Әдәбиятыбыз  искиткеч гүзәл әсәрләргә бай. Алар арасында нинди генә темага язылганнары юк. Шулай да иң күп шигырьләр әниләргә багышланган, иң күп җырлар әниләр турында. Кулына каләм алган һәркем әниләр турында язмый кала алмыйдыр.

     Бүген мәктәбебездә татар теле һәм әдәбияты укытучылары  Габдрахманова Г.В. һәм  Шаһисламова Г.Р. тарафыннан оештырылган “Әдәбиятта ана образы” дип исемләнгән кичә үткәрелде. Кичәдә ана образының әдәбиятыбызның  төрле җанрларында чагылышы күзәтелде. Бәйрәмгә авылыбыз мәчетендә  укучыларыбызны дин сабакларына  өйрәтүче  Фәридә апа Галиуллина да килгән иде. Ул ана хакы, аның турында коръәндәге аятьләр белән таныштырды, аналар һәм балалар арасында булган гыйбрәтле хәлләр турында сөйләде. 

     Кичә укучылар һәм укытучылар тарафыннан башкарылган җырлар, шигырьләр һәм  әсәрләрдән өзекләр , әниләргә багышланган клиплар карау  белән үрелеп барды. Чара бик эчтәлекле  һәм  тәрбияви яктан да югары дәрәҗәдә  оештырылган иде.