«Алтын көз» бәйрәме: табигатьнең матурлыгына һәм иҗатка багышланган көн

Көзнең иң матур чагында, октябрь аеның алтынсу-яфраклы көнендә, безнең мәктәптә чираттагы тапкыр «Алтын көз» дип исемләнгән матур традициягә әверелгән бәйрәм узды. Бу көн көзнең байлыгын, муллыгын һәм кабатланмас матурлыгын күрсәтү өчен менә дигән мөмкинлек булды.

Бәйрәмгә әзерлек мәктәпнең барлык катнашучыларын — укучыларны, укытучыларны һәм әти-әниләрне берләштерде. Мәктәп коридорында көзге яфраклардан ясалган гаҗәеп композицияләр, көзге уңыштан эшләнгән кул эшләре һәм иҗади күргәзмә каршы алды. Укучыларның куллары белән ясалган эшләнмәләр — аллы-гөлле гербарийлар, агачтан кисеп ясалган сувенирлар, яшелчәләрдән ясалган савытлар — һәркемнең игътибарын җәлеп итте.
 Мәктәпнең залында төп чаралар узды. Сәхнәдә яшь талантларыбыз чыгыш ясады:кызыклы конкурслар, матур шигырьләр яңгырады, бию, җыр бергә үрелеп барды.
 «Алтын көз» бәйрәме — ул иҗади сәләтләрне күрсәтү, табигать белән бердәмлек хисен тою һәм уку елының беренче чирегенә нәтиҗәләр ясау өчен яхшы мөмкинлек. Чарадан алган уңай хисләр һәм энергия киләсе казанышларга көч өстәде.
 Бәйрәмне оештыруда катнашкан барлык укытучыларга, шулай ук чараны югары дәрәҗәдә уздырырга ярдәм иткән ата-аналарга зур рәхмәтебезне белдерәбез. Көзнең калган көннәре дә барыгызга да шундый ук матур һәм мул булсын!