11 ләрнең иң җаваплы чорлары башланды. Бүген алар рус теленнән ЕГЭ тапшырдылар. Быелгы имтиханнарда шартлар шактый кырыс һәм катлаулы. Норлат мәктәбендә урнашкан имтихан тапшыру пунктына укучылар тимер тикшергечләр аша узды, шунлыктан телефон белән керү мөмкинлеге бөтенләй булмады. Кабинетларда видеокамералар, Казан һәм Чиләбедән килгән күзәтүчеләр. Мондый шартларда укучылар гына түгел, олылар да югалып калыр иде. Шулай да имтиханнар тыныч узды, инде нәтиҗәләрнең генә уңай булын көтәсе кала!

   Шимбә көнне Күгәй авылында татар-башкорт милли көрәше буенча ярышлар узды. Мәктәбебездә әле яңа гына эшли башлаган көрәш түгәрәгенең 4 егете әлеге ярышта булып кайттылар. 7 класс укучысы Гафиятуллин Рәдис үз авырлыгы үлчәмендә 2 нче урын алуга иреште. Башка егетләр дә сынатмады. Афәрин, егетләр! Алга таба да уңышлы чыгышлар теләп калабыз! 

   Апрель аенда район мәктәп укучылары арасында үзешчән сәнгать көчләре смотры узган иде. Бүген, гомуми линейкада, әлеге бәйгедә уңышлы чыгыш ясаган укучыларны, чыгышларны дипломнар белән бүләкләделәр. Шуны әйтергә кирәк безнең укучыларның барлык чыгышлары да призлы урыннарга лаек булган. Шулай итеп:

Ания Сайфетдинова, Гөлия Абзалина (дуэт җыр) -  2 урын

Гелүсә Гыйбадуллина, Рәзинә Сәйфетдинова (дуэт җыр) - 1 урын

Биюләр (4 класслар һәм 5-6 класслар) -   3 урын

Ансамбль "Тамчыкай" - 3 урын

Фольклор  (10 класс) - 3 урын . Афәрин, дуслар! Котлыйбыз сезне!

   Татар халык җыры "Алмагачлары" ның текстындагы сүзләр быел бигрәк рас килде. Нәкъ майның 15 ендә алмагачлар чәчәк атты. Мәктәбебез бакчасы бигрәк матур бүгенгесе көндә. Чияләр, алмагачлар, боярышник - барысы да ап-ак чәчәктән, бал кортлары белән гөжләп тора. Бигрәк матур мизгелләр!

   Мәктәп бакчасында эш кызу темплар белән бара. Инде менә чират бәрәңгегә җитте. Мәктәп коллективы тырышлыгы һәм әти-әниләр ярдәме белән (орлыклык материал белән) бакчага бәрәңге дә утыртып куйдык. Уңышы гына куандырылык булсын инде!

    Кичә 5-6 класс укучылары арасында рус теленнән муниципаль тур олимпиада узды. Норлат зонасы мәктәпләре укучылары әлеге сынауны  Норлат мәктәбе базасында узды. 5 класс укучысы Пустынникова Анастасия әлеге зона турында беренче урын яулап кайтты. Афәрин, Настя! ( Укытучысы Кабирова Г.Р.). Настядан тыш Хәнәфиеева Мәликә (5 кл.) һәм Бикмуллина Гөлия (6 кл) дә олимпиада биремнәрен уңышлы башкардылар.

Быел Бөек Җиңүнең 69 еллыгын билгеләп үтәбез. Шушы көннәрдә һәр урында сугыш һәм тыл ветераннарын искә алу, аларны хөрмәтләү һәм котлау кичәләре, очрашулар үткәрелә. Безнең мәктәп коллективы да бу чаралардан читтә калмый. Мәктәбебездә,  бүген исәннәр арасында бердәнбер булучы,  Хөснетдинов Борһан абый һәм әтиләре сугышта булган апалар белән очрашу үткәрдек. Алар безгә сугыш афәте турында сөйләделәр, укучыларга бүгенге тыныч тормышның кадерен белергә кирәклеген аңлаттылар. Кыскасы, бу очрашу файдалы һәм бик тә кирәкле булды.

 Барлык сугыш һәм тыл ветераннарын 9 май - Җиңү көне белән чын күңелебездән котлыйбыз. Бүгенге тыныч тормыш өчен сез үзегезнең яшьлегегезне, гомерегезне корбан иткәнсез. Без сезнең алда баш иябез. Картлыгыгыз матур булсын. Сезгә зур сәламәтлек, исәнлек телибез, хөрмәтле ветераннар!

    Көннәр матурлану белән мәктәп коллективы бакчага эшкә чыкты. Мәктәп яны тәҗрибә участогы шактый зур булганлыктан эш бер көндә генә тәмамланмады: түтәлләр ясалды, кишер, суган (кара орлык), чөгендер чәчелде. Әйе, әле бу эшнең башы гына. Алга таба күп төрдәге эшләр көтә безне: орлыкларны кертеп бетерү, тәҗрибә эшләрен башлап җибәрү, раасадаларны парникларга чыгару, чәчәкләр утырту һ.б.

   Мәктәпләрдә чираттагы Парламент дәресләре булып узды. Әлеге дәреснең темасы "Без бергә: Кырым һәм Севастополь" дип аталды. Парламент дәресен Ачасыр авыл җирлеге башлыгы, район советы депутаты Кадыйров Равил Самат улы уздырды.