Бүген гимназиядә язучы  Абдулла Алишның 110 - еллык юбилее  уңаеннан яшь шагыйрь, Абдулла Алиш, Муса Җәлил премияләре лауреаты  Ленар Шәех белән  очрашу  узды. Укучылар шагыйрьнең  шигырьләрен ,табышмакларын яттан сөйләделәр. Ленар әфәндегә бик күп сораулар биреп, аның иҗаты белән тагын да тирәнрәк таныштылар, шагыйрь абыйлары белән фотога төштеләр. Үзләре дә Л.Шәехкә осталыкларын күрсәттеләр, җырладылар, биеделәр. Очрашу бик күңелле узды!

  Гимназия укучылары ел дәвамында Спартакиада уеннарында актив катнашалар. Әле яңа гына   өстәл теннисы уенында катнашып,  II нче урын, шахматтан - III нче урын, футболдан -  III  нче урыннарны  яулап кайттылар. Афәрин! Котлыйбыз сезне, укучылар! Алга таба да призлы урыннар лаек булсын сезгә.

  22 нче гыйнвар көнне 206 нчы  балалар бакчасының мәктәпкә әзерлек  төркеме безнең  гимназия белән танышырга килде.  "Абдулла Алиш", "Милли мирас" , "Мәңгелек хәтер" музейларында һәм китапханәдә, сыйныф бүлмәләрендә, ашханәдә, спорт залында булдылар балалар. Безнең гимназиябезне нәниләр    бик ошатып киттеләр. Хәтта " Тизрәк  монда укырга килергә иде !"- дигән теләк  тә белдерделәр.

 Әти-әниләр өчен!

 Микрорайон буенча 1 нче сыйныфка кабул итү 1 нче февральдән башланачак. Киләсе уку елында 4 сыйныф  ачу күздә тотыла.

" Мәгариф" , " Гаилә һәм мәктәп" журналлары берлектә 2017 елның декабрь аенда укытучылар, тәрбиячеләр арасында " Әдәби карта" исемле республика  иҗади бәйгесе үткәрде. Бу чарада безнең директорыбыз Рәхимә Минвәли кызы Арсланова катнашып, II урынга  ия  булды. Без аны ихлас күңелебездән котлыйбыз!

Бүген 1 нче сыйныф укучыларын китап укучылар сафына кабул итү бәйрәме булды. Китапханәче Римма Илдус кызы балаларны китапханә, китап уку кагыйдәләре белән таныштырды, кызыклы уеннар уздырылды. Бу чарадан балалар бик канәгать калдылар.

“Ак калфак" Бөтендөнья татар хатын-кызларының  иҗтимагый оешмасы   милли йолаларыбызны, гореф-гадәтләребезне саклауда, аны киләчәк буынга җиткерүдә зур эш алып бара.

 19.01. 2018 14.00 сәг.  Казан  шәһәре буенча  Бөтендөнья  татар хатын-кызларының  « Ак калфак» иҗтимагый  оешмасының  җыелышы  узачак.

Бу чарага  башкалабызның һәрбер мәктәбеннән,  балалар бакчаларыннан, оешмалардан 1 вәкил чакырыла ( башында калфак булуы хуплана).

 Үткәрү урыны: Казан шәһәре Вахитов районының 27 нче гимназиясе, Назарбаев урамы,48 йорт

Сезне  "Студентлар көне"  уңаеннан гимназиябезгә   очрашуга   чакырабыз!

Вакыты:  2.02.2018 ел. сәг 13.00
Адресыбыз:  Пионерлар урамы, 10 

Яңа ел бәйрәме уңаеннан, безнең гимназиядә чаралар гөрләп үтә. Бүген  3 нче һәм 4 нче сыйныф укучылары арасында "Бию марафоны" узды. Иң оста биючеләр булып 4 нче "Г" сыйныф укучылары булып чыкты. Алар үзләренең биюләре белән һәрбер тамашачының күңеленә хуш килеп, Гран-при яулады. 1 нче урынга 4 нче А укучылары, 2 нче урынга 4 нче Б һәм 4 нче В укучылары, 3 нче урыннарга 3 нче А һәм 3 нче  Б укучылары лаек булды. 

 Бүген гимназиябездә Яңа ел бәйрәме уңаеннан бию марафоны узды. Бу бәйрәм алды чарасы гимназиябезне ямьләндереп , күңелләргә күтәренке рух кертте.  Чараны Кыш бабай белән Кар кызы алып бардылар. Һәрбер сыйныф  үзләренең бию осталыкларын күрсәтте. "Кавказ" биюен милли киемнәрдә биеп, 6 нчы В сыйныф укучылары Гран-при яуладылар. 5 нче А һәм 6 нчы А сыйныф укучылары татар халык биюен күрсәтеп, 1 нче урынны бүлешсә, 2 нче урыннны 7 нче А сыйныфы, 3 нче урынны 7 нче Б сыйныф укучылары алды. Шулай ук параллель рәвештә "Безнең сыйныф" видеоконкурсы да барды. Монда Гран-прины  10 нчы сыйныф укучылары  яулады. Без барлык укучыларны да җиңүләре белән котлыйбыз! 

 22 нче декабрь көнне гимназиядә " Хокук хәзерге җәмгыятьнең нигезе - Право как основа современного общества" исемле югары сыйныф укучылары һәм студентлар арасында  IV Бөтенроссия фәнни-гамәли конферециясе узды. Бу чараны без ел да  Россиянең хокук университеты белән берлектә үткәрәбез. Конференциядә  катнашучылар саны елдан-ел арта, географиясе  киңәя.  Быел  Воронеж, Түбән Новгород  һәм Ульяновск шәһәрләреннән дә катнашучылар булды.