Хөрмәтле укытучылар,  кадерле укучылар, әти-әниләр!  Менә тагын җәйләр узды һәм сагынып көтеп алган 1 – сентябрь – Белем бәйрәме килеп җитте. Бу көнне һәрберебез дулкынланып, шатланып каршы ала: беренче тапкыр мәктәпкә баручы да, өлкән сыйныфларда укучы да, әти-әниләр дә. Балаларны да, өлкәннәрне дә шушы көтеп алынган ямьле бәйрәм белән тәбрик итәбез.

Чәчәкләр тотып кулга,

Без чыктык олы юлга.

1 нче сентябрьдә Күкчә-Бирәзә башлангыч мәктәбендә Белем бәйрәме уздырылды.Беренче дәрестә уздырылган Тынычлык дәресе дә укучылар күңелендә мәңге сакланыр. Алар илебездә сугышлар булмасын дип үз куллары белән тынычлык символы- ак күгәрчен ясадылар.

Һава салкыная бара,

Аяк басабыз көзгә.

Сары төстә яфраклар да

Чалына инде күзгә.

Хушлаштык ямьле җәй белән,

Үтте дә каникуллар.

Бүген бәйрәм – белем көне,

Мәктәпкә илтә юллар.

Бүген –Республика көне.  Моннан  23 ел элек, 1990 елның 30 августында, республика Югары Советы Татарстан ССР ның дәүләт суверенлыгы турында декларация кабул итте.  Татарстан  Республикасы  көне  котлы  булсын!

Арча шәһәрендә мәктәп ярминкәләре ел саен уздырыла. Без  дә әлеге  ярминкәдә  бик  теләп  катнаштык. Мәктәп бакчасында үскән кыяр, кишер, чөгендер, суганны халык бик теләп алды. Шулай ук төрле дару үләннәре, кайнатма, салатлар да күпләп сатылды. Ярминкәләр бик күңелле  үтеп китте.

   Бүген Арча шәһәрендә чәчәк күргәзмәсе үтте. Мәктәбебез әлеге бәйрәмдә бик теләп катнашты. Республика көненә багышланган чәчәк күргәзмәсе күз явын алырлык иде.

19 август көнне Арчаның 3 мәктәбе актлар залында татар теле һәм әдәбияты укытучыларының август киңәшмәсе үтте.Киңәшмәдә районыбызның төрле мәктәпләреннән ана теле укытучылары катнашты.Хезмәттәшебез  Шакирова Ләйсән Мансур кызы  Төбәкара  “Без – Тукай оныклары” чатырлы ял аланы эшчәнлеге белән таныштырып чыгыш ясады.

17 нче август көнне Яңа Кырлай урта  мәктәбендә "Мәктәпкә җыенырга булыш!" акциясе кысаларында булачак 1 класс укучыларына уку кирәк яраклары һәм мәктәп сумкалары тапшыру тантанасы булды. Бу тантанада безнең мәктәптән Зиятдинов Мирсәит , Нуриев Инсаф, Чиканас башлангыч мәктәбеннән Хидиятуллин Ислам катнашты. Сумкаларны  "Бердәм Россия" партиясе җитәкчесе Залялетдинов Тәлгать Таһирович тапшырды. 

Уңыш  мул  булсын...

Матур булсынннар...