Көзге каникул  программасы кысаларында укучыларның ялын файдалы итеп үткәрү  һәм булачак БДИ, ДЙА га әзерлек максатыннан төрле фәннәрдән консультацияләр оештырыла. Түгәрәкләр вакытында үтә.  

   31 нче октябрь көнне гимназиядә уку елының 1 чирек нәтиҗәләре буенча ата-аналар җыелышлары булып узды.  Җыелышта шулай ук мәгариф бүлеге методистлары Сосенкова Н.М. һәм Аюпова В.М.  катнашты.  Алар 9,11 нче сыйныф әти-әниләре өчен БДИ, ДЙА да соңгы яңалыклар белән таныштырдылар, әти-әниләрнең кызыксындырган сорауларына җавап бирделәр.  

 Шулай ук  җыелышларында чирек нәтиҗәләре буенча чыгышлар тыңланылды,  районда балалар арасында җинаять торышы, экстремизм, терроризмга һәм коррупциягә  каршы көрәш,   кич йөрү проблемалары күтәрелде, ата-аналар бурычлары кабат искәртелде . "Путь к успеху” программасы буенча эш дәвам ителде.  

 31 нче октябрь  көнне  гимназиядә педагогик киңәшмә узды. Киңәшмәдә мәгариф бүлеге методистлары Сосенкова Н.М. һәм Аюпова В.М.  катнашты.  Директор урынбасарлары 2016-2017 нче уку елының беренче чирегендә эшләнгән эшләргә йомгак ясадылар. Шулай ук БДИ, ДЙА га укучыларны әзерлек буенча өлкән сыйныф укытучыларның тәҗрибәләре тыңланылды. Чыгышлар презентация белән үрелеп барды. 

 Бүген гимназиядә беренче чирекне тәмамлауга багышланган гомуми линейка үткәрелде.  Линейкада   укучыларны беренче чирек йомгаклары һәм икенче чиреккә куелган бурычлар белән таныштырылды.   Шулай ук  Халыкара  танып- белү бәйгесе  “Тамчы- шоу” да,  Минзәлә шәһәренең педагогия көллияте бинасында Татарстан Республикасы фән һәм мәгариф министрлыгы тарафыннан оештырылган республикабызның татар гимназиясе укучылары командалары арасында  катнашкан гимназия командасы укучыларына  грамота һәм акчалата бүләк тапшырылды.  Укучыларга   куркынычсызлык  кагыйдәләре  буенча  инструктаж   үткәрелде,   каникул  вакытына  эш  планы белән  таныштырылды.Алдагы чиректә  укучыларга тырышып укырга, спортта һәм укуда артта калмаска дигән  бурычлар  куйды

        23 нче октябрь көнне Татар гимназиясенең  6 нчы сыйныф  укучылары  Халыкара  танып- белү бәйгесе  “Тамчы- шоу” да катнаштылар. “Татарстан - Яңа Гасыр” каналында балалар өчен “Тамчы-шоу” программасы 2006 елдан башлап эфирга чыга. Тапшыруның максаты республикабызда яшәүче сәләтле балаларны ачыклау, берләштерү, белемгә, китап укуга мәхәббәт уяту, кечкенәдән татар зыялыларын үстерү. Телевизион уенда 6,7,8 сыйныф укучылары катнаша. Әлеге бәйгедә  гимназия укучылары Алабуга гимназиясе укучылары белән белем буенча көч сынаштылар. Көндәш команда белән яшь аермасы булуга карамастан, безнең укучыларыбыз  әлеге бәйгедә сынатмадылар һәм җиңүгә ирештеләр. Укучыларыбыз кызыклы һәм файдалы китаплар белән бүләкләнделәр. Аларны җиңүләре белән тәбриклибез.  Бу уен һәм "Яңа гасыр" телерадиокомпаниясенә сәяхәт күңелләребездә әйтеп бетерә алмаслык матур тәэсир калдырды.Бәйгедә катнашуны оештырырга ярдәм иткән өчен Зәй районы мәгариф бүлегенә, транспорт белән тәэмин иткән бабалалар иҗат йорты җитәкчелегенә чын күңелдән  рәхмәтләребезне белдерәбез