый чакны эзләп без килербез,

Онытма син, мәктәп, безне көт.

Котлыйбыз!

7 нче сыйныф укучысы  Галиева Эльвина Саба районында үткәрелгән «Наука и культура: новый взгляд» халыкара фәнни – практик конференцияседә катнашып, I урынга лаек булды. (Җитәкчесе:  татар теле укытучысы Янгирова Л. Ф.

 Булдырдыгыз!

Бүген 15 май – Гаилә көне уңаеннан барлык сыйныфларда да “Гаилә – җылы учак” темасына тәрбия сәгате үтте. Дәреснең максаты  балаларга кешенең тормышында иң мөһиме гаилә, аның әгъзаларе арасындагы җылы мөнәсәбәт икәнен төшендерү, гаиләдәге кешеләргә карата ихтирам, хөрмәт хисләре тәрбияләү иде.

Россия Федерациясенең барлык төбәкләрендә үткәрелгән әлеге  акциягә мәктәбебезнең укучылары да бик теләп кушылды.

“Үлемсез полк” акциясе кысаларында  мәктәп укучылары кулларына Бөек Ватан сугышы геройларының  портретларын һәм чәчәкләр тотып, һәйкәл янына юл алды. Аларга әби-бабайларын, туганнарын, якыннарын сугышта югалткан башкалар да бик теләп кушылды.  Ил азатлыгы өчен шаһит киткән  каһарманнарыбыз бүгенге бәйрәм көнендә шул рәвешле “сафка басты”. Һәр портрет – үзе бер тарих, истәлек. Батырларның даны мәңгелек, күпме сулар акса да, алар турында хатирәләр халык күңеленнән җуелмыйча, буыннан буынга тапшырылып килер. Акциядә катнашучылар мәңгелек утка чәчәкләр куйдылар.

9 май- Бөек Җиңүнең 72 еллыгына багышланган митинг авылыбызның яуда ятып калган авылдашларыбызга салынган һәйкәл янында узды.

Бүген 29 апрель көнне Кодаш гомуми белем бирү мәктәбендә шимбә өмәсе үткәрелде. Мәктәп тирәләрен чистатру, мәктәп яны участогында тәртип булдыру,чүптән арындыру- бу экологик өмәнең төп бурычы иде. Шимбә өмәсенә мәктәп укучылары, укытучылар һәм хезмәткәрләр дә чыкты. Өмәдән соң тирә-ягыбыз чистарып калды.

26 нчы апрель көнне Кодаш авыл китапханәсе һәм мәдәният йорты белән берлектә Кодаш төп гомуми белем бирү мәктәбендә " Язлар безгә Тукай белән килә" дип исемләнгән әдәби кичә булды. Халкыбызның сөекле улы, бөек шагыйрь Г.Тукайның туган көненә багышлап уздырылган әлеге кичәдә 1-4 нче сыйныф укучылары шагыйрьнең "иҗат аланы" буйлап сәяхәт иттеләр, әсәрләренең геройлары белән очраштылар, шигырьләрен сөйләделәр, кызыклы сорауларга җавап бирделәр, Тукайның яраткан уенын уйнадылар, китаплар күргәзмәсе белән таныштылар. Балалар үзләренең Тукай иҗаты белән яхшы таныш булуларын күрсәттеләр. Кичә татар халкының гимнына әверелгән “Туган тел” җыры белән тәмамланды.

Бөек Җиңү бәйрәме якынлашу уңаеннан сугыш чоры балалары белән очрашу уздырылды. Очрашуга Рәсимә апа Мөэминова килде.Сугыш башланып киткәндә аңа нибары 9 яшь кенә булган. Ул укучыларга сугыш чоры балаларының авыр балачаклары турында сөйләде. Балалар игътибар белән тыңлап, туган сорауларын бирделәр. Очрашудан барыбызда бик канәгатъ калдык.

Биология укытучысы Флёра Хасановна  5-9 сыйныфларда экология темасына багышланган дәрес уздырды. 

12 апрель  Космонавтика көнен билгеләп үттек. 1961 нче елның 12 апрелендә, дөньяда беренче буларак, бортына кеше утырган “Восток” космик корабле җир тирәли орбитага чыгарылды. Бу кеше-очучы космонавты Юрий Алексеевич Гагарин. Бу хакта укучылар белән тәрбия сәгатьләре уздырылды.