Әфган сугышы... Бу коточкыч вакыйгаларга нокта куелган 1989 нчы елның 15 нче февраль көненнән соң нәкъ 36 ел вакыт узып киткән. 15 нче февраль - Россиядә интернационалист сугышчыларны искә алу көне итеп үткәрелә.

Сугыш 9 ел 1 ай 19 көн дәвам итә. Ул безнең халык өчен 15 меңгә якын кургаш табут, 50 мең яралы, 312 хәбәрсез югалган солдат рәвешендә әйләнеп кайтты. Исән кайтканнар мәңге төзәлмәс күңел җәрәхәте алды. Актанышның 6 асыл егете бу сугыштан әйләнеп кайтмады. Әлеге саннарны безнең онытырга хакыбыз юк. Чөнки алар - безнең ватандашар, якташлар. "Исәннәрнең - кадерен, үлгәннәрнең каберен бел", - дигән борынгы бабаларыбыз. Әфган сугышында ил кушканны, хәрби бурычын үтәүчеләрне һәрчак хәтердә сакларга тиешбез.

 Совет сугышчыларын Әфганистаннан чыгару көнен бөтен ил билгеләп үтте. Билгеле, безнең мәктәптә дә җанннарны тетрәндергән бу сугыш турында "Әфганистан-йөрәк ярасы" дигән очрашу уздырылды. Кунакка авылдашыбыз, районыбызның әфганчылар оешмасы җитәкчесе Гатин Илсур абый һәм районыбызның төрле авылларында яшәүче әфганчы егетләребез килгән иде. Сугышны киноларда гына күргән укучыларга, чын солдатлар, батыр абыйлар белән очрашу зур яңалык. Әфганчыларның сөйләгән сүзләре зур кызыксындыру уятты. Абыйлар үзләренең чыгышларында сугышның ни дәрәҗәдә куркыныч булуын, ләкин ир-егетнең ил алдындагы бурычын үтәргә тиешлеген аңлатты. Әфганчылар укучыларның сорауларына җавап бирделәр. Кичә-очрашу һәркемнең күңелендә җылы бер истәлек булып сакланыр!