Хәрби-патриотик айлык кысаларында бүген 2 нче класс укучылары Н.Т.Гыйбадуллина җитәкчелегендә мәктәп музеенда булдылар, үзләренә күп мәгълүмат алдылар.

Сугышта үлгән каһарманнарыбызның исемнәре һәйкәлләргә уелып язылган. Сарай-Чокырча авылында да бар андый һәйкәл. Башлангыч класс укучылары аны һәрдаим карап, чистартып торалар.

Мәктәпнең "Туган якны өйрәнү музее" экспонатларга бай. Бу көннәрдә анда тагын бер экспонат артты. Бөек Ватан сугышы ветераны Фәхретдинов Әсгат абыйның (бүгенге көндә вафат) партия билетын улы Рафаил абый музейга тапшырды.  Әтисе турындагы истәлекләр белән дә бик теләп уртаклашты.

 Арча шәһәрендә Ф.Гәрәфиев истәлегенә пневматик мылтыктан ату буенча ярышлар уздырылды. Мәктәп командасы әлеге ярышта 3 урынга лаек булды. Команда составындагы укучылар: Нурисламов Р.-9 кл., Галимуллин И.-9 кл., Гафарова Г.-9 кл. Укучыларыбызны котлыйбыз!

Бүген мәктәптә Бөек Җиңүнең 70 еллыгына багышлап "Сугыш урлаган балачак" исемле әдәби-музыкаль кичә уздырылды. Кичәгә тыл һәм хезмәт ветераны Зәйнетдинова Мәдинә апа, сугыш чоры баласы Шаһниева Хәкимә апа, сугышта катнашкан ветеран әтиләренең истәлекләре белән уртаклашырга Галимҗанова Ләбибә апа, Фәхретдинов Рафаил абый килгән иде. Укучылар ветераннарга үзләренең җыр-биюләрен бүләк иттеләр, сугыш чорын чагылдырган күренешләрне сәхнәләштерделәр. 

Узган атнада мәктәптә һәр класс арасында чаңгы буенча эстафета уздырылды. Атналык линейкада җиңүчеләр бүләкләнде. Аларга Мактау грамоталары һәм дипломнар тапшырылды.

Тарих һәм җәмгыять белеме атналыгы кысаларында укучылар белән "Спорт уеннары тарихы" исемле викторина уздырылды. Аны тарих укытучысы Шәфигуллин Н.Ф. үткәрде. Укучылар лото, домино, баскетбол, шашка, шахмат, футбол уеннарының тарихы белән таныштылар. Төрле илләргә сәяхәт кылдылар.

Бөек Җиңүнең 70 еллыгы уңаеннан мәктәптә күп эшләр башкарыла. Укучылар һәм класс җитәкчеләре тыл ветераннарының, сугыш чоры балаларының өйләрендә булды, истәлекләрен туплап, альбомнар төзеде, аларны мәктәп музеена тапшырды. Шулай ук хәзерге вакытта исән булган тыл ветераннары белән әңгәмәләр үткәрү, аларның тавышларын яздыру эше дәвам итә.

Туган телгә багышланган кичәнең чираттагысын 5 нче класс укучылары белән Солтанова И.А. үткәрде. Укучылар "Табышмак әйтәм-җавабын тап" дигән кичәдә бик теләп катнаштылар.

Бүген мәктәптә 9 нчы класс укучылары һәм аларның әти-әниләре катнашында җыелыш узды. Җыелышта төп дәүләт имтиханнарына әзерлек мәсьәләләре турында сүз барды. Мәктәп директоры Хәбибуллини Ф.М.алда торган бурычларга тукталды, укыту-тәрбия эшенең торышы турында сөйләде. Район мәгариф бүлеге методисты Гатауллина Лилия Мәхмүдовна имтихан бирүдәге яңалыклар белән таныштырды, әти-әниләргә, укучыларга үзенең төпле киңәшләрен бирде. Фән укытучылары укучылар белән һәр айда уздырылган сынау эшләре белән таныштырдылар, анализладылар. Җыелыш ахырында төп дәүләт имтиханнарына яхшылап әзерләнү һәм әзерлекне ныклы контрольдә тоту бурычы куелды.