Район күләмендә уздырылган шахмат ярышында мәктәбебез укучылары командасы өченче урынны яулады. Котлыйбыз!

12 апрель - космонавтика уңаеннан мәктәбебездә 5-11 сыйныф укучылары өчен математика һәм информатика укытучысы Хәкимҗанова Н.И. интеллектуаль уен үткәрде. Шулай ук беренче космонавт Юрий Гагарин турында эчтәлекле видеофильм күрсәтелде. 

Әтнә балалар видеофестивале конкурсында “Дулкын ” иҗат төркеменең “Игелек акчага кылынмый” фильмы I урынга лаек булды. Мәртәбәле кунак  Нурания Җамали тарафыннан грамота белән бүләкләнде.

"Әтнә балалар видеофестивале" эмблемасы конкурсында 5 сыйныф  укучысы Садриева Энҗе  җиңүче булып, район мәгариф бүлеге җитәкчесе Каюмов Айрат Фәнил улы тарафыннан грамота белән бүләкләнде. Бу эмблема видеофестивальнең символы итеп кабул ителде.

9 нчы апрель көнне район беренчелегенә үткәрелгән татарча көрәш ярышында Сиразиев Нуршат 50 кг авырлыкт I урын, Сиразиев Рәмис 45 кг авырлыкта II урын яуладылар. Афәрин егетләр.

Күәм урта мәктәбендә "Экологик тәрбия бирүнең әһәмияте" темасы астында ата-аналар җыелышы булып узды. Хәзерге заманда әйләнә-тирә мохиттә ясалма агулы матдәләр барлыкка килеп, аларның организмга тәэсире, дөрес туклануның әһәмияте, авыл чүплекләре проблемалары турында ТЭБДУ Ганиева Л.Ф. чыгыш ясады. Һәр сыйныф җитәкчесенең аерым фикер тәкъдимнәре тыңланды. Тәрбиядә мәктәп-гаилә хезмәттәшлегенең актуальлегенә дә басым ясалды.

31 нче март көнне мәктәп күләмендә тәрбия эшләре буенча директор урынбасарлары һәм педагог организаторлар өчен “Туган ягым яшел бишек” темасына район семинары булып узды. Мәгариф журналыннан бүлек мөдире Тахир Сабирзянов, мәгърифәт газетасыннан  бүлек мөдире Надия Шәйхетдинова,ТР Фәннәр Академиясенең Ш.Мәрҗани исемендәге тарих институтының өлкән хезмәткәре, тарих фәннәре кандидаты Тәэминә Биктимирова да катнаштылар. 3 төркемдә тәрбия сәгатьләре узды. Татарстан Республикасында узучы "Тарихи-мәдәни мирас елы"на багышланган һәм һөнәрчелек, якташ шагыйрьләр, авыл тормышы, Болгар ханлыгы һәм үзебезнең "Әләшә" тарихы белән мәктәп укытучылары Алия һәм Равил Садриевлар, Айсылу Хәбибуллина, Фәрит Борханов таныштырды. Семинарның икенче өлешендә "Туган ягым яшел бишек" исемле фәнни-гамәли конференция үткәрелде. ТЭБДҮ Ганиева Л.Ф. Ашыт заказнигы, авылның экологик проблемалары, авылның киләчәге буенча укучыларга һәм килгән кунакларга чыгышлар һәм сораулар тәкъдим итте.

28 нче март көнне Күәм урта мәктәбе укучылары “Без бит Әтнә яклары” иҗат смотр конкурсында  Садриев Равил иҗат иткән  авылдашыбыз,  Татарстанның  атказанган мәдәният  хезмәткәре, гармунчы Дилүс Мәҗитовка багышланган   “Гармунчы дигән даны бар” театральләштерелгән күренеш күрсәттеләр. Жюри тарафыннан «Тамчы» вокаль ансамбле, Вокаль-соло номинациясендә Абдуллина Энҗе , конферанслар Сафин Инсаф һәм Садриева Энҗе гала-концертка сайландылар.

27 март көнне 6-8 нче сыйныфлар өчен район күләмендә татар теле һәм әдәбиятыннан олимпиада үтте. 6 нчы сыйныфтан Төхфәтуллин Салават татар теленнән III урын, Фазылҗанова Гөлгенә  татар әдәбиятыннан II урын яуладылар. Котлыйбыз.

Мәктәптә язгы бакча эшләренә әзерлек  башланды. Кабинетларда  помидор, чәчәк рассадалары утыртылды.