Яңа Əлем мәктәбе "Экояз 2021" акциясендә катнашып, "Иң яхшы" мәктәп номинациясендә Татарстан Республикасы экология һәм табигать ресурслары министрлыгының дипломы һәм истәлек бүләге белән бүләкләнде.

Мәктәбебезнең физика-информатика укытучысы Илназ Илшат улы Шәрипов @ilnazsharipov Яр Чаллы “ИТ-парк"ы уздырган "Иң яхшы шәхси сайт һәм блог 2021" республикакүләм бәйгесендә катнашып, "Укытучы" номинациясендә 1 урынга ия булды, диплом һәм истәлек бүләге белән бүләкләнде.

1 июнь көнне мәктәбебездә мәктәп яны лагеры белән хезмәт һәм ял лагеры эшли башлады. Беренче көнне үк лагерьда уздырылган кызыклы чаралар балалар күңеленә бик хуш килде. Лагерь вожатыйлары клуб хезмәткәрләре белән берлектә "Балаларны яклау көне" уңаеннан Сабантуй бәйрәме уздырдылар. Ярыш-уеннарда балалар бик нык актив булдылар, җиңүчеләргә бүләкләр дә бирелде. Лагерьның беренче көне сизелми дә бик күңелле узып китте.

Татарстан Республикасының Архив эше буенча дәүләт комитеты игълан иткән «Минем шәҗәрәм» генеалогик тикшеренүләр республика бәйгесенең муниципаль этабында Яңа Əлем мәктәбенең 1 нче сыйныф укучысы Гиниятов Азиз җиңүче грамотасы һәм истәлекле бүләк белән, 3 нче сыйныф укучысы Хуҗин Мансур, 4 нче сыйныф укучысы Халилова Камилә, 6 нчы сыйныф укучысы Кирамова Лилия бәйгедә актив катнашучы сертификатлары һәм истәлекле бүләкләр белән бүләкләнделәр. Афәрин укучыларыбыз!

25 май көнне Яңа Әлем балалар бакчасында мәктәпкә әзерлек төркеменең "Хуш бакчам" дип исемләнгән бакча белән хушлашу бәйрәме булды. Бәйрәмдә мәктәпкә әзерлек төркеме балаларының бакча белән хушлашуга багышланган бай эчтәлекле чыгышлары каралды.

"Соңгы кыңгырау" бәйрәме безнең мәктәптә дә гөрләде бүген. 9 нчы сыйныфны тәмамлаучы биш укучыбыз белем биргән мөгаллимнәренә рәхмәтләрен әйтте, 9 ел дәвамында булган кызыклы хәлләрне искә төшерде, мәктәп белән саубуллашты бүген. Чыгарылыш сыйныф укучыларына район башкарма комитеты һәм район Башлыгының котлауларын Айрат Сөнәгать улы Кәрамов җиткерде.

Актаныш районы мәктәпләрендә белем алучы укучылар арасында уздырылган спартакиадада укучыларыбыз командасы 1 урынга ия булды! Афәрин кызлар һәм егетләр!

Дөрес туклану - сәламәтлек нигезе! 17 май көнне ата-аналар комитете вәкиле Имамова Римма Риф кызы туклануга күзәтү ясады һәм фикерләрен журналга теркәде: "Ашханәдә ризык җылы, тәмле, туклыклы. Чиста, пөхтә. Пешекчеләр ягымлы, ачык йөзле, формадан. Укучылар канәгать. Чәйләр җылы, тәмле. Дежур укучылар өстәлләрне җыештырып, сөртеп чыктылар".

Бүген Яңа Әлем “Миләшкәй” балалар бакчасының мәктәпкә әзерлек төркеме балалары белем иленә сәяхәт кылдылар. Алар мәктәптә уку бүлмәләре белән таныштылар, музейдагы борынгы экспонатларга күзәтү ясадылар. Мәктәптә эшләп килүче “Серле дөнья” курчак театрының “Зәңгәр чәчәк” әкиятен карадылар. Балаларга бу экскурсия бик ошады.

Алдынгы педагогик тәҗрибәне пропагандалауда «Мәгариф» журналы белән озак еллар тыгыз иҗади хезмәттәшлектә булганы өчен һәм 50 яшьлек юбилее уңаеннан мәктәбебезнең биология укытучысы Гыйльфанов Фидус Нәрфис улы «Мәгариф» журналының Мактау грамотасы белән бүләкләнде.