21 нче октябрь көнне Наласа урта мәктәбенең  24 башлангыч класс укучысына “ Укучының мәдәни көндәлеге” бүләк ителде. Тантанага шулай ук  укучыларның әти-әниләре дә килде.“Укучының мәдәни көндәлеге” бәйгесенең максаты - үсеп килүче яшь буынны Татарстан Республикасының мәдәни мирасы белән таныштыру, укучыларда мәдәнияткә карата кызыксыну уяту.Укучыларга “Укучының мәдәни көндәлеге” буенча мәгълүмәтләр бирелде. Бу көндәлек  укучыларга республикабызның тарихи-истәлекле урыннарына, төрле мәдәни чараларга юл күрсәтер һәм рухи байлыкларыбыз белән якыннанрак танышырга ярдәм итәр.  Көндәлектәге төсле, заманча рухтагы рәсемнәр, кызыклы тарихи мәгълүматлар, укучыларның психологик һәм яшь үзенчәлекләрен истә тотып сайланган табышмак, кроссворд, иҗади биремнәр, укучыларның игътибарын  үзенә җәлеп итеп тора.  
    Укучыларга һәм әти-әниләргә, укытучылар никадәр  күбрәк мәдәни чарада катнашса, тарихи-истәлекле урыннарга йөрсә, көндәлеген никадәр пөхтә алып барса – аның уку елы дәвамында республика күләмендә үткәрелә торган мәдәни конкурста җиңү ихтималы шулкадәр күбрәк булачагы аңлатылды. Соңыннан  укучылар  әти-әниләре  белән мәктәп  музеенда  булдылар.Әлеге мәдәни тәрбия һәм белем бирүгә юнәлтелгән проект планы нигезендә укучылар сыйныфташлары, әти-әниләре белән үзләре яшәгән шәһәрдәге, райондагы музей, театр, китапханә, концерт залларына йөрер, республикабызның һәм башкалабыз Казанның тарихи урыннарына сәяхәт итәр дип ышанып каласы килә.